ರಾಹುಲ್ ಗೆ ಶೇಮ್ ಶೇಮ್ ಎಂದ ಮಹಿಳಾ ಸಂಸದರು, ಇಸಿ ಕದ ತಟ್ಟಿದರು
ನವದೆಹಲಿ, ಡಿ 13: ಎಐಸಿಸಿ ಮಾಜಿ ಅಧ್ಯಕ್ಷ, ಸಂಸದ ರಾಹುಲ್ ಗಾಂಧಿಯವರ ವಿರುದ್ದ ಲೋಕಸಭೆಯಲ್ಲಿ ಮಹಿಳಾ ಸಂಸದರು ತಿರುಗಿಬಿದ್ದಿದ್ದಾರೆ. ಒಕ್ಕೂರಿಲಿನಿಂದ ಶೇಮ್..ಶೇಮ್ ಎಂದಿದ್ದಾರೆ.
"ಇದು ಮೇಕ್ ಇನ್ ಇಂಡಿಯಾ ಅಲ್ಲ, ರೇಪ್ ಇನ್ ಇಂಡಿಯಾ" ಎನ್ನುವ ವಿವಾದಕಾರಿ ಹೇಳಿಕೆಯನ್ನು ಜಾರ್ಖಂಡ್ ನ ಚುನಾವಣಾ ಸಭೆಯಲ್ಲಿ ರಾಹುಲ್ ಗಾಂಧಿ ಹೇಳಿದ್ದರು.
ಇದಕ್ಕೆ, ಲೋಕಸಭೆಯಲ್ಲಿ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದ ಬಿಜೆಪಿ ಸಂಸದೆಯರು, ಭಾರೀ ಪ್ರತಿಭಟನೆ ನಡೆಸಿದ್ದಾರೆ. ಜೊತೆಗೆ, ಚುನಾವಣಾ ಆಯೋಗಕ್ಕೆ ದೂರು ನೀಡಲು ಮುಂದಾಗಿದ್ದಾರೆ.
ಸ್ಮೃತಿ ಇರಾನಿ ಮತ್ತು ಬಿಜೆಪಿಯ ಮಹಿಳ ಘಟಕದ ಅಧ್ಯಕ್ಷೆ ಸರೋಜ್ ಪಾಂಡೆ ಸೇರಿದಂತೆ, ಎನ್ಡಿಎ ಮೈತ್ರಿಕೂಟದ ಮಹಿಳಾ ಸಂಸದರು, ಚುನಾವಣಾ ಆಯೋಗವನ್ನು ಭೇಟಿಯಾಗಿ, ದೂರು ನೀಡಲಿದ್ದಾರೆ.
'ಭಾರತಕ್ಕೆ ಅವಮಾನ ಮಾಡುವ, ಇಲ್ಲಿನ ಮಹಿಳೆಯರು, ಪುರುಷರಿಗೆ ಅವಮಾನ ಮಾಡುವ ಹೇಳಿಕೆಯನ್ನು ರಾಹುಲ್ ಗಾಂಧಿ ನೀಡಿದ್ದಾರೆ. ಅವರು ಈ ಕೂಡಲೇ ಕ್ಷಮೆ ಯಾಚಿಸಬೇಕು' ಎಂದು ಸ್ಮೃತಿ ಇರಾನಿ ಆಕ್ರೋಶ ವ್ಯಕ್ತಪಡಿಸಿದ್ದರು.
ಆದರೆ, 'ರೇಪ್ ಇನ್ ಇಂಡಿಯಾ' ಹೇಳಿಕೆಗೆ ಕ್ಷಮೆ ಯಾಚಿಸುವುದಿಲ್ಲ ಎಂದು ರಾಹುಲ್ ಗಾಂಧಿ ಹೇಳಿದ್ದಾರೆ. "ಪೌರತ್ವ ವಿಷಯದ ಗಮನವನ್ನು ಬೇರೆ ಕಡೆ ಸೆಳೆಯಲು, ನನ್ನ ಹೇಳಿಕೆಯನ್ನು ಬಿಜೆಪಿ ದೊಡ್ಡದಾಗಿ ಮಾಡಿ, ದಾರಿ ತಪ್ಪಿಸಲು ನೋಡುತ್ತಿದೆ" ಎಂದು ರಾಹುಲ್ ಗಾಂಧಿ ಹೇಳಿದ್ದಾರೆ.
Click it and Unblock the Notifications
Sign in with Google