54 ವರ್ಷದಿಂದ ನಾಗಾಲ್ಯಾಂಡ್ ವಿಧಾನಸಭೆಗೆ ಮಹಿಳೆಯ ಆಯ್ಕೆಯಾಗಿಲ್ಲ

Updated: Thursday, February 15, 2018, 16:56 [IST]

ಆ ರಾಜ್ಯ ಉದಯವಾಗಿ 54 ವರ್ಷವಾಗಿದೆ. ಈ ವರೆಗೆ 12 ಸಾರ್ವತ್ರಿಕ ವಿಧಾನಸಭೆ ಚುನಾವಣೆಗಳಾಗಿವೆ. ಆದರೆ ಈ ವರೆಗೆ ಒಬ್ಬ ಮಹಿಳೆ ಕೂಡ ಜನಪ್ರತಿನಿಧಿಯಾಗಿ ಆಯ್ಕೆ ಆಗಿಲ್ಲ. ಅಂದ ಹಾಗೆ ಈ ರಾಜ್ಯ ಯಾವುದು ಗೊತ್ತಾ? ನಾಗಾಲ್ಯಾಂಡ್. ಇಲ್ಲಿ ಈ ತಿಂಗಳ 27ನೇ ತಾರೀಕು ವಿಧಾನಸಭೆ ಚುನಾವಣೆ. ಮಾರ್ಚ್ 3ರಂದು ಫಲಿತಾಂಶ ಪ್ರಕಟವಾಗಲಿದೆ.

60 ಸದಸ್ಯ ಬಲದ ಇಲ್ಲಿನ ವಿಧಾನಸಭೆಗೆ 195 ಮಂದಿ ಸ್ಪರ್ಧಿಸುತ್ತಿದ್ದಾರೆ. ಈ ಪೈಕಿ ಐವರು ಮಹಿಳಾ ಸ್ಪರ್ಧಿಗಳಿದ್ದಾರೆ. ಇನ್ನು ಆಡಳಿತಾರೂಢ ಪಕ್ಷವಾದ ನಾಗಾ ಪೀಪಲ್ಸ್ ಫ್ರಂಟ್ ನಿಂದ ಈ ಬಾರಿ ಯಾವುದೇ ಮಹಿಳಾ ಅಭ್ಯರ್ಥಿ ಸ್ಪರ್ಧಿಸುತ್ತಿಲ್ಲ. ಈ ಬಗ್ಗೆ ಆ ಪಕ್ಷದ ಅಧ್ಯಕ್ಷರು ಇತ್ತೀಚೆಗೆ ಮಾತನಾಡಿ, ಯಾವುದೇ ಮಹಿಳೆ ಸ್ಪರ್ಧಿಸಲು ಆಸಕ್ತಿ ತೋರಿಲ್ಲ ಎಂದು ಹೇಳಿದ್ದಾರೆ.

ಬಿಜೆಪಿಯಿಂದ ಸ್ಪರ್ಧಿಸಿರುವ, ಮಾಜಿ ಸಚಿವರ ಪತ್ನಿ ರಖಿಲಾ, ಅಧಿಕಾರದಲ್ಲಿರುವ ಪುರುಷರು ಏನನ್ನು ಸಾಧಿಸಿ ತೋರಿಸಲು ಆಗಿಲ್ಲವೋ ಅದನ್ನು ನಾನು ಮಾಡಿ ತೋರಿಸುತ್ತೇನೆ ಎಂದು ಹೇಳುತ್ತಾರೆ. ಇನ್ನು ಈ ಬಾರಿ ನಾಗಾಲ್ಯಾಂಡ್ ವಿಧಾನಸಭೆಗೆ ಸ್ಪರ್ಧೆಯಲ್ಲಿರುವ ಐವರು ಮಹಿಳೆಯರು ಸಾಮಾಜಿಕ ಜಾಲತಾಣಗಳಲ್ಲಿ ತುಂಬ ಚೆನ್ನಾಗಿ ಪ್ರಚಾರ ಮಾಡುತ್ತಿದ್ದಾರೆ.