ಹಣದುಬ್ಬರ ದರ ವರ್ಷದಲ್ಲೇ ಕನಿಷ್ಠ; ತರಕಾರಿ-ಬೇಳೆಕಾಳುಗಳು ಸಸ್ತಾ

ನವದೆಹಲಿ, ನವೆಂಬರ್ 12: ಚಿಲ್ಲರೆ ಹಣದುಬ್ಬರವು ಅಕ್ಟೋಬರ್ ನಲ್ಲಿ ಒಂದು ವರ್ಷದ ಕನಿಷ್ಠ ಮಟ್ಟವಾದ 3.31%ಗೆ ತಲುಪಿದೆ. ಇದರಿಂದ ಅಡುಗೆ ಮನೆಗೆ ಬೇಕಾದ ಆಹಾರ ಪದಾರ್ಥಗಳು, ಹಣ್ಣು ಹಾಗೂ ಪ್ರೊಟೀನ್ ಸಮೃದ್ಧವಾದ ಪದಾರ್ಥಗಳ ಬೆಲೆ ಅಗ್ಗವಾಗಿದೆ ಎಂದು ಸೋಮವಾರ ಬಿಡುಗಡೆಯಾದ ಅಧಿಕೃತ ದತ್ತಾಂಶಗಳು ಮಾಹಿತಿ ನೀಡಿವೆ.

ಹಣದುಬ್ಬರವು ಗ್ರಾಹಕ ಬೆಲೆ ಸೂಚ್ಯಂಕದ (CPI) ಮೇಲೆ ಅವಲಂಬಿತವಾಗಿದ್ದು, ಸೆಪ್ಟೆಂಬರ್ 2018ರಲ್ಲಿ 3.7% ಇತ್ತು. ಅಕ್ಟೋಬರ್ 2017ರಲ್ಲಿ 3.58% ಇತ್ತು. ಚಿಲ್ಲರೆ ಹಣದುಬ್ಬರವು ಸೆಪ್ಟೆಂಬರ್ 2017ರಲ್ಲಿ 3.28% ತಲುಪಿತ್ತು. ಆ ನಂತರ ತಲುಪಿದ ಕನಿಷ್ಠ ಮಟ್ಟ ಈಗಿನದಾಗಿದೆ.

ಆಹಾರ ಪದಾರ್ಥಗಳ ಬೆಲೆ ಏರಿಕೆ ಪ್ರಮಾಣವು ಅಕ್ಟೋಬರ್ ನಲ್ಲಿ 0.86% ಆದರೆ, ಸೆಪ್ಟೆಂಬರ್ ನಲ್ಲಿ 0.51% ಏರಿಕೆ ಆಗಿತ್ತು ಎಂದು ಕೇಂದ್ರ ಸಾಂಖ್ಯಿಕ ಇಲಾಖೆ ಮಾಹಿತಿ ನೀಡಿದೆ. ತರಕಾರಿಗಳ ಬೆಲೆಗಳು ಅಕ್ಟೋಬರ್ ನಲ್ಲಿ 8.06% ಕಡಿಮೆಯಾಗಿದ್ದರೆ, ಸೆಪ್ಟೆಂಬರ್ ನಲ್ಲಿ 4.15% ಕಡಿಮೆಯಾಗಿತ್ತು. ಹಣ್ಣುಗಳ ಹಣದುಬ್ಬರವು 0.35% ಇಳಿಕೆಯಾಗಿದ್ದು, ತಿಂಗಳ ಹಿಂದೆ ಈ ಪ್ರಮಾಣ 1.12% ದಾಖಲಾಗಿತ್ತು.

ಪ್ರೊಟೀನ್ ಯುಕ್ತವಾದ ಬೇಳೆ ಕಾಳುಗಳು, ಮೊಟ್ಟೆ, ಹಾಲು ಮತ್ತಿತರ ಪದಾರ್ಥಗಳ ಚಿಲ್ಲರೆ ಹಣದುಬ್ಬರ ಕೂಡ ಇಳಿಕೆ ಆಗಿದೆ. ಆದರೆ ಕಳೆದ ತಿಂಗಳು 8.47% ಇದ್ದ ಇಂಧನ ಹಾಗೂ ವಿದ್ಯುಚ್ಛಕ್ತಿ ವರ್ಗದ ಹಣದುಬ್ಬರವು ಈ ತಿಂಗಳು 8.55%ಗೆ ಏರಿಕೆ ಕಂಡಿದೆ.

English summary

Retail inflation fell to a one-year low of 3.31% in October on the back of cheaper kitchen staples, fruits and protein-rich items, official data released Monday showed.