ಮಲ್ಲೇಶ್ವರ ಸಾಯಿ ಜ್ಯೂಸ್ ಸೆಂಟರ್ ಮಾಲೀಕನ ದೇಶ ಪ್ರೇಮ ರೋಚಕ ಸ್ಟೋರಿ

ಬೆಂಗಳೂರು, ಫೆ. 04: ನಮ್ಮ ಸಾಯಿ ಜ್ಯೂಸ್ ಸೆಂಟರ್‌ನಲ್ಲಿ ಭಾರತೀಯ ಯೋಧರು ಯಾವುದೇ ಹಣ ಪಾವತಿ ಮಾಡಬೇಕಿಲ್ಲ!. ಮಲ್ಲೇಶ್ವರದ ಗ್ರೌಂಡ್ ಸಮೀಪ ಇರುವ ಸಾಯಿ ಜ್ಯೂಸ್ ಸೆಂಟರ್ ಮುಂದೆ ಇಂತದ್ದೊಂದು ನಾಮ ಫಲಕ ಹಾಕಲಾಗಿದೆ. ಕೊಡಗು ಮೂಲದ ಯುವಕ ಈ ಜ್ಯೂಸ್ ಸೆಂಟರ್ ಮಾಲೀಕ. ಭಾರತೀಯ ಯೋಧರು ಈ ಜ್ಯೂಸ್ ಸೆಂಟರ್‌ನಲ್ಲಿ ಜ್ಯೂಸ್ ಕುಡಿದರೂ, ಚಹಾ, ಕಾಫಿ ಕುಡಿದರೂ ಐದು ಪೈಸೆ ಕೂಡ ತೆಗೆದುಕೊಳ್ಳುವುದಿಲ್ಲ. ಭಾರತೀಯ ಯೋಧರಿಗೆ ಇಂತಹ ಆಫರ್ ಕೊಡುವ ಮೂಲಕ ಕೊಡಗು ಮೂಲದ ಸಾಯಿ ಜ್ಯೂಸ್ ಸೆಂಟರ್ ಮಾಲೀಕ ತನ್ನ ದೇಶ ಪ್ರೇಮ ಮೆರೆದಿದ್ದಾನೆ.

ಮಲ್ಲೇಶ್ವರದ ಕ್ರೀಡಾಂಗಣ ಎಡ ಭಾಗದಲ್ಲಿ ಇರುವ ಈ ಸಾಯಿ ಜ್ಯೂಸ್ ಸೆಂಟರ್ ತುಂಬಾ ಚಿಕ್ಕದು. ಎಷ್ಟೇ ವಹಿವಾಟು ನಡೆದರೂ ಒಂದು ಕುಟುಂಬ ಕನಿಷ್ಠ ಜೀವನ ನಡೆಸುವಷ್ಟು ವಹಿವಾಟು ನಡೆಯುತ್ತದೆ. ಅದರಲ್ಲೂ ಕೊರೊನಾ ಬಳಕ ಜ್ಯೂಸ್ ಸೆಂಟರ್‌ಗಳಿಗೆ ವ್ಯಾಪಾರವೇ ಇಲ್ಲ. ಹೀಗಾಗಿ ಜ್ಯೂಸ್ ಸೆಂಟರ್ ಇಟ್ಟುಕೊಂಡಿರುವರು ಸಂಕಷ್ಟ ಎದುರಿಸುತ್ತಿದ್ದಾರೆ. ಇರುವ ಅಲ್ಪದರಲ್ಲೇ ಭಾರತೀಯ ಯೋಧರು ಸಾಯಿ ಜ್ಯೂಸ್ ಸೆಂಟರ್‌ನಲ್ಲಿ ಏನೇ ತೆಗೆದುಕೊಂಡರೂ ಹಣ ಕೊಡಬೇಕಾಗಿಲ್ಲ. ಈ ಕುರಿತು ಅಧಿಕೃತ ಫಲಕವನ್ನೇ ಹಾಕಲಾಗಿದ್ದು, ಅಂಗಡಿಗೆ ಹೋಗುವವರ ಗಮನ ಸೆಳೆಯುತ್ತಿದೆ.

