ಸಣ್ಣ ಉದ್ಯಮಗಳಿಗೆ ದೀಪಾವಳಿ ಗಿಫ್ಟ್!: 59 ನಿಮಿಷದಲ್ಲಿ ಸಿಗಲಿದೆ ಸಾಲ

ನವದೆಹಲಿ, ನವೆಂಬರ್ 2: ಸಣ್ಣ ಉದ್ಯಮಿಗಳಿಗೆ ನೆರವು ನೀಡುವ ಉದ್ದೇಶದಿಂದ ಪ್ರಧಾನಿ ನರೇಂದ್ರ ಮೋದಿ ಅವರು ಶುಕ್ರವಾರ 59 ನಿಮಿಷಗಳ ಸಾಲ ಯೋಜನೆಗೆ ಚಾಲನೆ ನೀಡಿದ್ದಾರೆ.

ಅತಿ ಸಣ್ಣ, ಸಣ್ಣ ಮತ್ತು ಮಧ್ಯಮ ಸಾಹಸೋದ್ಯಮಿಗಳಿಗೆ ಉತ್ತೇಜನ ಮತ್ತು ಸಹಾಯ ಹಸ್ತ ಚಾಚುವ ಕೇಂದ್ರ ಸರ್ಕಾರದ ಯೋಜನೆಯ ಭಾಗವಾಗಿ ಸಣ್ಣ ಉದ್ಯಮಿಗಳಿಗೆ (ಎಂಎಸ್ಎಂಇ) ಇತರೆ ರೀತಿಯ ನೆರವುಗಳನ್ನು ನೀಡುವ ಕಾರ್ಯಕ್ರಮಕ್ಕೂ ಅವರು ಚಾಲನೆ ನೀಡಿದರು.

ಸಣ್ಣ ಉದ್ಯಮ ವಲಯಕ್ಕೆ ನೆರವು ನೀಡುವ 12 ಹೊಸ ನಿರ್ಧಾರಗಳ ಭಾಗವಾಗಿರುವ ಈ ಯೋಜನೆಗಳನ್ನು ಎಂಎಸ್ಎಂಇಗೆ ನೀಡುತ್ತಿರುವ ದೀಪಾವಳಿಯ ಕೊಡುಗೆ ಎಂದು ಮೋದಿ ವಿಶ್ಲೇಷಿಸಿದರು.

ಎಂಎಸ್ಎಂಇ ಉದ್ಯಮಿಗಳು ತಮ್ಮ ಉದ್ಯಮದಲ್ಲಿ ಹೂಡಿಕೆ ಮಾಡಲು ಕೇವಲ 59 ನಿಮಿಷದ ಒಳಗೆ 1 ಕೋಟಿ ರೂ. ಸಾಲ ಸೌಲಭ್ಯ ಪಡೆಯಲು ನೆರವು ನೀಡುವಂತಹ ಈ ಮಹತ್ವಾಕಾಂಕ್ಷಿ ಯೋಜನೆ ದೇಶದ 100 ಪ್ರದೇಶಗಳಲ್ಲಿ ಚಾಲನೆ ಪಡೆದುಕೊಂಡಿದೆ.

ಈ ಎಲ್ಲ ಪ್ರದೇಶಗಳು ರಾಜಧಾನಿ ನವದೆಹಲಿಯಲ್ಲಿರುವ ಕೇಂದ್ರ ವ್ಯವಸ್ಥೆಯೊಂದಿಗೆ ನಂಟು ಹೊಂದಿರಲಿವೆ. ಈ ಯೋಜನೆ 100 ದಿನಗಳವರೆಗೆ ಚಾಲ್ತಿಯಲ್ಲಿರಲಿದ್ದು, ಏಪ್ರಿಲ್-ಮೇನಲ್ಲಿ ಸಾರ್ವತ್ರಿಕ ಚುನಾವಣೆ ಬರಲಿರುವುದರಿಂದ ಅದಕ್ಕೂ ಮುನ್ನವೇ ಅಂತ್ಯಗೊಳ್ಳಲಿದೆ.

I dedicate 59 minute loan approval portal to you & it has started benefiting the MSMEs businessmen already: PM Modi at the launch event of the Union Government’s Support and Outreach Initiative for Micro, Small and Medium Enterprises (MSMEs). pic.twitter.com/vPnhHBlL4p

— ANI (@ANI) 2 November 2018

ಮೊದಲ ಹಂತದಲ್ಲಿ ಸರ್ಕಾರವು ದೇಶದೆಲ್ಲೆಡೆ 78 ಎಂಎಸ್‌ಎಂಇ ಕ್ಲಸ್ಟರ್‌ಗಳನ್ನು ತಲುಪುವ ಉದ್ದೇಶ ಹೊಂದಿದೆ. ಎಂಎಸ್ಎಂಇಗಳಿಗೆ ಸಾಲ ಒದಗಿಸಲು ಈ ಸ್ಥಳಗಳಲ್ಲಿ ಬ್ಯಾಂಕ್ ಅಧಿಕಾರಿಗಳನ್ನು ನಿಯೋಜಿಸಲಾಗುತ್ತದೆ. ಇದಕ್ಕಾಗಿ ಪಿಎಸ್‌ಬಿ ಲೋನ್ಸ್ ಇನ್ 59 ಮಿನಿಟ್ಸ್ ಡಾಟ್ ಕಾಂ ಎಂಬ ಹೊಸ ವೆಬ್‌ಸೈಟ್ ಆರಂಭಿಸಲಾಗಿದೆ.

ಭಾರತೀಯ ಸಣ್ಣ ಕೈಗಾರಿಕಾ ಅಭಿವೃದ್ಧಿ ಬ್ಯಾಂಕು ಮತ್ತು ಸಾರ್ವಜನಿಕ ವಲಯದ ಐದು ಬ್ಯಾಂಕುಗಳಾದ- ಎಸ್‌ಬಿಐ, ಬ್ಯಾಂಕ್ ಆಫ್ ಬರೋಡಾ, ಪಂಜಾಬ್ ನ್ಯಾಷನಲ್ ಬ್ಯಾಂಕ್, ವಿಜಯಾ ಬ್ಯಾಂಕ್ ಹಾಗೂ ಇಂಡಿಯನ್ ಬ್ಯಾಂಕ್‌ಗಳ ಅನುಮೋದನೆ ಪಡೆದುಕೊಳ್ಳಲು ಈ ವೆಬ್‌ಪೋರ್ಟಲ್ ತೆರೆಯಲಾಗಿದೆ.

English summary

Prime Minister Narendra Modi has launched 59 minute loan programme as a part of the centre's MSMEs support outreach.