ಎಸ್ಎಸ್ಎಲ್ಸಿ 2015: ತುಳು ಪರೀಕ್ಷೆಗೆ ವಿದ್ಯಾರ್ಥಿಗಳು ಸಿದ್ದ
ಮಂಗಳೂರು, ಮಾ 4: ಕರ್ನಾಟಕ ಪ್ರೌಢ ಶಿಕ್ಷಣ ಪರೀಕ್ಷಾ ಮಂಡಳಿ ಇದೇ ಮೊದಲ ಬಾರಿಗೆ ಎಸ್ಎಸ್ಎಲ್ಸಿ ಪರೀಕ್ಷೆಗೆ (2015) ತುಳು ಭಾಷೆಯನ್ನು ತೃತೀಯ ಭಾಷೆಯಾಗಿ ಸೇರ್ಪಡೆಗೊಳಿಸಿದ್ದು, ಪರೀಕ್ಷೆ ಎದುರಿಸಲು ಉರ್ವಸ್ಟೋರ್ನ ಪೊಂಪೈ ಪ್ರೌಢಶಾಲೆಯ 18 ವಿದ್ಯಾರ್ಥಿಗಳು ಸಿದ್ಧರಾಗಿದ್ದಾರೆ.
ತುಳು ಭಾಷೆ ಇದೀಗ ಎಸ್ಎಸ್ಎಲ್ಸಿ ಮಂಡಳಿಯಲ್ಲಿ ಅಧಿಕೃತ ತೃತೀಯ ಭಾಷೆ ಎಂದು ನಮೂದಾಗಿದ್ದು, 69 ಕೋಡ್ ಸಂಖ್ಯೆಯೂ ದೊರಕಿದೆ.
ಈ ಹಿಂದೆ ಕೊಂಕಣಿ ಭಾಷೆಗೆ 68 ಕೋಡ್ ಸಂಖ್ಯೆ ಲಭಿಸಿತ್ತು. ಈ ಬಾರಿ ಏಪ್ರಿಲ್ 10ರಂದು ತೃತೀಯ ಭಾಷಾ ಪರೀಕ್ಷೆ ನಡೆಯಲಿದ್ದು ಕೊಂಕಣಿ ಜತೆ ತುಳು ಭಾಷಾ ಪರೀಕ್ಷೆ ಕೂಡ ನಡೆಯಲಿದೆ.
ಪೊಂಪೈ ಪ್ರೌಢಶಾಲೆಯ ಮುಖ್ಯ ಶಿಕ್ಷಕರಾದ ಫ್ರಾಂಕ್ ಹಿಲೆರಿ ಡಿಸೋಜ ಮತ್ತು ಅವರ ಸಿಬ್ಬಂದಿ, ಸಾರ್ವಜನಿಕ ಶಿಕ್ಷಣ ಇಲಾಖೆ ಅಧಿಕಾರಿಗಳ ಅವಿರತ ಶ್ರಮದ ಫಲವಾಗಿ ತುಳು ಭಾಷೆ ಎಸ್ಎಸ್ಎಲ್ಸಿ ಮೆಟ್ಟಿಲೇರುವಂತಾಗಿದೆ.
ಈಗಾಗಲೇ ಪರೀಕ್ಷೆಗೆ 4-5 ಮಾದರಿ ಪ್ರಶ್ನೆ ಪತ್ರಿಕೆಗಳನ್ನು ತಜ್ಞರು ಸಿದ್ಧಪಡಿಸಿ ಮಂಡಳಿಗೆ ಕಳುಹಿಸಿದ್ದಾರೆ. (ತುಳು ಭಾಷೆಗೆ ರಾಷ್ಟ್ರೀಯ ಸ್ಥಾನಮಾನದ ಗುರಿ)
ಹದಿನೆಂಟು ಮಕ್ಕಳ ಪೈಕಿ ನಾಲ್ಕು ಮಂದಿ ಹೆಣ್ಣು ಮಕ್ಕಳು. ಉಳಿದವರು ಗಂಡು ಮಕ್ಕಳು. ದೂರದ ಕೊಪ್ಪಳ ತಾಲೂಕು ಬೆಟಗೇರಿ ಮೂಲದ, ಕನ್ನಡ ಮಾತೃಭಾಷೆಯ ಮಂಜುನಾಥ್ ತುಳು ಪರೀಕ್ಷೆ ಬರೆಯುತ್ತಿರುವುದು ವಿಶೇಷ.