ಈ ಕುರಿತು ಸಾಯಿ ಜ್ಯೂಸ್ ಸೆಂಟರ್ ಮಾಲೀಕರನ್ನು ಒನ್ಇಂಡಿಯಾ ಕನ್ನಡ ಮಾತನಾಡಿಸಿದಾಗ, ನಾವು ಇಲ್ಲಿ ಸುಖವಾಗಿದ್ದೇವೆ. ಅದಕ್ಕೆ ಕಾರಣ ನಮ್ಮ ಭಾರತೀಯ ಯೋಧರು. ಈ ಸೆಂಟರ್ ನಾನು ಪಡೆದ ದಿನದಿಂದ ಭಾರತೀಯ ಯೋಧರು ಏನೇ ತೆಗೆದುಕೊಂಡರೂ ಉಚಿತ. ನಾನು ಅವರಿಂದ ಹಣ ಪಡೆಯುವುದಿಲ್ಲ. ನಮ್ಮ ದೇಶದ ಬಗ್ಗೆ ನಾವು ಅಭಿಮಾನ ಮೆರೆಯದಿದ್ದರೇ ಬೇರೆ ಯಾರು ಮೆರೆಯಬೇಕು? ಯೋಧರ ಮೇಲಿನ ಪ್ರೀತಿಯಿಂದ ಸಾಯಿ ಜ್ಯೂಸ್ ಸೆಂಟರ್ ನಲ್ಲಿ ಅವರು ನಮ್ಮ ಸೆಂಟರ್‌ನಲ್ಲಿ ಏನೇ ತೆಗೆದುಕೊಂಡರೂ ಹಣ ಪಡೆಯುವುದಿಲ್ಲ ಎಂದು ಸ್ಪಷ್ಟ ಪಡಿಸಿದರು.

ಕೊಡಗಿನ ಮೂಲದ ಸಾಯಿ ಜ್ಯೂಸ್ ಸೆಂಟರ್ ಮಾಲೀಕ ತನ್ನ ಹೆಸರು ಹೇಳಲು ಕೂಡ ನಿರಾಕರಿಸಿದರು. ನನ್ನ ಹೆಸರು ಏನಕ್ಕೆ ಬಿಡಿ. ನಾನು ಮಾಡಬೇಕು ಅಂದಿದ್ದನ್ನು ಮಾಡಿದ್ದೇನೆ. ಅದರಲ್ಲಿ ಏನೂ ವಿಶೇಷತೆ ಇಲ್ಲ ಎಂದು ನಗೆ ಬೀರಿದರು.

ನಿಮ್ಮದು ಪುಟ್ಟ ಜ್ಯೂಸ್ ಸೆಂಟರ್. ಇದರಲ್ಲಿ ಬರುವ ಹಣದಲ್ಲಿ ನೀವು ಜೀವನ ಮಾಡುವುದೇ ಕಷ್ಟ. ಅದರಲ್ಲಿಯೋಧರಿಗೆ ಉಚಿತ ಕೊಟ್ಟರೆ ಹೇಗೆ ಎಂದಾಗ, ಅಯ್ಯೋ ಯೋಧರ ಕಷ್ಟ, ತ್ಯಾಗದ ಮುಂದೆ ನಾವು ಶೂನ್ಯ ಅಲ್ಲವೇ ಎನ್ನುವ ಉತ್ತರ ಅವರಿಂದ ಬಂತು. ಅಂತೂ ಇರುವ ಅಲ್ಪದರಲ್ಲಿ ಯೋಧರ ಬಗ್ಗೆ ಅಭಿಮಾನ ಮೆರೆದು ಕೊಡಗು ಮೂಲದ ಈ ಯುವಕ ಮಾದರಿ ಎನಿಸಿದ್ದಾರೆ.

English summary

Kodagu based sai juice center owner Patriotism story: Whatever Indian Soldiers take in this shop is free know more :