ಭಾರತದ ಸೇನೆ ಹೊರಗೆ ಕಳುಹಿಸಲು ಮಾಲ್ಡೀವ್ಸ್ ಹೊಸ ಅಧ್ಯಕ್ಷನ ಸ್ಕೆಚ್?
ಭಾರತೀಯ ಸೇನೆಗೆ ಹಿಂದೂ ಮಹಾಸಾಗರದ ಮೇಲೆ ಹಿಡಿತ ಉಳಿಸಿಕೊಳ್ಳಲು ಮಾಲ್ಡೀವ್ಸ್ನ ಜೊತೆಗೆ ಉತ್ತಮ ಸಂಬಂಧ ಕಾಪಾಡಿಕೊಳ್ಳುವುದು ಅತ್ಯಗತ್ಯ. ಆದರೆ ಈಗ ಆಗುತ್ತಿರುವುದೇ ಬೇರೆ, ಮಾಲ್ಡೀವ್ಸ್ ನೂತನ ಅಧ್ಯಕ್ಷ ಹಾಗೂ ಚೀನಾ ಪರ ಒಲವು ಹೊಂದಿರುವ ಮೊಹಮ್ಮದ್ ಮುಯಿಝು ಪದೇ ಪದೆ ಭಾರತ ವಿರೋಧಿ ನಿಲುವು ತೋರಿಸುತ್ತಿದ್ದಾರೆ. ಈಗಲೂ ಅಷ್ಟೇ, ತಾವು ಭಾರತದ ವಿರೋಧಿ ಎಂಬುದನ್ನ ಪರೋಕ್ಷವಾಗಿ ಪ್ರಸ್ತಾಪಿಸಿದ್ದಾರೆ ಮುಯಿಝು.
ಅಷ್ಟಕ್ಕೂ ಮೊನ್ನೆ ಮೊನ್ನೆ ನಡೆದ ಚುನಾವಣೆಯಲ್ಲಿ ಭಾರತ ವಿರೋಧಿ ನಿಲುವು ಮುಂದೆ ಇಟ್ಟುಕೊಂಡೇ ಮೊಹಮ್ಮದ್ ಮುಯಿಝು ಗೆದ್ದಿದ್ದರು. ಹೀಗಾಗಿ ಮೊಹಮ್ಮದ್ ಮುಯಿಝು ಜಯ ಸಾಧಿಸಿ, ಮಾಲ್ಡೀವ್ಸ್ಗೆ ನೂತನ ಅಧ್ಯಕ್ಷರಾಗುವುದು ಕನ್ಫರ್ಮ್ ಆಗುತ್ತಿದ್ದಂತೆ ತೀವ್ರ ಸಂಚಲನ ಸೃಷ್ಟಿಯಾಗಿತ್ತು. ಹೀಗೆ ಅಧಿಕಾರಕ್ಕೆ ಬಂದ ಮೊದಲ ದಿನವೇ ಭಾರತೀಯ ಸೇನೆ ಹೊರಗೆ ಕಳುಹಿಸಲು ಮಾತನಾಡಿದ್ದ ಮೊಹಮ್ಮದ್ ಮುಯಿಝು, ಮತ್ತೊಮ್ಮೆ ಅದೇ ರೀತಿ ಮಾತನಾಡಿ ಭಾರತದ ವಿರೋಧಿ ಎಂಬುದನ್ನ ಪ್ರೂವ್ ಮಾಡಿದ್ದಾರೆ ಎಂಬ ಆರೋಪ ಈಗ ಕೇಳಿಬಂದಿದೆ.
ಭಾರತದ ಸೈನಿಕರು ಮಾಲ್ಡೀವ್ಸ್ಗೆ ಹೋಗಿದ್ದೇಕೆ?
