ತೇಜಸ್ ಮಾದರಿ ರೈಲಿನ 6 ಕಾರಿಡಾರ್; ಕರ್ನಾಟಕದ ಒಂದು ರೈಲು
ಬೆಂಗಳೂರು, ಫೆಬ್ರವರಿ 01 : "ತೇಜಸ್ ಮಾದರಿಯ ನೂತನ ರೈಲುಗಳನ್ನು ಪರಿಚಯಿಸಲಾಗುತ್ತದೆ" ಎಂದು ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಹೇಳಿದರು. ಚೆನ್ನೈ-ಬೆಂಗಳೂರು-ಮೈಸೂರು ನಡುವಿನ ರೈಲು ಸಹ ಇದರಲ್ಲಿ ಸೇರಿದೆ.
ಶನಿವಾರ 2020ನೇ ಸಾಲಿನ ಬಜೆಟ್ ಮಂಡನೆ ಮಾಡಲಾಯಿತು. ಪ್ರತ್ಯೇಕ ರೈಲ್ವೆ ಬಜೆಟ್ ಮಂಡನೆ ಮಾಡುವ ಸಂಪ್ರದಾಯವನ್ನು ನಿಲ್ಲಿಸಲಾಗಿದ್ದು, ಮುಖ್ಯ ಬಜೆಟ್ನಲ್ಲಿಯೇ ರೈಲ್ವೆಯನ್ನು ಸೇರಿಸಿಕೊಳ್ಳಲಾಗಿದೆ. ಬಜೆಟ್ನಲ್ಲಿ ರೈಲ್ವೆ ಇಲಾಖೆಗೂ ಹಲವು ಕೊಡುಗೆಗಳನ್ನು ನೀಡಲಾಗಿದೆ.
" ಬೆಂಗಳೂರು ನಗರಕ್ಕೆ ಸಬ್ ಅರ್ಬನ್ ರೈಲು, ಪ್ರವಾಸಿ ಸ್ಥಳಗಳನ್ನು ಸಂಪರ್ಕಿಸಲು ತೇಜಸ್ ಮಾದರಿಯ ರೈಲುಗಳನ್ನು ಪರಿಚಯಿಸಲಾಗುತ್ತದೆ" ಎಂದು ನಿರ್ಮಲಾ ಸೀತಾರಾಮನ್ ಘೋಷಣೆ ಮಾಡಿದರು.
ಬುಲೆಟ್ ರೈಲು ಯೋಜನೆಯನ್ನು ಪೂರ್ಣಗೊಳಿಸಲು ಆದ್ಯತೆ ನೀಡುವುದಾಗಿ ಬಜೆಟ್ನಲ್ಲಿ ತಿಳಿಸಲಾಗಿದೆ. ಸೆಪ್ಟೆಂಬರ್ 14, 2017ರಲ್ಲಿ ಮುಂಬೈ-ಅಹಮದಾಬಾದ್ ನಡುವಿನ ಬುಲೆಟ್ ರೈಲು ಯೋಜನೆಗೆ ಶಂಕು ಸ್ಥಾಪನೆ ಮಾಡಲಾಗಿದೆ.
ಗಂಟೆಗೆ 350 ಕಿ. ಮೀ. ವೇಗದಲ್ಲಿ ಬುಲೆಟ್ ರೈಲು ಸಂಚಾರ ನಡೆಸಲಿದೆ. ಅಹಮದಾಬಾದ್-ಮುಂಬೈ ನಡುವಿನ 508 ಕಿ. ಮೀ.ಯನ್ನು ರೈಲು ಎರಡು ಗಂಟೆಗಳಲ್ಲಿ ಕ್ರಮಿಸಲಿದೆ. ಜಪಾನ್ ಜೊತೆಯಾಗಿ ಈ ಯೋಜನೆಯನ್ನು ಜಾರಿಗೊಳಿಸಲಾಗುತ್ತಿದೆ.
ರೈಲ್ವೆ ಇಲಾಖೆ ಹೈಸ್ಪೀಡ್ ಮತ್ತು ಸೆಮಿ ಹೈಸ್ಪೀಡ್ ಕಾರಿಡಾರ್ಗಳನ್ನು ನಿರ್ಮಾಣ ಮಾಡುವುದಾಗಿ ಘೋಷಣೆ ಮಾಡಿದೆ. ಇದಕ್ಕಾಗಿ ಆರು ಮಾರ್ಗಗಳನ್ನು ಗುರುತಿಸಲಾಗಿದೆ. ಇದರಲ್ಲಿ ಚೆನ್ನೈ-ಬೆಂಗಳೂರು-ಮೈಸೂರು (435 ಕಿ. ಮೀ.) ಮಾರ್ಗವೂ ಸೇರಿದೆ.
ಆರು ಕಾರಿಡಾರ್ಗಳು
* ದೆಹಲಿ-ನೋಯ್ಡಾ-ಆಗ್ರಾ-ಲಕ್ನೋ-ವಾರಣಾಸಿ (865 ಕಿ. ಮೀ)
* ದೆಹಲಿ-ಜೈಪುರ-ಉದಯ್ಪುರ-ಅಹಮದಾಬಾದ್ (886 ಕಿ. ಮೀ)
* ಮುಂಬೈ-ನಾಸಿಕ್-ನಾಗ್ಪುರ (753 ಕಿ. ಮೀ)
* ಮುಂಬೈ-ಪುಣೆ-ಹೈದರಾಬಾದ್ (711 ಕಿ. ಮೀ)
* ಚೆನ್ನೈ-ಬೆಂಗಳೂರು-ಮೈಸೂರು (435 ಕಿ. ಮೀ)
* ದೆಹಲಿ-ಚಂಡೀಗಢ-ಲೂಧಿಯಾನ-ಜಲಂಧರ್-ಅಮೃತಸರ (459 ಕಿ.ಮೀ)
Click it and Unblock the Notifications
Sign in with Google