ಯಲ್ಲಾಪುರ ಕ್ಷೇತ್ರ ಮತದಾನ: ವಿಕಲಚೇತನ ಮತದಾರರ ಟ್ರ್ಯಾಕಿಂಗ್
ಕಾರವಾರ, ಡಿಸೆಂಬರ್ 5: ಯಲ್ಲಾಪುರ ಕ್ಷೇತ್ರಕ್ಕೆ ನಡೆಯುತ್ತಿರುವ ಉಪ ಚುನಾವಣೆಯಲ್ಲಿ ಒಟ್ಟು 1.72 ಲಕ್ಷ ಮತದಾರರಿದ್ದು, 2,024 ವಿಕಲಚೇತನ (ಪಿಡಬ್ಲುಡಿ) ಮತದಾರರು ಮತ ಚಲಾಯಿಸುತ್ತಿದ್ದಾರೆ. ಇವರೆಲ್ಲರನ್ನು ಗೂಗಲ್ ಮ್ಯಾಪಿಂಗ್ ಮೂಲಕ ಟ್ರ್ಯಾಕಿಂಗ್ ಮಾಡಲಾಗುತ್ತಿದೆ.
ಕಳೆದ ಚುನಾವಣೆಯಲ್ಲೇ ವಿಕಲಚೇತನ ಮತದಾರರು ತಮ್ಮ ಹಕ್ಕಿನಿಂದ ವಂಚಿತರಾಗದೇ ಇರಲಿ ಎಂದು ಜಿಲ್ಲಾ ಚುನಾವಣಾ ಆಯೋಗ ಇಂಥವರನ್ನು ಗುರುತಿಸಿ ಮ್ಯಾಪಿಂಗ್ ಮಾಡುವ ಕಾರ್ಯಕ್ಕೆ ಮುಂದಾಗಿತ್ತು. ಮತದಾನದ ದಿನ ಆಯೋಗದ ವೆಚ್ಚದಲ್ಲೇ ಅವರನ್ನು ಮತಗಟ್ಟೆಗೆ ಕರೆದುಕೊಂಡು ಬಂದು ಮತದಾನ ಮಾಡಿಸುವ ಯೋಜನೆ ರೂಪಿಸಿ ಯಶಸ್ವಿಯಾಗಿತ್ತು. ಈ ಉಪ ಚುನಾವಣೆಯಲ್ಲಿ ಕೂಡಾ ಅದೇ ಯೋಜನೆಯನ್ನು ಮುಂದುವರೆಸಿದೆ.
ಯಲ್ಲಾಪುರ ಕ್ಷೇತ್ರದಲ್ಲಿರುವ ವಿಕಲಚೇತನ ಮತದಾರರ ಹೆಸರು, ವಿಳಾಸದ ಅಳವಡಿಕೆ ಮಾಡಿ ಮತದಾನದ ದಿನ ಅವರನ್ನು ಕರೆದುಕೊಂಡು ಬರುವ ವ್ಯವಸ್ಥೆ ಮಾಡಲಾಗಿದೆ. ಕಳೆದ ಚುನಾವಣೆಯಲ್ಲಿ ಹಸಿರು ಬಣ್ಣದಿಂದ ವಿಕಲಚೇತನರ ಇರುವಿಕೆ ಗುರುತಿಸಲಾಗಿದ್ದು, ಮತದಾನವಾದ ಬಳಿಕ ಈ ಗುರುತು ನೀಲಿ ಬಣ್ಣವಾಗುತ್ತಿತ್ತು. ಈ ಬಾರಿಯೂ ಮತದಾನಕ್ಕೆ ಮೊದಲು ಒಂದು ಬಣ್ಣ ಮತದಾನದಲ್ಲಿ ಪಾಲ್ಗೊಂಡರೆ ಮತ್ತೊಂದು ಬಣ್ಣವಾಗಲಿದೆ. ಇದರಿಂದ ಗುರುತಿಸಲ್ಪಟ್ಟ ವಿಕಲಚೇತನ ಮತದಾರ ಮತದಾನ ಮಾಡಿದ್ದಾನೋ ಇಲ್ಲವೋ ಎನ್ನುವುದನ್ನು ತಿಳಿದುಕೊಳ್ಳಬಹುದಾಗಿದೆ. ಈ ಗೂಗಲ್ ಮ್ಯಾಪ್ ಮೂಲಕ ವಿಕಲ ಚೇತನ ಮತದಾರರು ಎಲ್ಲಿದ್ದಾರೆ? ಅವರ ಮತಗಟ್ಟೆ ಸಂಖ್ಯೆ ಯಾವುದು? ಮತದಾನ ಆಗಿದೆಯೇ ಇಲ್ಲವೇ ಎಂದು ಕುಳಿತಲ್ಲಿಯೇ ಅಧಿಕಾರಿಗಳು ಟ್ರ್ಯಾಕ್ ಮಾಡುತ್ತಿದ್ದಾರೆ.
ಬೆಳಿಗ್ಗೆ 10 ಗಂಟೆಯವರೆಗೆ 202 ಅಂಗವಿಕಲ ಮತದಾರರು ಮತದಾನ ಮಾಡಿದ್ದಾರೆ. ಇನ್ನೂ 1,822 ಮಂದಿ ಮತದಾನ ಮಾಡುವುದು ಬಾಕಿ ಇದೆ.
Click it and Unblock the Notifications
Sign in with Google