Russia-Ukraine War: ಉಕ್ರೇನ್-ರಷ್ಯಾ ಯುದ್ಧ: 20ನೇ ದಿನ ನಡೆದ ಬೆಳವಣಿಗೆಗಳ ರೌಂಡ್ ಅಪ್
ಕೀವ್, ಮಾರ್ಚ್ 15: ರಷ್ಯಾದ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಹಠ ಮತ್ತು ಕ್ರೌರ್ಯಕ್ಕೆ ಉಕ್ರೇನ್ ನೆಲದಲ್ಲಿ ಸೃಷ್ಟಿಯಾಗಿರುವ ಭೀಕರತೆಯೇ ಸಾಕ್ಷಿಯಾಗಿದೆ. ಫೆಬ್ರವರಿ 24ರಂದು ಆರಂಭವಾದ ರಷ್ಯಾದ ಆಕ್ರಮಣ ಇಂದಿನವರೆಗೂ ಮುಂದುವರಿದಿದೆ.
ಉಕ್ರೇನ್ ಮೇಲೆ ರಷ್ಯಾ ನಡೆಸುತ್ತಿರುವ ಯುದ್ಧವು 20ನೇ ದಿನಕ್ಕೆ ಕಾಲಿಟ್ಟಿದೆ. ಉಭಯ ರಾಷ್ಟ್ರಗಳ ನಡುವಿನ ಕಾದಾಟ ಮತ್ತು ಅದರ ಮಧ್ಯೆ ಜನರು ಎದುರಿಸುತ್ತಿರುವ ತೀವ್ರ ಸಂಕಟದ ಬಗ್ಗೆ ಜಾಗತಿಕ ಮಟ್ಟದಲ್ಲಿ ತೀವ್ರ ಚರ್ಚೆ ಆಗುತ್ತಿದೆ.
ಒಂದು ಕಡೆಯಲ್ಲಿ ರಷ್ಯಾ ಪಟ್ಟು ಬಿಡದೇ ದಾಳಿ ಮಾಡುತ್ತಿದೆ. ಇನ್ನೊಂದು ಮಗ್ಗಲಿನಲ್ಲಿ ನಿಂತಿರುವ ಉಕ್ರೇನ್ ಅಧ್ಯಕ್ಷ ವೊಲೊಡಿಮಿರ್ ಝೆಲೆನ್ಸ್ಕಿ ಕೂಡ ರಷ್ಯಾದ ಎದುರಿಗೆ ತಲೆ ಬಾಗದೇ ನಿಂತಿದ್ದಾರೆ. ಇದರ ಮಧ್ಯೆ 20ನೇ ದಿನ ರಷ್ಯಾ ನಡೆಸುತ್ತಿರುವ ಆಕ್ರಮಣದ ಮತ್ತು ನಡೆದ ಬೆಳವಣಿಗೆಗಳ ಕುರಿತು ಕೆಲವು ಪ್ರಮುಖ ಮಾಹಿತಿಯನ್ನು ಈ ವರದಿಯಲ್ಲಿ ತಿಳಿದುಕೊಳ್ಳೋಣ.
ಉಕ್ರೇನ್ ಮತ್ತು ರಷ್ಯಾ ಯುದ್ಧದ ಕುರಿತು ಕೆಲವು ಮಾಹಿತಿ:
- ಮಂಗಳವಾರ ಮುಂಜಾನೆ ಉಕ್ರೇನ್ ರಾಜಧಾನಿ ಕೀವ್ನಲ್ಲಿ ಎರಡು ಪ್ರಬಲ ಸ್ಫೋಟಗಳು ಸಂಭವಿಸಿವೆ. ಕೀವ್ನಲ್ಲಿರುವ ಅಪಾರ್ಟ್ಮೆಂಟ್ ಕಟ್ಟಡದ ಮೇಲೆ ನಡೆದ ದಾಳಿಯಲ್ಲಿ ಇಬ್ಬರು ಸಾವನ್ನಪ್ಪಿದ್ದಾರೆ ಎಂದು ತಿಳಿದು ಬಂದಿದೆ.
- ಉಕ್ರೇನಿಯನ್ ಅಧ್ಯಕ್ಷ ವೊಲೊಡಿಮರ್ ಝೆಲೆನ್ಸ್ಕಿ ಸಲಹೆಗಾರ, ಮಂಗಳವಾರ ಉಕ್ರೇನ್ನಲ್ಲಿನ ಯುದ್ಧವು ಒಂದು ಕವಲುದಾರಿಯಲ್ಲಿದೆ, ಅದು ರಷ್ಯಾದೊಂದಿಗೆ ಮಾತುಕತೆಯಲ್ಲಿ ಒಪ್ಪಂದಕ್ಕೆ ಅಥವಾ ಹೊಸ ರಷ್ಯಾದ ಆಕ್ರಮಣಕ್ಕೆ ಕಾರಣವಾಗಬಹುದು ಎಂದಿದ್ದಾರೆ.