ಹೌದು, ಮಾಲ್ಡೀವ್ಸ್ 'ಸಂಪೂರ್ಣ ಸ್ವತಂತ್ರ' ಹೊಂದಲು ಉದ್ದೇಶಿಸಿದೆ. ಹೀಗಾಗಿಯೇ ದ್ವೀಪ ರಾಷ್ಟ್ರದಲ್ಲಿ ನೆಲೆಸಿರುವ ಭಾರತೀಯ ಪಡೆಗಳನ್ನು ತೊರೆಯಲು ಸೂಚಿಸಿದ್ದೇವೆ ಅಂತಾ ಹೊಸ ಅಧ್ಯಕ್ಷ ಮುಯಿಝು ಹೇಳಿದ್ದಾರೆ. ಅಂತಾರಾಷ್ಟ್ರೀಯ ಮಾಧ್ಯಮಕ್ಕೆ ನೀಡಿದ ಸಂದರ್ಶನದ ವೇಳೆ ಈ ವಿಚಾರವನ್ನ ಪ್ರಸ್ತಾಪ ಮಾಡಿರುವ ಮೊಹಮ್ಮದ್ ಮುಯಿಝು, ಮಾಲ್ಡೀವ್ಸ್ನಲ್ಲಿ ಇರುವ 70 ಭಾರತೀಯ ಸೈನಿಕರ ಹೊರ ಹೋಗಲು ಹೇಳುತ್ತಿದ್ದಾರೆ. ಹೀಗೆ 70 ಭಾರತೀಯ ಸೈನಿಕರು ಮಾಲ್ಡೀವ್ಸ್ ಭದ್ರತೆಗಾಗಿ ಶ್ರಮಿಸುತ್ತಿದ್ದಾರೆ. ಭಾರತ ನಿರ್ಮಿಸಿದ ರಡಾರ್ ಕೇಂದ್ರ ಸೇರಿದಂತೆ ಕಣ್ಗಾವಲು ವಿಮಾನ ಹಾಗೂ ಹಡಗುಗಳ ಉಸ್ತುವಾರಿಯನ್ನ ಇವರೆಲ್ಲಾ ಇದೀಗ ನೋಡಿಕೊಳ್ಳುತ್ತಿದ್ದಾರೆ.
ಮಾಲ್ಡೀವ್ಸ್ ರಕ್ಷಣೆಗೆ ಭಾರತ ಈ ಹಿಂದಿನ ಅಧ್ಯಕ್ಷರ ಜೊತೆಗೆ ಒಪ್ಪಂದ ಮಾಡಿಕೊಂಡಿತ್ತು. ಆದರೆ ಈಗ ಹೊಸ ಅಧ್ಯಕ್ಷ ಮೊಹಮ್ಮದ್ ಮುಯಿಝು ಎಲ್ಲಾ ಉಲ್ಟಾ ಮಾಡ್ತಿದ್ದು, ಅಲ್ಲಿ ಇರುವ ಭಾರತದ ಸೇನೆಯನ್ನ ಹೊರಗೆ ಹಾಕಲು ಕಾಯುತ್ತಿದ್ದಾರೆ. ಈ ಮೊದಲಿನಿಂದಲೂ ತಾವು ಭಾರತ ವಿರೋಧಿ ಎಂಬುದನ್ನ ಮೊಹಮ್ಮದ್ ಮುಯಿಝು ತೋರಿಸುತ್ತಾ ಬಂದಿದ್ದು ಈಗ ಅದನ್ನು ಕಾರ್ಯರೂಪಕ್ಕೆ ತರುತ್ತಿದ್ದಾರೆ ಎಂಬ ಆರೋಪ ಕೂಡ ಕೇಳಿಬಂದಿದೆ.
ಹಳ್ಳಕ್ಕೆ ಬಿತ್ತಾ ಮಾಲ್ಡೀವ್ಸ್ ಆಡಳಿತ?
