ಯುದ್ಧದ ಬಗ್ಗೆ ಅಚ್ಚರಿಯ ಹೇಳಿಕೆ ನೀಡಿದ ಸರ್ವಾಧಿಕಾರಿ ಕಿಮ್

By ಅನಿಕೇತ್

Updated: Tuesday, August 11, 2020, 0:06 [IST]

ಉತ್ತರ ಕೊರಿಯಾದ ಸರ್ವಾಧಿಕಾರಿ, ಅಮೆರಿಕದ ಪರಮ ಶತ್ರು ಕಿಮ್ ಜೊಂಗ್ ಉನ್ ಮತ್ತೊಮ್ಮೆ ಯುದ್ಧದ ಬಗ್ಗೆ ಮಾತನಾಡಿದ್ದಾನೆ. ಆದರೆ ಕಿಮ್ ವರಸೆ ಈಗ ಬದಲಾಗಿದೆ. ಇಷ್ಟು ದಿನ ಯುದ್ಧ ಅಂದರೆ ಹಪಹಪಿಸುತ್ತಿದ್ದ ಕಿಮ್, ಈ ಬಾರಿ ಮಾತ್ರ ಯುದ್ಧ ನಡೆಯಲ್ಲ ಎನ್ನುವ ಮೂಲಕ ಅಚ್ಚರಿ ಮೂಡಿಸಿದ್ದಾನೆ.

ಆರ್ಥಿಕ ಹೊಡೆತಕ್ಕೆ ಬೆಚ್ಚಿಬಿದ್ಧನಾ ಡಿಕ್ಟೇಟರ್..?

ಹೌದು ಇಡೀ ಪ್ರಪಂಚಕ್ಕೆ ಕೊರೊನಾವೈರಸ್ ಎಂಬ ಮಹಾಮಾರಿ ಶಾಕ್ ಕೊಟ್ಟಿದೆ. ಬಲಾಢ್ಯ ದೇಶಗಳೇ ಆರ್ಥಿಕವಾಗಿ ದಿವಾಳಿಯಾಗುವ ಹಂತ ತಲುಪಿವೆ. ಇಂತಹ ಹೊತ್ತಲ್ಲಿ ಚೀನಾ ಬೆಂಬಲದೊಂದಿಗೆ ತನ್ನ ದೇಶ ಕಟ್ಟಿಕೊಂಡಿರುವ ಉತ್ತರ ಕೊರಿಯಾ ಸ್ಥಿತಿ ಹೇಗಿರಬೇಡ ಹೇಳಿ..? ಸದ್ಯಕ್ಕೆ ಉತ್ತರ ಕೊರಿಯಾ ಆರ್ಥಿಕ ಮುಗ್ಗಟ್ಟಿನಿಂದ ತತ್ತರಿಸಿ ಹೋಗಿದೆ. ಉ. ಕೊರಿಯಾ ಸ್ನೇಹಿತ ಚೀನಾ ಕೂಡ ಅಂದುಕೊಂಡಷ್ಟು ಸಹಾಯ ಮಾಡುತ್ತಿಲ್ಲ. ಇಷ್ಟೆಲ್ಲದರ ಮಧ್ಯೆ ಅಮೆರಿಕ ಹೇರಿರುವ ಆರ್ಥಿಕ ದಿಗ್ಬಂಧನ ಬೇರೆ. ಇದೆಲ್ಲದರ ಪರಿಣಾಮ ಕಿಮ್ ದೇಶ ತತ್ತರಿಸಿದೆ. ಇದನ್ನೆಲ್ಲಾ ಸರಿಪಡಿಸಲು ಹಾಗೂ ಅಮೆರಿಕ ಸೇರಿದಂತೆ ತನ್ನ ಶತ್ರು ರಾಷ್ಟ್ರಗಳನ್ನು ಸಮಾಧಾನ ಮಾಡಲು ಕಿಮ್ ಈ ರೀತಿ ಹೇಳಿಕೆ ನೀಡುತ್ತಿದ್ದಾನಾ ಎಂಬ ಅನುಮಾನ ಮೂಡಿದೆ.

