ಕುಲಭೂಷಣ್ ರನ್ನು ಇರಾನಿನಲ್ಲಿ ಅಪಹರಿಸಿ ಐಎಸ್ಐಗೆ ಮಾರಾಟ ಮಾಡಿದ್ದೇಗೆ?
ಇಸ್ಲಮಾಬಾದ್, ಜುಲೈ 20: ಕುಲಭೂಷಣ್ ಜಾಧವ್ ರನ್ನು ಉಗ್ರ ಸಂಘಟನೆ ಲಷ್ಕರ್ ಇ ಖೊರಸಾನ್ ಸೆರೆ ಹಿಡಿದಿತ್ತು. ನಂತರ ಪಾಕಿಸ್ತಾನ ಗುಪ್ತಚರ ಸಂಸ್ತೆ ಐಎಸ್ಐಗೆ ಮಾರಾಟ ಮಾಡಿತ್ತು ಎಂಬುದಾಗಿ ಬಲೂಚಿಸ್ತಾನದ ಸಾಮಾಜಿಕ ಕಾರ್ಯಕರ್ತ ಮೆಹ್ರಾವ್ ಸರ್ಜೋವ್ ಹೇಳಿದ್ದಾರೆ.
"ಜಾಧವ್ ಪಾಕಿಸ್ತಾನವನ್ನು ಅವರಾಗಿ ಪ್ರವೇಶವೇ ಮಾಡಿರಲಿಲ್ಲ. ಅವರನ್ನು ಐಎಸ್ಐಗೆ ಮಾರಾಟ ಮಾಡಲಾಗಿತ್ತು. ಜಾಧವ್ ಒಬ್ಬ ಗೂಢಚರ , ಭಯೋತ್ಪಾದನೆಯಲ್ಲಿ ತೊಡಗಿದ್ದ ಎಂಬುದೆಲ್ಲಾ ಸುಳ್ಳು. ಆತನನ್ನು ಇರಾನಿನಿಂದ ಅಪಹರಣ ಮಾಡಿ ಪಾಕಿಸ್ತಾನಕ್ಕೆ ಕರೆತರಲಾಗಿದೆ," ಎಂದು ಅವರು ಹೇಳಿದ್ದಾರೆ.
"ಜಾಧವ್ ಗೆ ಕೆಲವರು ಉದ್ಯಮದ ಆಫರ್ ನೀಡಿದ್ದರು. ನಂತರ ಜಾಧವ್ ಇರಾನಿನ ಸರವಣ್ ನಗರಕ್ಕೆ ಬಾಡಿಗೆ ಕಾರಿನಲ್ಲಿ ತೆರಳಿದ್ದರು. ಈ ಕಾರಿಕ್ಕೆ ಬಲೋಚಿಸ್ತಾನದ ಪ್ರತ್ಯೇಕತಾವಾದಿಯೊಬ್ಬ ಹತ್ತಿಕೊಂಡಿದ್ದ. ಹೀಗೆ ಸೆರೆಸಿಕ್ಕ ಜಾಧವ್ ಪಾಕಿಸ್ತಾನಕ್ಕೆ ಬಂದಿದ್ದರು," ಎಂದು ಸರ್ಜೋವ್ ಹೇಳಿದ್ದಾರೆ.
"ವಿದೇಶಿಯರ ಅಪಹರಣದಲ್ಲಿ ನಿಸ್ಸೀಮವಾಗಿರುವ ಲಷ್ಕರ್ ಇ ಖೊರಾಸಾನ್ ಈ ಕೃತ್ಯ ಎಸಗಿದೆ. ಅಪಹರಣ ನಡೆಸಿ ಜಾಧವ್ ರನ್ನು ಝಮಾರಣ್ ನಲ್ಲಿ ಮೂರುವಾರಗಳ ಕಾಲ ಇಡಲಾಗಿತ್ತು. ಕೊನೆಗೆ ಡೀಲ್ ಓಕೆ ಆದ ನಂತರ ಐಎಸ್ಐಗೆ ಮಾರಾಟ ಮಾಡಲಾಯಿತು," ಎಂದು ಅವರು ವಿವರ ನೀಡಿದ್ದಾರೆ.