ಕುತ್ತಿಗೆ ಸೀಳಿ ಬೈಕ್ ಸವಾರನ ಜೀವ ತೆಗೆದ ಗಾಳಿಪಟದ ದಾರ

ಬೀದರ್‌: ಕರ್ನಾಟಕದಲ್ಲಿ ಗಾಳಿಪಟದ ದಾರದಿಂದಾಗುವ ಅಪಾಯಗಳ ಬಗ್ಗೆ ಇತ್ತೀಚೆಗೆ ಭಾರೀ ಚರ್ಚೆಗಳು ನಡೆಯುತ್ತಿವೆ. ಇದರ ನಡುವೆ ಮತ್ತೊಂದು ಭೀಕರ ಘಟನೆ ನಡೆದುಹೋಗಿದೆ. ಬೀದರ್‌ ಜಿಲ್ಲೆಯ ತಲಮಡಗಿ ಸೇತುವೆ ಸಮೀಪ ನಡೆದ ದಾರುಣ ಘಟನೆಯಲ್ಲಿ, ದ್ವಿಚಕ್ರ ವಾಹನ ಸವಾರ ಗಾಳಿಪಟದ ದಾರ ತಗುಲಿ ಗಂಭೀರವಾಗಿ ಗಾಯಗೊಂಡು ಕೊನೆಯುಸಿರೆಳೆದಿದ್ದಾರೆ.

ಮೃತರನ್ನು 48 ವರ್ಷದ ಸಂಜುಕುಮಾರ್ ಹೊಸಮನಿ ಎಂದು ಗುರುತಿಸಲಾಗಿದೆ. ಘಟನೆ ವೇಳೆ ಸಂಜುಕುಮಾರ್ ತಮ್ಮ ದ್ವಿಚಕ್ರ ವಾಹನದಲ್ಲಿ ಸಂಚರಿಸುತ್ತಿದ್ದಾಗ, ರಸ್ತೆಯ ಮಧ್ಯೆ ಎಳೆದಿಟ್ಟಿದ್ದ ಗಾಳಿಪಟದ ದಾರ ಏಕಾಏಕಿ ಕುತ್ತಿಗೆಗೆ ಸಿಕ್ಕಿದ್ದು, ಆಳವಾದ ಗಾಯ ಉಂಟಾಗಿದೆ. ಇದರಿಂದಾಗಿ ಅವರು ತೀವ್ರ ರಕ್ತಸ್ರಾವಕ್ಕೆ ಒಳಗಾದರು.

ಗಂಭೀರ ಗಾಯಗೊಂಡ ಸಂಜುಕುಮಾರ್ ಬೈಕ್‌ನಿಂದ ಕೆಳಗೆ ಬಿದ್ದು, ಸಾವುಬದುಕಿನ ಸ್ಥಿತಿಯಲ್ಲಿದ್ದರು. ತೀವ್ರ ರಕ್ತಸ್ರಾವದಲ್ಲೂ ಅವರು ತಮ್ಮ ಮಗಳ ಮೊಬೈಲ್‌ ಸಂಖ್ಯೆಗೆ ಕರೆ ಮಾಡಲು ಪ್ರಯತ್ನಿಸಿದ ಕ್ಷಣಗಳು ವಿಡಿಯೋದಲ್ಲಿ ಸೆರೆಯಾಗಿದ್ದು, ಇದು ನೋಡುಗರ ಮನ ಕಲಕುವಂತಿದೆ. ಈ ದೃಶ್ಯಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್‌ ಆಗಿ ತೀವ್ರ ಆಘಾತ ಉಂಟುಮಾಡಿವೆ.

ಸಮಯಕ್ಕೆ ಬಾರದ ಆಂಬುಲೆನ್ಸ್‌

ಈ ಘಟನೆಯನ್ನು ಗಮನಿಸಿದ ಸ್ಥಳೀಯರು ತಕ್ಷಣವೇ ಅವರ ಸಹಾಯಕ್ಕೆ ಧಾವಿಸಿದ್ದಾರೆ. ಗಾಯದ ಮೇಲೆ ಬಟ್ಟೆ ಇಟ್ಟು ರಕ್ತಸ್ರಾವ ತಡೆಯಲು ಪ್ರಯತ್ನಿಸಿದ್ದಾರೆ. ಸ್ಥಳೀಯರು ಕೂಡಲೇ ಆಂಬ್ಯುಲೆನ್ಸ್‌ಗೆ ಕರೆ ಮಾಡಿದರೂ, ಆಂಬ್ಯುಲೆನ್ಸ್‌ ತಡವಾಗಿ ಬಂದಿತು ಎನ್ನಲಾಗುತ್ತಿದೆ. ದುರದೃಷ್ಟವಶಾತ್, ವೈದ್ಯಕೀಯ ನೆರವು ಸಿಗುವಷ್ಟರಲ್ಲಿ ಸಂಜುಕುಮಾರ್ ಕೊನೆಯುಸಿರೆಳೆದಿದ್ದಾರೆ.