ತನ್ನದೇ ಶೈಲಿಯಲ್ಲಿ ಶತ್ರುಗಳಿಗೆ ಪ್ರತ್ಯುತ್ತರ..!

ಅಷ್ಟಕ್ಕೂ ಸರ್ವಾಧಿಕಾರಿ ಕಿಮ್ ಯುದ್ಧ ನಡೆಯೋದಿಲ್ಲ ಎಂಬ ಹೇಳಿಕೆ ನೀಡಿದ್ದರು ಕೂಡ ತನ್ನ ದೇಶದಲ್ಲಿರುವ ಪರಮಾಣು ಶಸ್ತ್ರಾಸ್ತ್ರ ನಾಶ ಮಾಡುವ ಬಗ್ಗೆ ಮಾತನಾಡಿಲ್ಲ. ಬದಲಾಗಿ ಅಣ್ವಸ್ತ್ರಗಳ ಬಗ್ಗೆ ಹೆಮ್ಮೆ ವ್ಯಕ್ತಪಡಿಸಿದ್ದಾನೆ. ಅಲ್ಲದೆ ನಮ್ಮ ಪರಮಾಣು ಶಸ್ತ್ರಾಸ್ತ್ರಗಳು ಉತ್ತರ ಕೊರಿಯಾದ ರಕ್ಷಣೆಗೆ ಹಾಗೂ ಶತ್ರುಗಳ ದಾಳಿಯನ್ನು ಹಿಮ್ಮೆಟ್ಟಿಸಲು ಶಕ್ತವಾಗಿವೆ ಎಂದಿದ್ದಾನೆ. ಈ ಮೂಲಕ ಉತ್ತರ ಕೊರಿಯಾ ಬಳಿ ಅಣ್ವಸ್ತ್ರ ಇರುವುದರಿಂದ ಯುದ್ಧದ ಮಾತೇ ಇಲ್ಲ ಅಂತಾ ಶತೃ ರಾಷ್ಟ್ರಗಳಿಗೆ ತಿರುಗೇಟು ನೀಡಿದ್ದಾನೆ. ಕಿಮ್ ಹೇಳಿಕೆ ಉಲ್ಲೇಖಿಸಿ ಉ. ಕೊರಿಯಾದ ‘ಕೆಸಿಎನ್ಎ' (Korean Central News Agency) ವರದಿ ಮಾಡಿದೆ.

ನಮ್ಮನ್ನು ಮುಟ್ಟಿದರೆ ಗೊತ್ತಲ್ವಾ..?

ತನ್ನ ಭಾಷಣದ ಉದ್ದಕ್ಕೂ ಯುದ್ಧ ನಡೆಯಲ್ಲ, ಯುದ್ಧ ನಡೆಯಲ್ಲ ಅಂತಾ ಹೇಳುತ್ತಲೇ ಉತ್ತರ ಕೊರಿಯಾದ ಶತೃಗಳಿಗೆ ಖಡಕ್ ಸಂದೇಶ ನೀಡಿದ್ದಾನೆ ಕಿಮ್. ಮತ್ತೊಂದು ಸಶಸ್ತ್ರ ಸಂಘರ್ಷ ತಡೆಗೆ ಹಾಗೂ ಬಾಹ್ಯ ಶಕ್ತಿಗಳ ವಿರುದ್ಧ ಗೆಲುವು ಸಾಧಿಸಲು ಉತ್ತರ ಕೊರಿಯಾ ಪರಮಾಣು ಶಸ್ತ್ರಾಸ್ತ್ರ ಅಭಿವೃದ್ಧಿಪಡಿಸಿದೆ. ಸಾಮ್ರಾಜ್ಯಶಾಹಿಗಳು ಸೇರಿದಂತೆ ಉತ್ತರ ಕೊರಿಯಾ ಶತ್ರುಗಳಿಂದ ಎದುರಾಗುವ ಮಿಲಿಟರಿ ಬೆದರಿಕೆ ಎದುರಿಸಲು ಸಮರ್ಥರಾಗಿದ್ದೇವೆ ಎಂದಿದ್ದಾನೆ. ನಮ್ಮ ವಿಶ್ವಾಸಾರ್ಹ ಪರಮಾಣು ಶಕ್ತಿಗೆ ಅಭಿನಂಧನೆ ಸಲ್ಲಿಸುತ್ತೇನೆ. ಆದರೆ ಭವಿಷ್ಯದಲ್ಲಿ ಯುದ್ಧವಿರುವುದಿಲ್ಲ. ನಮ್ಮ ದೇಶದ ಸುರಕ್ಷತೆ ಮತ್ತು ಭವಿಷ್ಯ ಶಾಶ್ವತವಾಗಿ ಖಾತರಿಯಾಗಿದೆ ಅಂತಾ ತನ್ನ ಬೆನ್ನನ್ನು ತಾನೇ ತಟ್ಟಿಕೊಂಡಿದ್ದಾನೆ.