'ಅಬ್ಬಕ್ಕ ಪ್ರಜೆಕುಲೆನ್ ಎಂಚ ತೂವೊಂದಿತ್ತೆರ್? (ರಾಣಿ ಅಬ್ಬಕ್ಕ ಪ್ರಜೆಗಳನ್ನು ಹೇಗೆ ನೋಡಿಕೊಳ್ಳುತ್ತಿದ್ದರು ?) ಮುಂತಾದ ಮಾದರಿ ಪ್ರಶ್ನೆಯನ್ನು ಅಚ್ಚುಕಟ್ಟಾಗಿ ಬರೆದು ತೋರಿಸುತ್ತಾರೆ ವಿದ್ಯಾರ್ಥಿ ಮಂಜುನಾಥ್.
ಕೊಪ್ಪಳದಿಂದ ಅಪ್ಪ ಅಮ್ಮನ ಜತೆ ಚಿಕ್ಕಂದಿನಿಂದಲೇ ಮಂಗಳೂರಿಗೆ ಬಂದಿದ್ದೆ. ಹೀಗಾಗಿ ಅವರಿವರ ಜೊತೆ ಬೆರೆತು ಅಲ್ಪಸ್ವಲ್ಪ ತುಳು ಮಾತನಾಡಲು ಕಲಿತೆ. ಇದೀಗ ತಪ್ಪಿಲ್ಲದೆ ಬರೆಯಲೂ ಕಲಿತಿದ್ದೇನೆ ಎನ್ನುತ್ತಾನೆ ಮಂಜುನಾಥ್.
ಕಲಾ ಶಿಕ್ಷಕ ದಿನೇಶ್ ಆರ್ ಶೆಟ್ಟಿಗಾರ್ ಈ ವಿದ್ಯಾರ್ಥಿಗಳಿಗೆ ತುಳು ಪಾಠ ಮಾಡಿದ್ದಾರೆ. ಸಾರ್ವಜನಿಕ ಶಿಕ್ಷಣ ಇಲಾಖೆ ಪ್ರಕಟಿಸಿದ 'ತುಳು ಎಸಲ್-10' ತುಳು ಪಠ್ಯದಲ್ಲಿ ತುಳು ಲಿಪಿ ಕಲಿಕೆ ಸೇರಿದಂತೆ ತುಳುನಾಡಿನ ವೀರ ಪುರುಷರ, ಗಣ್ಯ ವ್ಯಕ್ತಿಗಳ ಬಗ್ಗೆ ಕುರಿತಂತೆ ಪಾಠಗಳಿದ್ದು, ಈ ಪಠ್ಯದ ಆಧಾರದಲ್ಲಿ 80 ಅಂಕಗಳ ಪ್ರಶ್ನೆ ಪತ್ರಿಕೆ ಸಿದ್ಧಗೊಂಡಿದೆ.
ತುಳು ಪರೀಕ್ಷೆ ಎದುರಿಸಲು ನಮ್ಮ ವಿದ್ಯಾರ್ಥಿಗಳೂ ಸಂಪೂರ್ಣ ಸಿದ್ಧರಾಗಿದ್ದಾರೆ. ಸ್ಥಳೀಯ ಭಾಷೆಯೂ ಆಗಿರುವುದರಿಂದ ಅವರಿಗೆ ಕಲಿಕೆ ಸುಲಭವಾಗಿದೆ. ಸಿದ್ಧತಾ ಪರೀಕ್ಷೆಯಲ್ಲೂ ಚೆನ್ನಾಗಿ ಬರೆದಿದ್ದಾರೆ. ಅಂತಿಮ ಪರೀಕ್ಷೆಯಲ್ಲಿ ಉತ್ತಮ ಫಲಿತಾಂಶ ಬಂದಲ್ಲಿ ನಮ್ಮ ಶ್ರಮ ಸಾರ್ಥಕ ಎಂದು ಪೊಂಪೈ ಪ್ರೌಢಶಾಲೆಯ ಮುಖ್ಯ ಶಿಕ್ಷಕರಾದ ಫ್ರಾಂಕ್ ಹಿಲೆರಿ ಡಿಸೋಜ 'ಒನ್ ಇಂಡಿಯಾ'ಗೆ ತಿಳಿಸಿದ್ದಾರೆ.
Click it and Unblock the Notifications
Sign in with Google