ಸಿದ್ದರಾಮಯ್ಯ, ಸಚಿವರ ಪ್ರಯಾಣ ಭತ್ಯೆ 11 ಕೋಟಿ!

By ವಿಕಾಸ್ ನಂಜಪ್ಪ

Updated: Wednesday, March 30, 2016, 18:54 [IST]

ಬೆಂಗಳೂರು, ಮಾರ್ಚ್ 30 : ಮುಖ್ಯಮಂತ್ರಿ ಸಿದ್ದರಾಮಯ್ಯ ಮತ್ತು ಸಂಪುಟದ ಇತರ ಸಚಿವರ ಪ್ರಯಾಣ ಭತ್ಯೆ ಮಾಹಿತಿ ಬಹಿರಂಗವಾಗಿದೆ. 2013 ರಿಂದ 2016ರ ತನಕ 11.12 ಕೋಟಿ ಪ್ರಯಾಣ ಭತ್ಯೆಯನ್ನು ಮುಖ್ಯಮಂತ್ರಿಗಳು ಮತ್ತು ಇತರ 29 ಸಚಿವರು ಪಡೆದಿದ್ದಾರೆ.

ಮಾಹಿತಿ ಹಕ್ಕು ಕಾರ್ಯಕರ್ತ ಭೀಮಪ್ಪ ಗಡಾದ್ ಅವರು ಸಲ್ಲಿಸಿದ್ದ ಅರ್ಜಿಯ ಮೂಲಕ ಈ ವಿವರ ಬಹಿರಂಗಗೊಂಡಿದೆ. ಕೆಲವು ಸಚಿವರ ಪ್ರಯಾಣ ಭತ್ಯೆ ಕುರಿತು ತನಿಖೆ ನಡೆಯಬೇಕು ಎಂದು ಭೀಮಪ್ಪ ಅವರು ಒತ್ತಾಯಿಸಿದ್ದಾರೆ.[ಶಾಸಕರ ಸಂಬಳ, ಭತ್ಯೆ ವಿವರಗಳು]

ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು 40.3 ಲಕ್ಷ ಭತ್ಯೆ ಪಡೆದಿದ್ದಾರೆ. ನಗರಾಭಿವೃದ್ಧಿ ಸಚಿವ ವಿನಯ್ ಕುಮಾರ್ ಸೊರಕೆ ಅವರು ಮೂರು ವರ್ಷಗಳಲ್ಲಿ 75.89 ಲಕ್ಷ ಭತ್ಯೆ ಪಡೆಯುವ ಮೂಲಕ ಸಂಪುಟದ ಸಚಿವರ ಪಟ್ಟಿಯಲ್ಲಿ ಮೊದಲ ಸ್ಥಾನದಲ್ಲಿದ್ದಾರೆ.

ಕ್ರೀಡಾ ಸಚಿವ ಅಭಯ್ ಚಂದ್ರ ಜೈನ್ ಅವರು ಕಳೆದ ಮೂರು ವರ್ಷಗಳಲ್ಲಿ 211 ಬಾರಿ ವಿಮಾನದಲ್ಲಿ ಪ್ರಯಾಣ ಮಾಡಿದ್ದಾರೆ ಎಂಬ ಮಾಹಿತಿಯೂ ಬಹಿರಂಗವಾಗಿದೆ. ಸಚಿವರ ಪ್ರಯಾಣ ಭತ್ಯೆಯ ವಿವರವನ್ನು ಸ್ಪೀಕರ್ ಕಾಗೋಡು ತಿಮ್ಮಪ್ಪ ಅವರ ಗಮನಕ್ಕೆ ತಂದು, ತನಿಖೆ ನಡೆಸಬೇಕು ಎಂದು ಭೀಮಪ್ಪ ಗಡಾದ್ ಒತ್ತಾಯಿಸಿದ್ದಾರೆ.

ಮುಖ್ಯಮಂತ್ರಿಗಳ ವೆಚ್ಚ 40.3 ಲಕ್ಷ

ಮುಖ್ಯಮಂತ್ರಿ ಸಿದ್ದರಾಮಯ್ಯ (ವರುಣಾ ಕ್ಷೇತ್ರದ ಶಾಸಕ) ಅವರು 2013 ರಿಂದ 2016ರ ತನಕ 40.3 ಲಕ್ಷ ಪ್ರಯಾಣ ಭತ್ಯೆಯನ್ನು ಪಡೆದಿದ್ದಾರೆ.

ಸಚಿವರ ಪಟ್ಟಿಯಲ್ಲಿ ಸೊರಕೆ ಮೊದಲ ಸ್ತಾನ

ಪ್ರಯಾಣ ಭತ್ಯೆ ಪಡೆದ ಸಚಿವರ ಪಟ್ಟಿಯಲ್ಲಿ ನಗರಾಭಿವೃದ್ಧಿ ಸಚಿವ ವಿನಯ್ ಕುಮಾರ್ ಸೊರಕೆ (ಕಾಪು ಕ್ಷೇತ್ರದ ಶಾಸಕ ) ಅವರು ಮೊದಲ ಸ್ಥಾನ ಪಡೆದಿದ್ದಾರೆ. ಸಚಿವರು ಮೂರು ವರ್ಷಗಳಲ್ಲಿ 75.89 ಲಕ್ಷ ಭತ್ಯೆ ಪಡೆದಿದ್ದಾರೆ.