ಕೊರೊನಾ ವೈರಸ್ ಸೋಂಕಿನ 'ಎರಡನೇ ಅಲೆ' ಬಗ್ಗೆ WHO ನೀಡಿದ ವಾರ್ನಿಂಗ್ ಏನು?

ಜೆನೆವಾ, ಮೇ 26: ವಿಶ್ವದಾದ್ಯಂತ ಇಲ್ಲಿಯವರೆಗೂ 55,90,517 ಮಂದಿಗೆ ಕೊರೊನಾ ವೈರಸ್ ಸೋಂಕು ತಗುಲಿದೆ. ಡೆಡ್ಲಿ ಕೋವಿಡ್-19 ಗೆ ಈವರೆಗೂ 3,47,916 ಮಂದಿ ಜೀವ ಕಳೆದುಕೊಂಡಿದ್ದಾರೆ. ಸದ್ಯ 53,166 ಜನರ ಆರೋಗ್ಯ ಸ್ಥಿತಿ ಚಿಂತಾಜನಕವಾಗಿದೆ.

ದಿನೇ ದಿನೇ ಕೊರೊನಾ ವೈರಸ್ ಸೋಂಕಿತರ ಸಂಖ್ಯೆ ಮತ್ತು ಸಾವಿನ ಪ್ರಮಾಣ ಏರುತ್ತಲೇ ಇದೆ. ಕೊರೊನಾ ವೈರಸ್ ಅಟ್ಟಹಾಸ ಅದ್ಯಾವಾಗ ನಿಲ್ಲುತ್ತೋ.. ಗೊತ್ತಿಲ್ಲ. ಆದರೆ, ಕೊರೊನಾ ವೈರಸ್ ಸೋಂಕಿತರ ಸಂಖ್ಯೆ ಕಮ್ಮಿಯಾಗುತ್ತಿದ್ದಂತೆಯೇ ಜನ ಮೈಮರೆಯುವಂತಿಲ್ಲ.

ಯಾವುದೇ ಪ್ರದೇಶದಲ್ಲಿ ಸೋಂಕಿನ ಪ್ರಮಾಣ ಕಡಿಮೆಯಾಗುತ್ತಿರುವಾಗ ಕೋವಿಡ್-19 ರೋಗವನ್ನು ತಡೆಗಟ್ಟಲು ಅನುಸರಿಸುತ್ತಿದ್ದ ಕ್ರಮಗಳನ್ನು ನಿಲ್ಲಿಸುವಂತಿಲ್ಲ. ಒಂದ್ವೇಳೆ ನಿಲ್ಲಿಸಿದರೆ ''ಎರಡನೇ ಅಲೆಯ ಅಬ್ಬರ ಶುರುವಾಗಲಿದೆ'' ಎಂದು ವಿಶ್ವ ಆರೋಗ್ಯ ಸಂಸ್ಥೆ ವಾರ್ನಿಂಗ್ ನೀಡಿದೆ.

ಎಚ್ಚರ ಎಚ್ಚರ...

''ಕೊರೊನಾ ವೈರಸ್ ಸೋಂಕಿನ ಪ್ರಮಾಣ ಗಣನೀಯವಾಗಿ ಕುಸಿತ ಕಾಣುತ್ತಿರುವ ದೇಶಗಳಲ್ಲಿ ಏಕಾಏಕಿ ಕೋವಿಡ್-19 ತಡೆಗಟ್ಟುವ ಕ್ರಮಗಳನ್ನು ಕೈಬಿಟ್ಟರೆ ''ಎರಡನೇ ಅಲೆ'' ಎದುರಿಸಬೇಕಾದೀತು'' ಎಂದು ಸೋಮವಾರ ವಿಶ್ವ ಆರೋಗ್ಯ ಸಂಸ್ಥೆ ಎಚ್ಚರಿಕೆ ನೀಡಿದೆ.

ಮೊದಲ ಅಲೆ

''ಇಡೀ ವಿಶ್ವದ ಸದ್ಯ ಕೋವಿಡ್-19 ಮೊದಲ ಅಲೆಯನ್ನು ಎದುರಿಸುತ್ತಿದೆ. ಹಲವು ದೇಶಗಳಲ್ಲಿ ಕೋವಿಡ್-19 ಪ್ರಕರಣಗಳು ಕಮ್ಮಿಯಾಗಿರಬಹುದು. ಆದರೆ, ದಕ್ಷಿಣ ಅಮೇರಿಕಾ ಮತ್ತು ದಕ್ಷಿಣ ಏಷ್ಯಾದಲ್ಲಿ ಕೊರೊನಾ ವೈರಸ್ ಇನ್ನೂ ಅಬ್ಬರಿಸುತ್ತಲೇ ಇದೆ'' ಎಂದು ವಿಶ್ವ ಆರೋಗ್ಯ ಸಂಸ್ಥೆಯ ಎಮರ್ಜೆನ್ಸೀಸ್ ಚೀಫ್ Dr.Michael Ryan ತಿಳಿಸಿದ್ದಾರೆ.

ತಡೆಗಟ್ಟುವ ಕ್ರಮಗಳು ಪಾಲಿಸಲೇಬೇಕು.!

''ಸಾಂಕ್ರಾಮಿಕ ರೋಗಗಳು ಹೆಚ್ಚಾಗಿ ಅಲೆಗಳಲ್ಲಿ ಬರುತ್ತವೆ. ಅಂದ್ರೆ, ಮೊದಲ ಅಲೆ ಕಡಿಮೆಯಾದ ಪ್ರದೇಶಗಳಲ್ಲಿ ಕೊರೊನಾ ವೈರಸ್ ಸೋಂಕು ಈ ವರ್ಷಾಂತ್ಯಕ್ಕೆ ಮತ್ತೆ ಕಾಣಿಸಿಕೊಳ್ಳಬಹುದು. ಕೋವಿಡ್-19 ತಡೆಗಟ್ಟುವ ಕ್ರಮಗಳನ್ನು ಪಾಲಿಸುವುದನ್ನು ಬಿಟ್ಟರೆ, ಸೋಂಕಿನ ಪ್ರಮಾಣ ಮತ್ತೆ ಏರಿಕೆಯಾಗಲಿದೆ'' ಅಂತಾರೆ Dr.Michael Ryan.

ಕಠಿಣ ಕ್ರಮಗಳನ್ನು ಮುಂದುವರೆಸಬೇಕಿತ್ತು

''ಕೋವಿಡ್-19 ತಡೆಗಟ್ಟಲು ಪಾಲಿಸಿದ ಕಠಿಣ ಕ್ರಮಗಳನ್ನು ಯೂರೋಪ್ ಮತ್ತು ಉತ್ತರ ಅಮೇರಿಕಾದ ದೇಶಗಳು ಮುಂದುವರೆಸಬೇಕು. ಆದರೆ, ಆರ್ಥಿಕತೆಯ ದೃಷ್ಟಿಯಿಂದ ಇತ್ತೀಚಿನ ದಿನಗಳಲ್ಲಿ ಯೂರೋಪ್ ಮತ್ತು ಉತ್ತರ ಅಮೇರಿಕಾ ಲಾಕ್ ಡೌನ್ ನಿಯಮಗಳನ್ನು ಸಡಿಲಿಸಿವೆ. ಇದರಿಂದ ಸೋಂಕಿನ ಆತಂಕ ತಪ್ಪಿದ್ದಲ್ಲ'' ಅಂತ Dr.Michael Ryan ಅಭಿಪ್ರಾಯ ಪಟ್ಟಿದ್ದಾರೆ.

English summary

WHO warns of immediate second peak in the places where Covid 19 infections declining.