- ರಷ್ಯಾದ ರಕ್ಷಣಾ ಸಚಿವಾಲಯದ ವಕ್ತಾರ ಇಗೊರ್ ಕೊನಾಶೆಂಕೋವ್ ಅವರು ಉಕ್ರೇನ್ನ ದಕ್ಷಿಣ ಖೆರ್ಸನ್ ಪ್ರದೇಶದ ಎಲ್ಲಾ ಭೂಪ್ರದೇಶವನ್ನು ರಷ್ಯಾದ ಪಡೆಗಳು ಸಂಪೂರ್ಣ ನಿಯಂತ್ರಣಕ್ಕೆ ತೆಗೆದುಕೊಂಡಿವೆ ಎಂದು ರಷ್ಯಾದ ಸುದ್ದಿ ಸಂಸ್ಥೆಗಳು ಮಂಗಳವಾರ ತಿಳಿಸಿವೆ.
- ಉಕ್ರೇನ್ ಮೇಲೆ ಯುದ್ಧವನ್ನು ಮುಂದುವರಿಸುವುದಕ್ಕೆ ರಷ್ಯಾ ಸಂಪನ್ಮೂಲಗಳ ಕೊರತೆಯನ್ನು ಎದುರಿಸುತ್ತಿದ್ದು, ಮೇ ವೇಳೆಗೆ ಯುದ್ಧವು ಮುಗಿಯಬೇಕು ಎಂದು ಉಕ್ರೇನ್ ಸರ್ಕಾರದ ಸಲಹೆಗಾರರೊಬ್ಬರು ಹೇಳಿದ್ದಾರೆ.
- ರಷ್ಯಾದ ಆಕ್ರಮಣ ತೀವ್ರಗೊಳ್ಳುತ್ತಿದ್ದಂತೆ ಉಕ್ರೇನ್ಗೆ ಬೆಂಬಲ ನೀಡುವುದಕ್ಕಾಗಿ ಪೋಲೆಂಡ್, ಜೆಕ್ ರಿಪಬ್ಲಿಕ್ ಮತ್ತು ಸ್ಲೊವೇನಿಯಾದ ನಾಯಕರು ಮಂಗಳವಾರ ಕೀವ್ಗೆ ಪ್ರಯಾಣಿಸುತ್ತಿದ್ದಾರೆ.
- ಶುಕ್ರವಾರ ತನ್ನ ಮೆಲಿಟೊಪೋಲ್ ನಗರದಲ್ಲಿ ರಷ್ಯಾ ತನ್ನದೇ ಆದ ಮೇಯರ್ ಅನ್ನು ನೇಮಿಸಿದೆ ಎಂದು ಬ್ರಿಟಿಷ್ ರಕ್ಷಣಾ ಸಚಿವಾಲಯ (MoD) ಹೇಳಿದೆ.
- ಪೆಂಟಗನ್ ಬ್ರೀಫಿಂಗ್ ಪ್ರಕಾರ, ವಾರಾಂತ್ಯದಲ್ಲಿ ಸ್ವಲ್ಪ ಪ್ರಗತಿ ಸಾಧಿಸಿದ ನಂತರ ಉಕ್ರೇನ್ನಲ್ಲಿನ ಎಲ್ಲಾ ರಷ್ಯಾದ ಮಿಲಿಟರಿ ಆಕ್ರಮಣಗಳು ಸ್ಥಗಿತಗೊಂಡಿವೆ. ರಾಯಿಟರ್ಸ್ ವರದಿಯ ಪ್ರಕಾರ, ರಷ್ಯಾದ ಪಡೆಗಳು ಇನ್ನೂ ಕೀವ್ನ ಮಧ್ಯಭಾಗದಿಂದ ಸುಮಾರು 15 ಕಿಮೀ (9 ಮೈಲುಗಳು) ದೂರದಲ್ಲಿವೆ ಎಂದು ಯುಎಸ್ ರಕ್ಷಣಾ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
- ಇತ್ತೀಚಿಗೆ ಸುದ್ದಿಗೋಷ್ಠಿಯನ್ನು ಉದ್ದೇಶಿಸಿ ಮಾತನಾಡಿದ ಉಕ್ರೇನ್ ಅಧ್ಯಕ್ಷ ವೊಲೊಡಿಮಿರ್ ಝೆಲೆನ್ಸ್ಕಿ, ಯುದ್ಧವನ್ನು ಮುಂದುವರಿಸುವ "ಅವಮಾನ"ಕ್ಕಿಂತ ಶರಣಾಗುವಂತೆ ರಷ್ಯಾದ ಸೇನೆಯನ್ನು ಒತ್ತಾಯಿಸಿದರು. ರಷ್ಯಾದ ಭಾಷೆಯಲ್ಲಿ ಭಾಗಶಃ ಮಾತನಾಡುತ್ತಾ, ಯುದ್ಧವು ರಷ್ಯಾಕ್ಕೆ "ದುಃಸ್ವಪ್ನ"ವಾಗಿ ಮಾರ್ಪಟ್ಟಿದೆ. ಎರಡೂ ಚೆಚೆನ್ ಯುದ್ಧಗಳಿಗಿಂತ ಉಕ್ರೇನ್ನಲ್ಲಿ ರಷ್ಯಾ ಹೆಚ್ಚು ಸೈನಿಕರನ್ನು ಕಳೆದುಕೊಂಡಿದೆ ಎಂದಿದ್ದಾರೆ.
