ಶೈಕ್ಷಣಿಕ ವರ್ಷ ಆರಂಭವಾದ್ರೂ ಶಾಲೆಗಳಿಗೆ ತಲುಪಿಲ್ಲ ಬುಕ್ಸ್: ಇನ್ನೂ ಶೇ.15 ರಷ್ಟು ಪಠ್ಯಪುಸ್ತಕ ಮುದ್ರಣ ಬಾಕಿ

Updated: Thursday, May 28, 2026, 11:52 [IST]

ಬೆಂಗಳೂರು: ರಾಜ್ಯದಲ್ಲಿ ನಾಳೆಯಿಂದ (ಮೇ 29) 2026-27ನೇ ಸಾಲಿನ ನೂತನ ಶೈಕ್ಷಣಿಕ ವರ್ಷ ಅಧಿಕೃತವಾಗಿ ಆರಂಭವಾಗುತ್ತಿದೆ. ಆದರೆ, ಶಾಲೆಗಳು ಪುನರಾರಂಭಗೊಳ್ಳಲು ಇನ್ನು ಕೇವಲ ಕೆಲವೇ ದಿನಗಳು ಬಾಕಿ ಉಳಿದಿದ್ದರೂ, ಈ ಬಾರಿಯೂ ಸಹ ವಿದ್ಯಾರ್ಥಿಗಳ ಕೈಗೆ ನಿಗದಿತ ಸಮಯಕ್ಕೆ ಪಠ್ಯಪುಸ್ತಕಗಳು ತಲುಪುವುದು ಅನುಮಾನವಾಗಿದೆ. ವರದಿಗಳ ಪ್ರಕಾರ ಈ ಬಾರಿಯ ಒಟ್ಟು ಬೇಡಿಕೆಯಲ್ಲಿ ಇನ್ನೂ ಶೇ. 15ರಷ್ಟು ಪಠ್ಯಪುಸ್ತಕಗಳ ಮುದ್ರಣ ಕಾರ್ಯ ಬಾಕಿಯ ಉಳಿದಿದೆ. ಗೋದಾಮುಗಳಿಂದ ಶಾಲೆಗಳಿಗೆ ಪುಸ್ತಕಗಳು ಸಕಾಲದಲ್ಲಿ ತಲುಪದ ಕಾರಣ ಪೋಷಕರು ಮತ್ತು ವಿದ್ಯಾರ್ಥಿಗಳಲ್ಲಿ ಆತಂಕ ಮೂಡಿಸಿದೆ.

ರಾಜ್ಯದ ಸುಮಾರು 46,000 ಸರ್ಕಾರಿ ಶಾಲೆಗಳು, 1,300ಕ್ಕೂ ಹೆಚ್ಚು ಸರ್ಕಾರಿ ಪದವಿ ಪೂರ್ವ ಕಾಲೇಜುಗಳು ಹಾಗೂ ಅನುದಾನಿತ ಶಾಲೆಗಳು ಸೇರಿದಂತೆ ಒಟ್ಟು 6,74,58,588 ಪಠ್ಯಪುಸ್ತಕಗಳಿಗೆ ಈ ಬಾರಿ ಬೇಡಿಕೆ ಸಲ್ಲಿಕೆಯಾಗಿತ್ತು. ಕಳೆದ ವರ್ಷ ಬಾಕಿ ಉಳಿದಿದ್ದ 9.78 ಲಕ್ಷ ಪುಸ್ತಕಗಳನ್ನು ಹೊರತುಪಡಿಸಿ, ಉಳಿದ ಪಠ್ಯಪುಸ್ತಕಗಳನ್ನು ಮುದ್ರಿಸಲಾಗುತ್ತಿದೆ. ಸರ್ಕಾರವು ಪಠ್ಯಪುಸ್ತಕಗಳ ವಿತರಣೆಗಾಗಿ ಒಟ್ಟು 264.62 ಕೋಟಿ ರೂಪಾಯಿಗಳ ಅನುದಾನವನ್ನು ಮಂಜೂರು ಮಾಡಿದೆ.

ಸಾಮಾನ್ಯವಾಗಿ ಮುದ್ರಣಕ್ಕೆ ಅನುಮೋದನೆ ಡಿಸೆಂಬರ್‌ನಲ್ಲಿ ಸಿಗುತ್ತದೆ. ಆದರೆ ಈ ವರ್ಷ ಫೆಬ್ರವರಿಯಲ್ಲಿ ಬಂದಿದೆ. ತಡವಾಗಿ ಅನುಮೋದನೆ ಸಿಕ್ಕಿದ್ದರಿಂದ ಮುದ್ರಣ ಕಾರ್ಯ ವಿಳಂಬವಾಗಿದೆ. ರಾಜ್ಯಾದ್ಯಂತ 22 ಮುದ್ರಕರಿಗೆ ಟೆಂಡರ್‌ಗಳನ್ನು ನೀಡಲಾಗಿದೆ. ಒಟ್ಟು ಆರ್ಡರ್‌ನ ಸುಮಾರು 85% ರಷ್ಟು ಮುದ್ರಣವಾಗಿದೆ ಎಂದು ಅಧಿಕಾರಿಗಳು ಹೇಳಿದ್ದಾರೆ. ಉಚಿತ ಪಿಯುಸಿ ಪಠ್ಯಪುಸ್ತಕಗಳ ಯೋಜನೆಯೂ ವಿಳಂಬವಾಗಿದೆ.

