243 ಜನರನ್ನು ಹೊತ್ತಿದ್ದ ಕೇರಳದ ಹಡಗು ನಾಪತ್ತೆ, 5 ತಿಂಗಳಿಂದ ಪತ್ತೆಯಿಲ್ಲ!
ನವದೆಹಲಿ, ಜೂನ್ 21: ಸುಮಾರು 243 ಜನರನ್ನು ಹೊತ್ತಿದ್ದ ಹಡಗೊಂದು ಈ ವರ್ಷದ ಜನವರಿ ತಿಂಗಳಿನಿಂದ ಕಾಣೆಯಾಗಿದ್ದು, ಇದುವರೆಗೂ ಈ ಬಗ್ಗೆ ಯಾವುದೇ ಮಾಹಿತಿ ಲಭ್ಯವಾಗಿಲ್ಲ ಎಂದು ವಿದೇಶಾಂಗ ಸಚಿವಾಲಯ ತಿಳಿಸಿದೆ.
ಕೇರಳದ ಎರ್ನಾಕುಲಂನಿಂದ 'ದೇವ ಮಾತಾ 2' ಎಂಬ ಹೆಸರಿನ ಈ ಹಡಗು ಜನವರಿ 12, 2019 ರಂದು ಹೊರಟಿತ್ತು. ಇದರಲ್ಲಿ 243 ಜನರಿದ್ದರು. ಪೆಸಿಫಿಕ್ ಸಾಗರದ ಕಡೆಗೆ ಹೊರಟಿದ್ದ ಈ ಹಡಗು ನಂತರ ಎಲ್ಲಿ ತೆರಳಿದೆ ಎಬ ಬಗ್ಗೆ ಮಾಹಿತಿ ಇದುವರೆಗೂ ಲಭ್ಯವಾಗಿಲ್ಲ ಎಂದು ವಿದೇಶಾಂಗ ಸಚಿವಾಲಯದ ವಕ್ತಾರ ರವೀಶ್ ಕುಮಾರ್ ತಿಳಿಸಿದ್ದಾರೆ.
ಮಲ್ಪೆಯಿಂದ ನಾಪತ್ತೆಯಾಗಿದ್ದ ಸುವರ್ಣ ತ್ರಿಭುಜ ಬೋಟ್ ಅವಶೇಷ ಪತ್ತೆ
ಈ ಕುರಿತು ಈಗಾಗಲೇ ವಿದೇಶಾಂಗ ಸಚಿವ ಜೈಶಂಕರ್ ಅವರು ಪೆಸಿಫಿಕ್ ಸಮುದ್ರದ ಬಳಿಯ ದೇಶಗಳಿಗೆ ಮಾಹಿತಿ ನೀಡಿದ್ದು, ಪ್ರಯಾಣಿಕರ ಕುರಿತು ಯಾವುದೇ ಸಂಗತಿ ತಿಳಿದುಬಂದಿಲ್ಲ, ಭಾರತಕ್ಕೆ ತಿಳಿಸುವಂತೆ ಮನವಿ ಮಾಡಿದ್ದಾರೆ.
"ಹಡಗಿನ ಬಗ್ಗೆ ಕೇರಳ ರಾಜ್ಯ ಸರ್ಕಾರವನ್ನು ವಿಚಾರಿಸಿದಾಗ, ಪ್ರಯಾಣಿಕರು ಸರ್ಕಾರಕ್ಕೆ ಈ ಬಗ್ಗೆ ಮಾಹಿತಿ ನೀಡಿದ್ದು, ತಾವು ಪೆಸಿಫಿಕ್ ಸಾಗರದ ಕಡೆ ತೆರಳುತ್ತಿರುವುದಾಗಿ ತಿಳಿಸಿದ್ದರು" ಎಂದು ಕೇರಳ ಸರ್ಕಾರ ಹೇಳಿದೆ. ಆದರೆ ಪ್ರಯಾಣಿಕರು ಯಾಕಾಗಿ ತೆರಳಿದ್ದರು ಎಂಬ ಬಗ್ಗೆ ಇದುವರೆಗೆ ಯಾವುದೇ ಮಾಹಿತಿ ಲಭ್ಯವಾಗಿಲ್ಲ.