- ರಷ್ಯಾದ ರಾಜ್ಯ ಟಿವಿ ಚಾನೆಲ್ ಒಂದರಲ್ಲಿ ಉಕ್ರೇನ್ನಲ್ಲಿನ ಯುದ್ಧವನ್ನು ಖಂಡಿಸುವ ಲೈವ್ ಸುದ್ದಿಯ ಬುಲೆಟಿನ್ ಅನ್ನು ಅಡ್ಡಿಪಡಿಸುವುದು "ಗೂಂಡಾಗಿರಿ" ಎಂದು ಕ್ರೆಮ್ಲಿನ್ ಮಂಗಳವಾರ ಹೇಳಿದೆ.
- ಯುಎಸ್ ಅಧ್ಯಕ್ಷ ಜೋ ಬೈಡೆನ್, ನ್ಯಾಟೋ ಮಿತ್ರರಾಷ್ಟ್ರಗಳೊಂದಿಗೆ ವೈಯಕ್ತಿಕ ಸಭೆಗಳಿಗಾಗಿ ಯುರೋಪ್ ಗೆ ಪ್ರಯಾಣಿಸಲು ಯೋಚಿಸುತ್ತಿದ್ದಾರೆ ಎಂದು ರಾಯಿಟರ್ಸ್ ವರದಿ ಮಾಡಿದೆ. ಬೈಡೆನ್ ಮಾರ್ಚ್ 23 ರಂದು ಬ್ರಸೆಲ್ಸ್ನಲ್ಲಿ ಇತರ ನಾಯಕರನ್ನು ಭೇಟಿ ಮಾಡಬಹುದು, ನಂತರ ಪೋಲೆಂಡ್ಗೆ ಪ್ರಯಾಣಿಸಬಹುದು ಎಂದು ವರದಿ ಹೇಳಿದೆ.
- ಆರ್ಥಿಕ ಅಪರಾಧ ಮಸೂದೆಯ ಅಂಗೀಕಾರದ ನಂತರ ರಷ್ಯಾದ ಉತ್ಪನ್ನಗಳ ಮೇಲೆ ಹೊಸ ರಫ್ತು ನಿಷೇಧ ಮತ್ತು ಸರಣಿ ಸುಂಕಗಳನ್ನು ವಿಧಿಸಲಾಗಿದೆ.
- ಮಾರಿಯುಪೋಲ್ನಲ್ಲಿ ಸಿಕ್ಕಿಬಿದ್ದಿರುವ ನಾಗರಿಕರಿಗಾಗಿ ಮೂಲಭೂತ ಅಗತ್ಯತೆಗಳನ್ನು ಸರಬರಾಜು ಮಾಡಲು ಉಕ್ರೇನ್ ಮಂಗಳವಾರ ಹೊಸ ಪ್ರಯತ್ನವನ್ನು ಮಾಡಲಿದೆ ಎಂದು ಉಪ ಪ್ರಧಾನ ಮಂತ್ರಿ ಐರಿನಾ ವೆರೆಶ್ಚುಕ್ ಹೇಳಿದ್ದಾರೆ.
- ಮಂಗಳವಾರ ಅಥವಾ ಬುಧವಾರದಂದು ಉಕ್ರೇನ್ನ ದಕ್ಷಿಣ ಬಂದರು ನಗರವಾದ ಮರಿಯುಪೋಲ್ನಿಂದ ನಾಗರಿಕರನ್ನು ಸ್ಥಳಾಂತರಿಸುವ ನಿರೀಕ್ಷೆಯಿದೆ ಎಂದು ಟರ್ಕಿಯ ವಿದೇಶಾಂಗ ಸಚಿವರು ಹೇಳಿದ್ದಾರೆ. ರಷ್ಯಾದ ಸಹವರ್ತಿ ಸೆರ್ಗೆಯ್ ಲಾವ್ರೊವ್ ಅವರೊಂದಿಗೆ ದೂರವಾಣಿ ಕರೆ ಮಾಡಿದ ನಂತರ ಅವರು ಸುದ್ದಿಗಾರರಿಗೆ ಈ ವಿಷಯ ತಿಳಿಸಿದ್ದಾರೆ.
