5 ಬ್ಯಾಂಕುಗಳ ವಿಲೀನ: SBI- SBM ವಿಲೀನಕ್ಕೆ ಮಹೂರ್ತ

ಮುಂಬೈ, ಜೂನ್ 13: ಕಾರ್ಪೊರೇಟ್ ಕಂಪನಿಗಳಿಗೆ ನೂರಾರು ಕೋಟಿ ರೂ ಸಾಲ ನೀಡಿ, ಮರುಪಾವತಿಯಾಗದೆ ಅನುತ್ಪಾದಕ ಆಸ್ತಿಯನ್ನು ಗುಡ್ಡೆಹಾಕಿಕೊಂಡಿರುವ ದೇಶದ ಅಗ್ರಗಣ್ಯ ಸರಕಾರಿ ಮಾಲೀಕತ್ವದ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ ಇದೀಗ ತನ್ನ ಸ್ಥಾನವನ್ನು ಭದ್ರಪಡಿಸಿಕೊಳ್ಳಲು ತನ್ನ ಅಧೀನದಲ್ಲಿರುವ ಐದು ಬ್ಯಾಂಕುಗಳನ್ನು ಪ್ರಧಾನ ಬ್ಯಾಂಕಿನೊಂದಿಗೆ ವಿಲೀನಗೊಳಿಸಲು ನಿರ್ಧರಿಸಿದೆ.

ಈ ಐದೂ ಅಧೀನ ಬ್ಯಾಂಕುಗಳನ್ನು ಮರ್ಜ್ ಮಾಡಿಕೊಂಡರೆ SBI ಆಸ್ತಿಯ ಮೊತ್ತ ಸುಮಾರು 22 ಲಕ್ಷ ಕೋಟಿ ರೂ. ಗೆ ಏರುತ್ತದೆ. ಜತೆಗೆ ಈಗಾಗಲೇ 15,143 ಶಾಖೆಗಳನ್ನು ಹೊಂದಿರುವ SBI ಲೆಕ್ಕಕ್ಕೆ ಈ ಪಂಚ ಬ್ಯಾಂಕುಗಳ 5,658 ಶಾಖೆಗಳು ಸೇರ್ಪಡೆಯಾದಂತಾಗುತ್ತದೆ.

ಮಾರುಕಟ್ಟೆ ಪಾಲು ಸಹ ಈಗಿನ ಶೇ. 19ರಿಂದ ಶೇ. 24ಕ್ಕೆ ವೃದ್ಧಿಸುತ್ತದೆ. ಅಂದರೆ ಅಗ್ರಗಣ್ಯ SBI ಮತ್ತಷ್ಟು ಬಲಾಢ್ಯವಾಗುತ್ತದೆ. ದೇಶ ಮತ್ತು ವಿಶ್ವದ ಆರ್ಥಿಕತೆಯನ್ನು ಪರಿಗಣಿಸಿದರೆ ಈಗಿನ ಸೇರ್ಪಡೆ ಸಮಯವೂ ಸುಸಮಯವಾಗಿದೆ ಎಂದು ಎಸ್ ಬಿಐ ನೂನತ ಅಧ್ಯಕ್ಷೆ ಆರುಂಧತಿ ಭಟ್ಟಾಚಾರ್ಯ ಹೇಳುತ್ತಾರೆ.

ಸ್ಟೇಟ್ ಬ್ಯಾಂಕ್ ಆಫ್ ಮೈಸೂರು ಕೊನೆಗೂ ವಿಲೀನ?:
ರಾಜ್ಯದಲ್ಲಿ ಸರ್ ಎಂ ವಿಶ್ವೇಶ್ವರಯ್ಯ ಅವರು ಸ್ಥಾಪಿಸಿದ State Bank of Mysore, State Bank of Travancore, State Bank of Hyderabad, State Bank of Patiala ಮತ್ತು State Bank of Bikaner & Jaipur ಮಾತೃ ಬ್ಯಾಂಕಿನೊ0ದಿಗೆ ವಿಲೀನವಾಗಲಿದೆ.

ಆದರೆ ಇದು ಕೈಗೂಡುತ್ತದಾ? ಎಂಬುದು ಒಂದು ದಶಕದಿಂದ ಕೇಳಿಬರುತ್ತಿರುವ ಪ್ರಶ್ನೆ. ಏಕೆಂದರೆ ದಶಕದ ಹಿಂದೆಯೇ ಇವುಗಳ ವಿಲೀನಕ್ಕೆ ಚಿಂತನೆ ನಡೆಯಿತು. ಆದರೆ ಬ್ಯಾಂಕ್ ಯೂನಿಯನ್ನುಗಳು ಇದನ್ನು ಸುತರಾಂ ಒಪ್ಪುತ್ತಿಲ್ಲ. ಇನ್ನು ಹಿಂದಿನ ಸರಕಾರವೂ ಇದರ ಬಗ್ಗೆ ಹೆಚ್ಚು ಕಾಳಜಿ ವಹಿಸಲಿಲ್ಲ. ಆದರೆ ಈಗಿನ ಹೊಸ ಕೇಂದ್ರ ಸರಕಾರ ಮತ್ತು ಹೊಸ ಸಿಎಂಡಿ ಆರುಂಧತಿ ಅವರು ಗಟ್ಟಿ ನಿರ್ಧಾರ ತೆಗೆದುಕೊಳ್ಳುತ್ತಾರಾ? ಎಂಬುದು ಕಾದುನೋಡಬೇಕಾದ ವಿಚಾರ.

ಏಕೆಂದರೆ ಕಳೆದೊಂದು ದಶಕದಲ್ಲಿ ಅಪಾರ ಚಿಂತನೆ, ವಿರೋಧಗಳು, ವಿರೋಧಾಭಾಸಗಳ ನಡುವೆ State Bank of Saurashtra ಮತ್ತು State Bank of Indore ಬ್ಯಾಂಕುಗಳನ್ನು SBI ತನ್ನ ಜತೆ ವಿಲೀನಗೊಳಿಸುವಲ್ಲಿ ಯಶಸ್ವಿಯಾಗಿತ್ತು. ಏನೇ ಆಗಲಿ, ಬ್ಯಾಂಕುಗಳ ವಿಲೀನವಾದರೆ ಬ್ಯಾಂಕಿನ ಅಂತಃಶಕ್ತಿ ಹೆಚ್ಚಾಗಿ, ದೇಶದ ಆರ್ಥಿಕತೆಗೆ ನೆರವಾಗುತ್ತದೆ ಎಂಬುದಂತೂ ಈ ಕ್ಷಣದ ಸತ್ಯ.

English summary

Bangalore SBM and 4 other banks to merge with parent bank SBI. State Bank of India, the nation's biggest lender, will kick off consolidation in the banking industry by combining five associate banks as it prepares to fund the economy. SBI's five associates are State Bank of Travancore, State Bank of Hyderabad, State Bank of Patiala, State Bank of Bikaner & Jaipur and State Bank of Mysore. Although consolidation was first mooted about a decade ago, nothing much happened.