ಕೋವಿಡ್-19 ಗೆ ಲಸಿಕೆ: ಆಸ್ಟ್ರೇಲಿಯಾದಲ್ಲಿ ಮನುಷ್ಯರ ಮೇಲೆ ಪ್ರಯೋಗ ಶುರು!

ಮಹಾಮಾರಿ ಕೋವಿಡ್-19 ಗೆ ಔಷಧಿ ಮತ್ತು ಲಸಿಕೆ ಕಂಡುಹಿಡಿಯಲು ಲಂಡನ್, ಇಸ್ರೇಲ್, ಇಟಲಿ, ಅಮೇರಿಕಾ, ಚೀನಾ ಸೇರಿದಂತೆ ವಿಶ್ವದ ಹಲವೆಡೆ ವಿಜ್ಞಾನಿಗಳು ಕ್ಲಿನಿಕಲ್ ಪ್ರಯೋಗಗಳನ್ನು ನಡೆಸುತ್ತಿದ್ದಾರೆ.

ಇದೀಗ ಯು.ಎಸ್ ನ ಬಯೋಟೆಕ್ನಾಲಜಿ ಕಂಪನಿಯೊಂದು ಕೋವಿಡ್-19 ಲಸಿಕೆಯನ್ನ ಆಸ್ಟ್ರೇಲಿಯಾದಲ್ಲಿ ಮನುಷ್ಯರ ಮೇಲೆ ಪ್ರಯೋಗಿಸುತ್ತಿದೆ. ಲಸಿಕೆ ಪರಿಣಾಮಕಾರಿ ಎಂದು ಸಾಬೀತಾದರೆ, ಈ ವರ್ಷದೊಳಗೆ ಮಾರುಕಟ್ಟೆಗೆ ಬರಲಿದೆ.

ಆಸ್ಟ್ರೇಲಿಯಾದ ಮೆಲ್ಬರ್ನ್ ಮತ್ತು ಬ್ರಿಸ್ಬೇನ್ ನಲ್ಲಿ 131 ಜನರ ಮೇಲೆ ಯು.ಎಸ್. ಬಯೋಟೆಕ್ನಾಲಜಿ ಕಂಪನಿ 'ನೋವಾವ್ಯಾಕ್ಸ್' ಕೋವಿಡ್-19 ಲಸಿಕೆಯ ಮೊದಲ ಹಂತದ ಕ್ಲಿನಿಕಲ್ ಟ್ರಯಲ್ ಪ್ರಾರಂಭಿಸಿದೆ.

''ಈಗಾಗಲೇ ಡೋಸೇಜ್ ಗಳನ್ನು ನಾವು ತಯಾರಿಸುತ್ತಿದ್ದೇವೆ. ಈ ವರ್ಷದ ಅಂತ್ಯದ ವೇಳೆಗೆ ಲಸಿಕೆ ಸಿದ್ಧವಾಗುತ್ತದೆ'' ಎಂದು ನೋವಾವ್ಯಾಕ್ಸ್ ಕಂಪನಿಯ ಸಂಶೋಧನಾ ಮುಖ್ಯಸ್ಥ ಡಾ.ಗ್ರೆಗೊರಿ ಗ್ಲೆನ್ ಹೇಳಿದ್ದಾರೆ.

ಕೊರೊನಾ ವೈರಸ್ ನ ಮೇಲ್ಮೈನಲ್ಲಿರುವ ಸ್ಪೈಕ್ ಪ್ರೋಟೀನ್ ಅನ್ನು ಗುರುತಿಸಿ, ದೇಹದಲ್ಲಿ ಪ್ರತಿರಕ್ಷಣಾ ವ್ಯವಸ್ಥೆಯನ್ನು ಚುರುಕುಗೊಳಿಸುವ ನಿಟ್ಟಿನಲ್ಲಿ ಈ ಲಸಿಕೆ ತಯಾರಾಗಿದೆ. ಆದರೆ ಇತರೆ ಕೆಲ ಲಸಿಕೆಗಳು ಹಳೆಯ ಶೈಲಿಯಲ್ಲಿದ್ದು, ಕೊಲ್ಲಲ್ಪಟ್ಟ ವೈರಸ್ ನಿಂದ ತಯಾರಿಸಲಾಗಿದೆ.

English summary

Covid 19 Vaccine trials begins on Humans in Australia.