ಆದರೆ, ಪ್ರತಿವರ್ಷ ಡಿಸೆಂಬರ್ ತಿಂಗಳಿನಲ್ಲಿ ಸಿಗಬೇಕಿದ್ದ ಮುದ್ರಣದ ಅನುಮೋದನೆಯು ಈ ಬಾರಿ ತಡವಾಗಿ, ಅಂದರೆ ಫೆಬ್ರವರಿಯಲ್ಲಿ ಸಿಕ್ಕಿದ್ದರಿಂದ ಮುದ್ರಣ ಪ್ರಕ್ರಿಯೆಯು ತಡವಾಗಿ ಆರಂಭಗೊಂಡಿದೆ. ಒಟ್ಟು 22 ಮುದ್ರಕರಿಗೆ ಇದರ ಟೆಂಡರ್ ನೀಡಲಾಗಿದ್ದು, ಪ್ರಸ್ತುತ ಶೇ. 85ರಷ್ಟು ಮುದ್ರಣ ಕಾರ್ಯ ಮಾತ್ರ ಪೂರ್ಣಗೊಂಡಿದೆ.

ವಿಷಯ	ಸಂಖ್ಯೆ
ಆರ್ಡರ್ ಮಾಡಿದ ಒಟ್ಟು ಪಠ್ಯಪುಸ್ತಕಗಳು	6,74,58,588
2025-26 ರಿಂದ ಉಳಿದಿರುವ ಪುಸ್ತಕಗಳು	9.78 ಲಕ್ಷ
ಸರ್ಕಾರಿ ಶಾಲೆಗಳು	ಸುಮಾರು 46,000
ಸರ್ಕಾರಿ ಪದವಿ ಪೂರ್ವ ಕಾಲೇಜುಗಳು	1,300+
ಅನುದಾನಿತ ಪಿಯುಸಿ ಕಾಲೇಜುಗಳು	815
ನಿಯೋಜಿಸಲಾದ ಮುದ್ರಕರು	22

ವಿಳಂಬವಾದರೆ ಮುದ್ರಕರಿಗೆ ದಂಡದ ಎಚ್ಚರಿಕೆ

ಶೈಕ್ಷಣಿಕ ವರ್ಷದ ಆರಂಭದಲ್ಲೇ ವಿದ್ಯಾರ್ಥಿಗಳಿಗೆ ಪುಸ್ತಕಗಳನ್ನು ತಲುಪಿಸಬೇಕೆಂದು ಮುದ್ರಕರಿಗೆ ಕಟ್ಟುನಿಟ್ಟಿನ ಸೂಚನೆ ನೀಡಲಾಗಿದೆ. ಒಂದು ವೇಳೆ ಪೂರೈಕೆ ವಿಳಂಬವಾದರೆ ಕಾನೂನಾತ್ಮಕ ಕ್ರಮ ಕೈಗೊಳ್ಳುವುದರ ಜೊತೆಗೆ, ಮುದ್ರಕರಿಗೆ ಭಾರಿ ದಂಡ ವಿಧಿಸಲು ಕರ್ನಾಟಕ ಪಠ್ಯಪುಸ್ತಕ ಸಂಘ ಸಜ್ಜಾಗಿದೆ.

ಪುಸ್ತಕಗಳನ್ನು ತಾಲೂಕು ಗೋದಾಮುಗಳಿಗೆ ತಲುಪಿಸಿ, ಅಲ್ಲಿಂದ ಪ್ರತಿ ಸರ್ಕಾರಿ ಶಾಲೆಗೆ ಸರಬರಾಜು ಮಾಡಲು ಕನಿಷ್ಠ ಒಂದು ತಿಂಗಳ ಕಾಲಾವಕಾಶ ಬೇಕಾಗುತ್ತದೆ. ಶಾಲೆಗಳಲ್ಲಿನ ವಿದ್ಯಾರ್ಥಿಗಳ ಸಂಖ್ಯೆಗೆ ಅನುಗುಣವಾಗಿ ಮುಖ್ಯ ಶಿಕ್ಷಕರ ಬ್ಯಾಂಕ್ ಖಾತೆಗೆ ನೇರವಾಗಿ ಡಿಬಿಟಿ (DBT) ಮೂಲಕ ಸಾಗಾಣಿಕೆ ವೆಚ್ಚವನ್ನು ಪಾವತಿಸಲಾಗುತ್ತಿದೆ. ಆದಾಗ್ಯೂ, ಇಡೀ ಶಾಲೆಯ ಎಲ್ಲಾ ವಿದ್ಯಾರ್ಥಿಗಳಿಗೆ ಸಂಪೂರ್ಣ ಪುಸ್ತಕಗಳು ತಲುಪಲು ಕನಿಷ್ಠ 1 ರಿಂದ 2 ತಿಂಗಳುಗಳ ಅಗತ್ಯವಿದೆ ಎಂದು ವರದಿಯಾಗಿದೆ.

