ಬಟ್ಟೆ ಅಂಗಡಿಯಲ್ಲಿ ಡಿಸ್ಕೌಂಟ್ ನೀಡಲಿಲ್ಲ ಎಂದು ಇಬ್ಬರನ್ನು ಢಂ ಎನಿಸಿದ
ಲಖನೌ (ಉತ್ತರಪ್ರದೇಶ), ನವೆಂಬರ್ 1: ಯಾರಾದರೂ ವಸ್ತು ಖರೀದಿಸಿದ ನಂತರ ರಿಯಾಯಿತಿ ನೀಡದಿದ್ದರೆ ಏನು ಮಾಡಬಹುದು? ಇಲ್ಲೊಬ್ಬ ವ್ಯಕ್ತಿ ವಾರಾಣಸಿಯ ಮಾಲ್ ವೊಂದರಲ್ಲಿ ಇಬ್ಬರು ಸೇಲ್ಸ್ ಮನ್ ಗಳನ್ನು ಗುಂಡಿಟ್ಟು ಕೊಂದೇಬಿಟ್ಟಿದ್ದಾನೆ. ಈ ಘಟನೆ ಬುಧವಾರ ಸಂಜೆ ನಡೆದಿದ್ದು, ಈ ಘಟನೆಯಲ್ಲಿ ಮತ್ತಿಬ್ಬರಿಗೆ ಗಾಯಗಳಾಗಿವೆ.
ಮಾಲ್ ನ ಬಟ್ಟೆ ಅಂಗಡಿಯೊಂದರಲ್ಲಿ ಬೆಲೆ ಮೇಲೆ ರಿಯಾಯಿತಿ ನೀಡುವಂತೆ ಕೇಳುತ್ತಾ ಸೇಲ್ಸ್ ಮನ್ ಜತೆಗೆ ವಾದ ತಾರಕಕ್ಕೇರಿದೆ. ಆ ವೇಳೆ ಆರೋಪಿಯು ಇಬ್ಬರ ಮೇಲೆ ಗುಂಡು ಹಾರಿಸಿದ್ದಾನೆ. ಮತ್ತಿಬ್ಬರಿಗೆ ಗಾಯಗಳಾಗಿವೆ. ಸುನೀಲ್ ಹಾಗೂ ಗೋಪಿ ಎಂಬಿಬ್ಬರು ಘಟನೆಯಲ್ಲಿ ಸಾವನ್ನಪ್ಪಿದ್ದಾರೆ. ಗಾಯಗೊಂಡಿರುವ ಗೋಲು ಮತ್ತು ವಿಶಾಲ್ ರನ್ನು ಆಸ್ಪತ್ರೆಗೆ ದಾಖಲಿಸಿದ್ದು, ಅವರಿಬ್ಬರ ಸ್ಥಿತಿ ಗಂಭೀರವಾಗಿದೆ.
ಈ ಘಟನೆಯಿಂದ ಮಾಲ್ ನಲ್ಲಿ ಭಯದ ವಾತಾವರಣ ಸೃಷ್ಟಿಯಾಗಿದೆ. ಬಹಳ ಜನರು ಇರುವ ಸಂದರ್ಭದಲ್ಲೇ ಈ ಘಟನೆ ನಡೆದಿದೆ. ಆ ನಂತರ ಮಳಿಗೆಯನ್ನು ಮುಚ್ಚಲಾಗಿದೆ. ಕಂಟೋನ್ಮೆಂಟ್ ರಸ್ತೆ ಪ್ರದೇಶದಲ್ಲಿರುವ ಮಾಲ್ ನಲ್ಲಿ ಜನರನ್ನು ತೆರವು ಮಾಡಲಾಗಿದೆ. ಈ ಘಟನೆ ನಡೆದ ಸಂದರ್ಭದಲ್ಲಿ ಅಲ್ಲಿದ್ದವರನ್ನು ವಿಚಾರಣೆ ಮಾಡಲಾಗುತ್ತದೆ. ಜತೆಗೆ ಸಿಸಿಟಿವಿ ಫೂಟೇಜ್ ಪರಿಶೀಲಿಸಲಾಗುತ್ತಿದೆ. ಆದರೆ ಈ ವರೆಗೆ ಯಾರನ್ನೂ ಬಂಧಿಸಿಲ್ಲ ಎಂದು ಪೊಲೀಸರು ತಿಳಿಸಿದ್ದಾರೆ.
Click it and Unblock the Notifications
Sign in with Google