ಕೊರೊನಾ; ಮಸೀದಿಗಳಲ್ಲಿ ಪ್ರಾರ್ಥನೆಯ ಅವಧಿ 15 ನಿಮಿಷ ಮಾತ್ರ

ಬೆಂಗಳೂರು, ಮಾರ್ಚ್ 18: ಕೊರೊನಾ ಸೋಂಕು ವ್ಯಾಪಕವಾಗಿ ಹರಡುತ್ತಿರುವ ಹಿನ್ನೆಲೆಯಲ್ಲಿ ಕರ್ನಾಟಕ ವಕ್ಫ್‌ ಮಂಡಳಿ ಮಹತ್ವದ ನಿರ್ಧಾರ ತೆಗೆದುಕೊಂಡಿದೆ. ಮಸೀದಿಗಳಲ್ಲಿ ಪ್ರಾರ್ಥನೆಯ ಅವಧಿಯನ್ನು 15 ನಿಮಿಷಕ್ಕೆ ಕಡಿತಗೊಳಿಸಿ ಆದೇಶ ಹೊರಡಿಸಿದೆ.

ಉಸಿರಾಟದ ತೊಂದರೆ ಎದುರಿಸುತ್ತಿರುವ ವ್ಯಕ್ತಿಗಳು ಮಸೀದಿ, ಮದರಸ, ದರ್ಗಾಗಳತ್ತ ಸುಳಿಯದೆ ಮನೆಗಳಲ್ಲೇ ಪ್ರಾರ್ಥನೆ ಸಲ್ಲಿಸಬೇಕೆಂದು ಕೂಡ ಮನವಿ ಮಾಡಿದೆ.

ಕೊರೊನಾ ಸೋಂಕು ಹಿನ್ನೆಲೆಯಲ್ಲಿ ಬುಧವಾರ ನಡೆದ ಕರ್ನಾಟಕ ವಕ್ಫ್‌ ಮಂಡಳಿ ಉನ್ನತ ಮಟ್ಟದ ಸಭೆಯಲ್ಲಿ ಮುಂಜಾಗ್ರತ ಕ್ರಮಗಳನ್ನು ತೆಗೆದುಕೊಳ್ಳಲು ಸೂಚಿಸಲಾಗಿದೆ. ಸೋಂಕು ಹರಡದಂತೆ ಮಸೀದಿ, ದರ್ಗಾ ಹಾಗೂ ಇತರೆ ಧಾರ್ಮಿಕ ಸಂಸ್ಥೆಗಳಲ್ಲಿ ಸ್ವಚ್ಛತೆ ಕಾಪಾಡುವುದು ಸೇರಿದಂತೆ ಹಲವು ಮುಂಜಾಗ್ರತ ಕ್ರಮಗಳಿಗೂ ರಾಜ್ಯ ವಕ್ಫ್‌ ಮಂಡಲಿ ಸೂಚಿಸಿದೆ.

ಮುಂದಿನ ಮೂರು ವಾರಗಳ ಕಾಲ ಮಸೀದಿಯಲ್ಲಿ ಪ್ರಾರ್ಥನೆಯ ಅವಧಿ ಕೇವಲ 15 ನಿಮಿಷಕ್ಕೆ ಸೀಮಿತ. ಪ್ರಾರ್ಥನೆಗೆ ಸಾರ್ವಜನಿಕ ಮೈಕ್‌ ಬಳಸದಂತೆ ಸೂಚನೆ., ಮಸೀದಿ ಹಾಗೂ ಸುತ್ತಮುತ್ತಲಿನ ಪ್ರದೇಶದಲ್ಲಿ ಸ್ವಚ್ಛತೆ ಕಾಪಾಡುವುದು, ಕಾರ್ಪೆಟ್‌, ಪ್ರಾರ್ಥನೆ ಮ್ಯಾಟ್‌ಗಳನ್ನು ಸ್ವಚ್ಚವಾಗಿಡುವುದು, ಮಸೀದಿಗಳಲ್ಲಿನ ಶೌಚಾಲಯ, ಮೂತ್ರಾಲಯಗಳನ್ನು ಸ್ವಚ್ಚವಾಗಿಡಲು ನಿತ್ಯ ತೊಳೆಯುವುದು, ನಿತ್ಯ ಪ್ರಾರ್ಥನೆಗಾಗಿ ಆಗಮಿಸುವ ಮುಸ್ಲಿಮರಿಗೆ ಮನೆಯಲ್ಲೇ ಪ್ರಾರ್ಥನೆ ಸಲ್ಲಿಸುವಂತೆ ಸೂಚಿಸುವುದು ಜತೆಗೆ ತಮ್ಮದೇ ಪ್ರಾರ್ಥನೆ ಕ್ಯಾಪ್‌ ಬಳಸಬೇಕು, ಮಸೀದಿಗಳಲ್ಲಿರುವ ಟವಲ್‌ಗಳು ಹಾಗೂ ಪ್ರಾರ್ಥನೆ ಕ್ಯಾಪ್‌ಗಳನ್ನು ತೆರವುಗೊಳಿಸುವ ನಿಯಮಗಳನ್ನು ಸೂಚಿಸಿದೆ

English summary

Corona; The Prayer Period In The Mosques Is Only 15 Minutes. Karnataka Wakf Board Orders It.