ಪಿಯುಸಿ ಉಚಿತ ಪುಸ್ತಕ ಪೂರೈಕೆಯೂ ವಿಳಂಬ

ಸರ್ಕಾರವು ಈ ಶೈಕ್ಷಣಿಕ ವರ್ಷದಿಂದ ಪ್ರಥಮ ಮತ್ತು ದ್ವಿತೀಯ ಪಿಯುಸಿ ವಿದ್ಯಾರ್ಥಿಗಳಿಗೂ ಉಚಿತ ಪಠ್ಯಪುಸ್ತಕ ಪೂರೈಕೆ ಮಾಡಲು ಮುಂದಾಗಿತ್ತು. ಆದರೆ, ಮೇ 18ರಂದು ಪಠ್ಯಪುಸ್ತಕ ಸಂಘ ಹೊರಡಿಸಿರುವ ಸುತ್ತೋಲೆಯಲ್ಲಿ ಕೇವಲ 1ರಿಂದ 10ನೇ ತರಗತಿಯವರೆಗಿನ ಮುದ್ರಣ ಮಾಹಿತಿಯನ್ನು ಮಾತ್ರ ನೀಡಲಾಗಿದೆ.

ರಾಜ್ಯದಲ್ಲಿರುವ 1,319 ಸರ್ಕಾರಿ ಪದವಿ ಪೂರ್ವ ಕಾಲೇಜುಗಳು ಹಾಗೂ 815 ಅನುದಾನಿತ ಪಿಯು ಕಾಲೇಜುಗಳ ಕಲಾ, ವಿಜ್ಞಾನ ಮತ್ತು ವಾಣಿಜ್ಯ ವಿಭಾಗಗಳ ಒಟ್ಟು 34 ವಿಷಯಗಳ ಪುಸ್ತಕಗಳನ್ನು ಮುದ್ರಿಸಬೇಕಿದೆ. ಆದರೆ ಪಿಯು ತರಗತಿಗಳು ಆರಂಭವಾಗುವ ವೇಳೆಗೆ ಈ ಪುಸ್ತಕಗಳು ಮುದ್ರಣಗೊಂಡು ವಿದ್ಯಾರ್ಥಿಗಳ ಕೈಸೇರುವುದು ಕಷ್ಟ.

ಈ ಕುರಿತು ಪ್ರತಿಕ್ರಿಯಿಸಿರುವ ಶಾಲಾ ಶಿಕ್ಷಣ ಇಲಾಖೆಯ ಆಯುಕ್ತರಾದ ಸುರಳ್ಕರ್ ವಿಕಾಸ್ ಕಿಶೋರ್ ಅವರು, ನೂತನ ಶೈಕ್ಷಣಿಕ ವರ್ಷಕ್ಕೆ ಬೇಕಾದ ಪುಸ್ತಕಗಳು ಮುದ್ರಣವಾಗುತ್ತಿದ್ದು, ಸಕಾಲದಲ್ಲಿ ಪೂರೈಸಲು ಅಗತ್ಯ ಕ್ರಮಗಳನ್ನು ಕೈಗೊಳ್ಳಲಾಗಿದೆ ಎಂದಿದ್ದಾರೆ. ಹಾಗೆಯೇ ಪಠ್ಯಪುಸ್ತಕ ಸಂಘದ ವ್ಯವಸ್ಥಾಪಕ ನಿರ್ದೇಶಕರಾದ ಎಂ.ಪಿ. ಮಾದೇಗೌಡ ಅವರು, ಶೇ. 85ರಷ್ಟು ಮುದ್ರಣ ಮುಗಿದಿದ್ದು, ಅನುದಾನರಹಿತ ಶಾಲೆಗಳಿಗೆ ಶೇ. 25ರಷ್ಟು ಮುಂಗಡ ಹಣ ಪಾವತಿಗೆ ಸೂಚಿಸಲಾಗಿದೆ ಎಂದು ಮಾಹಿತಿ ನೀಡಿದ್ದಾರೆ.