- ಯುರೋಪಿಯನ್ ಒಕ್ಕೂಟವು ಇಂದು ಬೆಳಿಗ್ಗೆ ಔಪಚಾರಿಕವಾಗಿ ನಾಲ್ಕನೇ ಪ್ಯಾಕೇಜ್ ನಿರ್ಬಂಧಗಳಿಗೆ ಒಪ್ಪಿಗೆ ನೀಡಿದೆ. ಇದರಲ್ಲಿ ರೋಮನ್ ಅಬ್ರಮೊವಿಚ್ ಮೇಲಿನ ಆಸ್ತಿ ಫ್ರೀಜ್ ಮತ್ತು ಪ್ರಯಾಣ ನಿಷೇಧವೂ ಸೇರಿಸಲಾಗಿದೆ. ಸಂಪೂರ್ಣ ವಿವರಗಳನ್ನು ಯುರೋಪಿಯನ್ ಒಕ್ಕೂಟದ ಅಧಿಕೃತ ಜರ್ನಲ್ನಲ್ಲಿ ಪ್ರಕಟಿಸುವ ನಿರೀಕ್ಷೆಯಿದೆ.
- ಚೆಲ್ಸಿಯಾ ಎಫ್ಸಿ ಮಾಲೀಕ ಅಬ್ರಮೊವಿಚ್, ಅದರ ಇತ್ತೀಚಿನ ನಿರ್ಬಂಧಗಳ ಪ್ಯಾಕೇಜ್ಗೆ ಸಂಬಂಧಿಸಿದ EU ನ ಕಾನೂನು ಪಠ್ಯದ ಪ್ರತಿಯಲ್ಲಿ "ವ್ಲಾಡಿಮಿರ್ ಪುಟಿನ್ ಅವರೊಂದಿಗೆ ದೀರ್ಘ ಮತ್ತು ನಿಕಟ ಸಂಬಂಧಗಳನ್ನು ಹೊಂದಿರುವ ರಷ್ಯಾದ ಒಲಿಗಾರ್ಚ್" ಎಂದು ವಿವರಿಸಲಾಗಿದೆ.
- ಬೋರಿಸ್ ಜಾನ್ಸನ್, ಹೆಚ್ಚಿದ ತೈಲ ಉತ್ಪಾದನೆಗಾಗಿ ಸೌದಿ ಅರೇಬಿಯಾಕ್ಕೆ ಹೋಗುತ್ತಿರುವಾಗ ರಷ್ಯಾದ ಇಂಧನಕ್ಕೆ ಅದರ "ಅವಲಂಬನೆ"ಯನ್ನು ಕೊನೆಗೊಳಿಸುವಂತೆ ಪಶ್ಚಿಮಕ್ಕೆ ಒತ್ತಾಯಿಸಿದ್ದಾರೆ.
- ಜರ್ಮನಿಯ ಮಾಜಿ ಚಾನ್ಸೆಲರ್ ಗೆರ್ಹಾರ್ಡ್ ಶ್ರೋಡರ್ ಕಳೆದ ಗುರುವಾರ ಮಾಸ್ಕೋದಲ್ಲಿ ಹಲವಾರು ಗಂಟೆಗಳ ಕಾಲ ಅಬ್ರಮೊವಿಚ್ ಅವರನ್ನು ಭೇಟಿಯಾದರು ಎಂದು ಟ್ಯಾಬ್ಲಾಯ್ಡ್ ಬಿಲ್ಡ್ ಮಂಗಳವಾರ ವರದಿ ಮಾಡಿದೆ. ಗಾಜ್ಪ್ರೊಮ್ ಲಾಬಿಯಸ್ಟ್ನ ಏಕವ್ಯಕ್ತಿ ರಾಜತಾಂತ್ರಿಕ ಕಾರ್ಯಾಚರಣೆಯ ಉದ್ದೇಶ ಮತ್ತು ಅದು ಯಾರ ಕೋರಿಕೆಯ ಮೇರೆಗೆ ನಡೆಯಿತು ಎಂಬುದು ಅಸ್ಪಷ್ಟವಾಗಿಯೇ ಉಳಿದಿದೆ.
Click it and Unblock the Notifications
Sign in with Google