ಈ ಘಟನೆಗೆ ಸಂಬಂಧಿಸಿದಂತೆ ಮೃತರ ಕುಟುಂಬಸ್ಥರು ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದು, ಆಂಬ್ಯುಲೆನ್ಸ್‌ ಸಮಯಕ್ಕೆ ಬಂದಿದ್ದರೆ, ಅವರ ಜೀವ ಉಳಿಯಬಹುದಿತ್ತು ಎಂದು ಗೋಳಾಡಿದ್ದಾರೆ. ತುರ್ತು ಸೇವೆಗಳ ವಿಳಂಬವೇ ಸಾವು ಸಂಭವಿಸಲು ಪ್ರಮುಖ ಕಾರಣವಾಗಿದೆ ಎಂಬುದು ಅವರ ಅಸಮಾಧಾನ. ಈ ಪ್ರಕರಣಕ್ಕೆ ಸಂಬಂಧಿಸಿ ಸ್ಥಳೀಯ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಿಸಲಾಗಿದ್ದು, ತನಿಖೆ ಪ್ರಗತಿಯಲ್ಲಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. ಗಾಳಿಪಟದ ದಾರ ಹೇಗೆ ರಸ್ತೆಯಲ್ಲಿ ಎಳೆದಿತ್ತು, ಇದಕ್ಕೆ ಹೊಣೆಗಾರರು ಯಾರು ಎಂಬುದರ ಬಗ್ಗೆ ಪರಿಶೀಲನೆ ನಡೆಸುತ್ತಿದ್ದಾರೆ.

ಗಾಳಿಪಟ ದಾರಗಳ ಮೇಲೆ ನಿಷೇಧ ಹೇರಿ

ಘಟನೆಯ ನಂತರ ಮೃತ ಸಂಜುಕುಮಾರ್ ಹೊಸಮನಿ ಅವರ ಕುಟುಂಬಸ್ಥರು ಹಾಗೂ ಸ್ಥಳೀಯರು ಅಪಘಾತ ನಡೆದ ಸ್ಥಳದಲ್ಲೇ ಪ್ರತಿಭಟನೆ ನಡೆಸಿದರು. ನೈಲಾನ್ ಗಾಳಿಪಟದ ದಾರಗಳ ಬಳಕೆಯ ಮೇಲೆ ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳಬೇಕು ಹಾಗೂ ತುರ್ತು ವೈದ್ಯಕೀಯ ಸೇವೆಗಳನ್ನು ಸುಧಾರಿಸಬೇಕು ಎಂದು ಅವರು ಆಗ್ರಹಿಸಿದರು. ಅಪಾಯಕಾರಿ ದಾರಗಳ ಕಾರಣದಿಂದ ಜೀವಗಳು ಕಳೆದುಕೊಳ್ಳುತ್ತಿರುವುದನ್ನು ಇನ್ನು ಮುಂದೆ ಸಹಿಸಲಾಗುವುದಿಲ್ಲ ಎಂದು ಆಕ್ರೋಶ ಹೊರಹಾಕಿದರು.

ಈ ದಾರುಣ ಘಟನೆಯು ಗಾಳಿಪಟ ಹಾರಿಸುವ ಸಂದರ್ಭದಲ್ಲಿ ಬಳಸುವ ಅಪಾಯಕಾರಿ ದಾರಗಳ ಹಾವಳಿ ಮತ್ತೆ ಚರ್ಚೆಗೆ ತಂದಿದ್ದು, ಇಂತಹ ದಾರಗಳಿಂದ ಪಾದಚಾರಿಗಳು, ವಾಹನ ಸವಾರರು ಮಾತ್ರವಲ್ಲದೆ, ಪಕ್ಷಿಗಳಿಗೂ ಅಪಾಯ ಉಂಟಾಗುತ್ತಿದೆ. ಸಾರ್ವಜನಿಕ ಸುರಕ್ಷತೆಯ ದೃಷ್ಟಿಯಿಂದ ಅಪಾಯಕಾರಿ ಗಾಳಿಪಟದ ದಾರಗಳ ಮೇಲೆ ಕಟ್ಟುನಿಟ್ಟಿನ ನಿಷೇಧ ಮತ್ತು ನಿಯಂತ್ರಣ ಅಗತ್ಯ ಎಂಬ ಆಗ್ರಹ ಕೇಳಿಬರುತ್ತಿದೆ. ಸಂಜುಕುಮಾರ್ ಹೊಸಮನಿ ಅವರ ಅಕಾಲಿಕ ಸಾವು, ಗಾಳಿಪಟದ ದಾರದ ಅಪಾಯವನ್ನು ಗಂಭೀರವಾಗಿ ಪರಿಗಣಿಸಬೇಕೆಂಬ ಎಚ್ಚರಿಕೆಯಾಗಿ ಪರಿಣಮಿಸಿದೆ.

English summary

A tragic incident in Bidar district where a bike rider lost his life after a kite string got stuck around his neck near Talamadagi bridge. The shocking visuals have gone viral, raising concerns over deadly kite strings.