ಅಮೆರಿಕ v/s ಉ. ಕೊರಿಯಾ ನ್ಯೂಕ್ಲಿಯರ್ ಫೈಟ್

ಅಷ್ಟಕ್ಕೂ ಕಿಮ್ ಜೊಂಗ್ ಉನ್ ಹೇಳಿಕೆಯಲ್ಲಿ ಹಲವು ಮಾಹಿತಿಗಳು ಅಡಗಿವೆ. ಉತ್ತರ ಕೊರಿಯಾ ಅಣ್ವಸ್ತ್ರ ಪರೀಕ್ಷೆಗೆ ಇಳಿಯುತ್ತಿದ್ದಂತೆ ಅಮೆರಿಕ ತಿರುಗಿಬಿದ್ದಿತ್ತು. ಹತ್ತಾರು ವರ್ಷಗಳಿಂದ ಈ ಕಿರಿಕ್ ನಡೆಯುತ್ತಲೇ ಬಂದಿದೆ. ಆದರೆ ಕೆಲ ವರ್ಷಗಳಿಂದ ಸಂಬಂಧ ಒಂದಷ್ಟು ಸುಧಾರಿಸುವ ಮುನ್ಸೂಚನೆ ಸಿಕ್ಕಿತ್ತು. ಟ್ರಂಪ್ ಹಾಗೂ ಕಿಮ್ ಭೇಟಿ ನಂತರ ಇಬ್ಬರ ಸಂಬಂಧ ಸುಧಾರಿಸಲಿದೆ ಅಂತಾ ಹೇಳಲಾಗಿತ್ತು. ಆದರೆ ಮತ್ತೆ ಎರಡೂ ರಾಷ್ಟ್ರಗಳ ಮಧ್ಯೆ ಸಂಘರ್ಷ ಶುರುವಾಗಿದೆ. ಉ. ಕೊರಿಯಾ ವಿರುದ್ಧ ವಿಧಿಸಿರುವ ಆರ್ಥಿಕ ನಿರ್ಬಂಧ ತೆರವು ಮಾಡಲು ಅಮೆರಿಕ ಷರತ್ತುಗಳನ್ನು ಹಾಕಿತ್ತು. ಉ. ಕೊರಿಯಾ ಪರಮಾಣು ಮತ್ತು ಕ್ಷಿಪಣಿ ಯೋಜನೆಗಳನ್ನ ಕೈಬಿಡಬೇಕು ಅಂತಾ ಅಮೆರಿಕ ತಾಕೀತು ಮಾಡಿತ್ತು. ಇದರಿಂದ ಮತ್ತೆ ಕಿಮ್ ರೊಚ್ಚಿಗೆದ್ದು ನ್ಯೂಕ್ಲಿಯರ್ ಪ್ರಾಜೆಕ್ಟ್‌ಗಳನ್ನ ರೀ ಸ್ಟಾರ್ಟ್ ಮಾಡಿದ್ದ. ಹೀಗಾಗಿ ಎರಡೂ ದೇಶಗಳ ನಡುವಿನ ಮಾತುಕತೆ ಸದ್ಯಕ್ಕೆ ಸ್ಥಗಿತಗೊಂಡಿದೆ. ಇದರ ಬೆನ್ನಲ್ಲೇ ಕಿಮ್‌ ಈ ರೀತಿ ಹೇಳಿಕೆ ನೀಡಿದ್ದಾನೆ.