ಮಾಲ್ಡೀವ್ಸ್ ವಿಚಾರದಲ್ಲಿ ಭಾರತ ಮತ್ತು ಚೀನಾ ಪೈಪೋಟಿ ಹೊಸದಲ್ಲ ಆದ್ರೂ ಈ ಚುನಾವಣೆ ಭಾರತಕ್ಕೆ ಹಿನ್ನಡೆ ಉಂಟುಮಾಡಿದೆ. ಹಿಂದಿನ ಸರ್ಕಾರವು ಭಾರತದ ಪರವಾಗಿಯೇ ಇತ್ತು. ಈ ಕಾರಣಕ್ಕೆ ಭಾರತ ಮಾಲ್ಡೀವ್ಸ್ ಜೊತೆ ಉತ್ತಮ ಒಡನಾಟವನ್ನ ಹೊಂದಿತ್ತು. ರಕ್ಷಣಾ ಒಪ್ಪಂದ ಕೂಡ ವಿಸ್ತರಣೆ ಮಾಡಿತ್ತು. ಆದರೆ ಈಗ ಬೇರೆಯದ್ದೇ ರಾಜಕೀಯ ಮೇಲಾಟವು ಶುರುವಾಗಿದೆ. 5.21 ಲಕ್ಷ ಜನಸಂಖ್ಯೆ ಹೊಂದಿರುವ ಮಾಲ್ಡೀವ್ಸ್ಗೆ ಭಾರತ ಪ್ರಮುಖ ಶಸ್ತ್ರಾಸ್ತ್ರ ರಫ್ತು ಮಾಡುವ ದೇಶವಾಗಿದೆ. ಹೀಗೆ ಎಲ್ಲವೂ ಸರಿಯಿದ್ದಾಗ ಮಾಲ್ಡೀವ್ಸ್ ಖುದ್ದಾಗಿ ಹಳ್ಳಕ್ಕೆ ಬಿದ್ದಂತೆ ಕಾಣ್ತಿದೆ.
ಮಾಲ್ಡೀವ್ಸ್ಗೆ ಭಾರತ ಸಾಕಷ್ಟು ವಸ್ತು ಸರಬರಾಜು ಮಾಡುತ್ತೆ ಹೀಗೆ ರಫ್ತು ಮಾಡುವ ವಸ್ತು ಪೈಕಿ ಶಸ್ತ್ರಾಸ್ತ್ರಗಳು ಕೂಡ ಸೇರಿವೆ. ಕಳೆದ ಸಾಲಿನಲ್ಲಿ 2 ದೇಶಗಳ ನಡುವೆ, 498 ಮಿಲಿಯನ್ ಅಮೆರಿಕನ್ ಡಾಲರ್ ವ್ಯವಹಾರ ನಡೆದಿದೆ. ಈ ಪೈಕಿ ಬಹುತೇಕ ಮೊತ್ತವು ಶಸ್ತ್ರಾಸ್ತ್ರ ಖರೀದಿಗೆ ಖರ್ಚು ಮಾಡಲಾಗಿದೆ. ಇಷ್ಟೆಲ್ಲಾ ಒಡನಾಟ ಇದ್ದರೂ ಖುದ್ದು ಮಾಲ್ಡೀವ್ಸ್ ನೂತನ ಅಧ್ಯಕ್ಷ & ಚೀನಾ ಪರ ಒಲವು ಹೊಂದಿರುವ ಮೊಹಮ್ಮದ್ ಮುಯಿಝು ತಪ್ಪು ದಾರಿ ತುಳಿದಿದ್ದಾರೆ ಎಂಬ ಗಂಭೀರ ಆರೋಪ ಕೇಳಿಬಂದಿದೆ. ಆದರೆ ಇದನ್ನೆಲ್ಲಾ ಭಾರತ ಈಗ ಹೇಗೆ ನಿಭಾಯಿಸಲಿದೆ? ಮಾಲ್ಡೀವ್ಸ್ ಜೊತೆಗೆ ಸಂಬಂಧ ಹೇಗೆ ಉಳಿಸಿಕೊಳ್ಳಲಿದೆ? ಎಂಬುದೇ ಯಕ್ಷ ಪ್ರಶ್ನೆಯಾಗಿದೆ.
Click it and Unblock the Notifications
Sign in with Google