ಫಿನ್ಲೆಂಡ್: ನಾಪತ್ತೆಯಾಗಿದ್ದ ಚೆನ್ನೈ ಮೂಲದ ಟೆಕ್ಕಿ ಶವವಾಗಿ ಪತ್ತೆ

ಹೆಲ್ಸಿಂಕಿ (ಫಿನ್ಲೆಂಡ್), ಸೆಪ್ಟೆಂಬರ್ 23: ಇದೇ ತಿಂಗಳು 8ರಿಂದ ಕಾಣೆಯಾಗಿದ್ದ ಚೆನ್ನೈ ಮೂಲದ ಭಾರತೀಯ ಟೆಕ್ಕಿ ಹರಿ ಸುಧಾನ್ (26), ಶವವಾಗಿ ಸಿಕ್ಕಿರುವುದು ತಡವಾಗಿ ವರದಿಯಾಗಿದೆ. ಫಿನ್ಲೆಂಡ್ ನಲ್ಲಿರುವ ಭಾರತೀಯ ರಾಯಭಾರಿ ವಾಣಿ ರಾವ್ ಅವರೂ ಈ ವರದಿಯನ್ನು ಖಾತ್ರಿಪಡಿಸಿದ್ದಾರೆ.

ಹೆಲ್ಸಿಂಕಿಯ ಸಮುದ್ರ ತೀರದಲ್ಲಿ ಆತನ ಶವ ಸೆ. 21ರ ಮಧ್ಯಾಹ್ನ ಗೋಚರಿಸಿದೆ. ಈ ಪ್ರಕರಣವನ್ನು ಪೊಲೀಸ್ ಇಲಾಖೆಯು, ತನ್ನಲ್ಲಿನ ಗಂಭೀರ ಪ್ರಕರಣಗಳ ತನಿಖಾ ವಿಭಾಗಗಕ್ಕೆ ವರ್ಗಾಯಿಸಿದೆ ಎಂದು ಅವರು ತಿಳಿಸಿದ್ದಾರೆ.

ಹರಿ ಸುಧಾನ್, ಹೆಲ್ಸಿಂಕಿಯಲ್ಲಿರುವ ಟಾಟಾ ಕನ್ಸಲ್ಟೆನ್ಸಿ ಸರ್ವೀಸ್ (ಟಿಸಿಎಸ್) ಕಂಪನಿಯಲ್ಲಿ ಸೇವೆ ಸಲ್ಲಿಸುತ್ತಿದ್ದರೆಂದು ಪೊಲೀಸರು ತಿಳಿಸಿದ್ದಾರೆ. ಈತನ ನಾಪತ್ತೆ ಹಾಗೂ ಸಾವು ನಿಗೂಢವಾಗಿದ್ದು ಈ ಬಗ್ಗೆ ತನಿಖೆ ನಡೆಸುತ್ತಿರುವುದಾಗಿ ಫಿನ್ಲೆಂಡ್ ಪೊಲೀಸ್ ಇಲಾಖೆ ತಿಳಿಸಿದೆ.

ಈ ಬಗ್ಗೆ ಪ್ರಕಟಣೆ ಹೊರಡಿಸಿರುವ ಹೆಲ್ಸಿಂಕಿಯ ಟಿಸಿಎಸ್ ಶಾಖೆಯ ವಕ್ತಾರರು, ''ಟೆಕ್ಕಿಯ ಸಾವಿನ ವಿಚಾರವನ್ನು ಚೆನ್ನೈನಲ್ಲಿರುವ ಆತನ ಕುಟುಂಬಸ್ಥರಿಗೆ ತಿಳಿಸಲಾಗಿದೆ. ಈ ಪ್ರಕರಣದ ತನಿಖೆಗೆ ಟಿಸಿಎಸ್ ಸಂಸ್ಥೆ ಸಹಕಾರ ನೀಡಲಿದೆ'' ಎಂದು ತಿಳಿಸಿದ್ದಾರೆ.

English summary

Hari Sudhan, the 26-year-old Chennai techie who went missing in Helsinki on September 8 was found dead in the sea, says the reports.