ಇನ್ಮುಂದೆ ಹೈವೇ ರಸ್ತೆ ಮಧ್ಯೆ ಮದ್ಯ ಸಿಗೋಲ್ಲಾರೀ

ಬೆಂಗಳೂರು, ಡಿ.19: ಅಪಘಾತಕ್ಕೆ ಅವರಸವಷ್ಟೇ ಕಾರಣ ಅಲ್ಲ... ಮತ್ತೊಂದೂ ಇದೆ. ಅದೇ ಎಣ್ಣೆಯ ಗಮ್ಮತ್ತು. ಅಂದರೆ ಮದ್ಯಪಾನ ಮಾಡಿ ವಾಹನ ಚಲಾಯಿಸುವುದು ಅಪಘಾತಕ್ಕೆ ಸೋಪಾನ. ಹಾಗಾಗಿ ಸರಕಾರ ಕೊನೆಗೂ drink n drive ಪ್ರಕರಣಗಳನ್ನು ಗಂಭೀರವಾಗಿ ಪರಿಗಣಿಸಿದೆ. ಆದರೆ ಅದು ಹೆದ್ದಾರಿ ವ್ಯಾಪ್ತಿಗೆ ಬರುತ್ತದೆ.

ಆದರೆ ಇದನ್ನು ತಡೆಗಟ್ಟಲು ಸರಕಾರವು ಮೂಲಕ್ಕೇ ಕೊಡಲಿ ಪೆಟ್ಟು ಹಾಕಿದ್ದು, ಹೆದ್ದಾರಿಗಳಲ್ಲಿ ಮದ್ಯ ಮಾರಾಟವನ್ನು ನಿಷೇಧಿಸುವುದಕ್ಕೆ ಮುಂದಾಗಿದೆ. ಆದರೆ ಇದು ಮುಂದಿನ ಜೂನ್ ತಿಂಗಳಿಂದ ಜಾರಿಗೆ ಬರಲಿದ್ದು, ಅಲ್ಲಿಯವರೆಗೂ ಸಾವಕಾಶವಾಗಿ/ ನಿರಾಂತಕವಾಗಿ ಹೆದ್ದಾರಿ ಸವಾರರು ಮದ್ಯ ಸೇವನೆಯನ್ನು ಅಬಾಧಿತವಾಗಿ ಮುಂದುವರಿಸಬಹುದಾಗಿದೆ.

ತಕ್ಷಣಕ್ಕೆ ಹೆದ್ದಾರಿಗಳಲ್ಲಿರುವ ಮದ್ಯದಂಗಡಿಗಳನ್ನು ಮುಚ್ಚಿಸಲಾಗುವುದಿಲ್ಲ. ಸ್ವಲ್ಪ ಸಮಯ ನೀಡಿ, ಲೈಸೆನ್ಸ್ ನವೀಕರಿಸದಂತೆ ಕೋರಿ ಅಬಕಾರಿ ಇಲಾಖೆಗೆ ಪತ್ರ ಬರೆಯುವುದಾಗಿ ಸಾರಿಗೆ ಇಲಾಖೆ ಅಧಿಕಾರಿಗಳು ತಿಳಿಸಿದ್ದಾರೆ. ಸಾರಿಗೆ ಸಚಿವ ರಾಮಲಿಂಗಾರೆಡ್ಡಿ ಅವರ ಅಧ್ಯಕ್ಷತೆಯಲ್ಲಿ ನಡೆದ ರಸ್ತೆ ಸುರಕ್ಷತಾ ಸಮಿತಿಯ ಸಭೆಯಲ್ಲಿ ಈ ಬಗ್ಗೆ ಮಂತ್ರಾಲೋಚನೆ ನಡೆಸಲಾಗಿದೆ. ಮುಖ್ಯವಾಗಿ ಲಾರಿ ಮಾಲೀಕರುಗಳ ಒಕ್ಕೂಟವೂ ಈ ಪ್ರಸ್ತಾವನೆಗೆ ಅಂಕಿತವಾಗಿದೆ.

ಈ ಮಧ್ಯೆ ಆಟೋ ರಿಕ್ಷಾಗಳ ಬದಲಿಗೆ ನ್ಯಾನೋ ಕಾರಿನಂತಹ ಸಣ್ಣ ಕಾರುಗಳ ಬಳಕೆ ಬಗ್ಗೆಯೂ ಮಂತ್ರಾಲೋಚನೆ ನಡೆದಿದೆ. ಆದರೆ ಈ ಹಿಂದಿನ ಸರಕಾರವೂ ಈ ಪ್ರಸ್ತಾವನೆ ಬಗ್ಗೆ ಆಲೋಚನೆ ನಡೆಸಿತ್ತು.

English summary

To reduce accidents, Karnataka govt planning to ban sale of liquor along highways. Admitting that liquor shops along highways were a big reason for accidents caused by drunk drivers, the transport department will write to the excise department against renewing licences of liquor joints in June next year.