ಗ್ರಾಹಕರಿಗೆ ತುಸು ನೆಮ್ಮದಿ ನೀಡಿತು ಚಿನ್ನ, ಬೆಳ್ಳಿ ಬೆಲೆ ಕುಸಿತ

ನವದೆಹಲಿ, ಅಕ್ಟೋಬರ್ 5: ಸ್ಥಳೀಯ ಆಭರಣ ವರ್ತಕರಿಂದ ಬೇಡಿಕೆ ಕಡಿಮೆಯಾಗಿದ್ದು, ವಿದೇಶಿ ಮಾರುಕಟ್ಟೆಯಲ್ಲಿ ಜಡವಾಗಿದ್ದರ ನಡುವೆಯೇ, ಚಿನ್ನದ ಬೆಲೆಯಲ್ಲಿ ಶುಕ್ರವಾರ 250 ರೂ.ನಷ್ಟು ಇಳಿಕೆಯಾಗಿದ್ದು, 10 ಗ್ರಾಂ ಚಿನ್ನ 31,850 ರೂ.ಗೆ ಕುಸಿದಿದೆ.

ಬೆಳ್ಳಿ ಬೆಲೆಯಲ್ಲಿಯೂ 100 ರೂ. ಕುಸಿತವಾಗಿದ್ದು, ಕೆ.ಜಿ.ಗೆ 39,250 ರೂ.ಗೆ ತಗ್ಗಿದೆ. ಕೈಗಾರಿಕಾ ಘಟಕಗಳು ಮತ್ತು ಕಾಯಿನ್ ತಯಾರಕರು ಖರೀದಿ ಸ್ಥಗಿತಗೊಳಿಸಿದ ಹಿನ್ನೆಲೆಯಲ್ಲಿ ದರ ಕುಸಿತವಾಗಿದೆ.

ವರ್ತಕರ ಪ್ರಕಾರ, ಸ್ಥಳೀಯ ಚಿನಿವಾರ ಪೇಟೆಯಲ್ಲಿನ ಬೇಡಿಕೆ ಕುಸಿತ ಹಾಗೂ ವಿದೇಶಗಳಲ್ಲಿನ ದುರ್ಬಲಗೊಂಡ ವಹಿವಾಟು ಚಿನ್ನದ ಬೆಲೆಯ ಕುಸಿತಕ್ಕೆ ಕಾರಣ.

ಎರಡು ದಿನಗಳ ಹಿಂದಷ್ಟೇ ಚಿನ್ನದ ಬೆಲೆಯಲ್ಲಿ ಹೆಚ್ಚಳವಾಗಿತ್ತು. ಆದರೆ, ಈಗ ದಿಢೀರ್ ಕುಸಿತ ಕಂಡಿದೆ.

ಸಿಂಗಪುರದಲ್ಲಿ ಶುಕ್ರವಾರ ಔನ್ಸ್‌ಗೆ 1,199.40 ಡಾಲರ್ ನಿಂದ ಶೇ 0.16ರಷ್ಟು ಇಳಿಕೆಯಾಗಿದೆ. ಬೆಳ್ಳಿ ಬೆಲೆಯೂ ಶೇ 0.03ರಷ್ಟು, ಅಂದರೆ 14.64 ಡಾಲರ್‌ನಷ್ಟು ಕುಸಿದಿದೆ.

ರಾಜಧಾನಿ ದೆಹಲಿಯಲ್ಲಿ 99.9% ಹಾಗೂ 99.5% ಶುದ್ಧತೆಯ ಚಿನ್ನದ ಬೆಲೆಯಲ್ಲಿ 250 ರೂಪಾಯಿ ಇಳಿಕೆಯಾಗಿ, ಪ್ರತಿ 10 ಗ್ರಾಮ್ ಗೆ ಕ್ರಮವಾಗಿ 31,850 ಮತ್ತು 31,700 ರೂಪಾಯಿ ತಲುಪಿದೆ. ಎರಡು ದಿನಗಳ ಹಿಂದೆ ಚಿನ್ನದ ಬೆಲೆಯಲ್ಲಿ 625 ರೂಪಾಯಿ ಏರಿಕೆಯಾಗಿತ್ತು.

ಸವರನ್ ಚಿನ್ನ (ಎಂಟು ಗ್ರಾಂ) 24,600ರಲ್ಲಿ ಸ್ಥಿರವಾಗಿದೆ.

ರಾಜಧಾನಿಯಲ್ಲಿ ಸಿದ್ಧ ಬೆಳ್ಳಿ ಮತ್ತು ವಾರ ಆಧಾರಿತ ಬೆಳ್ಳಿ ತಲಾ 100 ರೂ. ಮೌಲ್ಯ ಕಳೆದುಕೊಂಡಿದ್ದು, ಕೆ.ಜಿ. ತೂಕಕ್ಕೆ ಕ್ರಮವಾಗಿ 39,250 ರೂ. ಮತ್ತು 38,845 ರೂ. ಇದೆ.

ಬೆಳ್ಳಿ ನಾಣ್ಯಗಳಲ್ಲಿ ಬದಲಾವಣೆಯಾಗಿಲ್ಲ. 100 ನಾಣ್ಯಗಳಿಗೆ 73,000 ರೂ. ಖರೀದಿ ಹಾಗೂ 74,000 ರೂ. ಮಾರಾಟ ದರ ಹೊಂದಿದೆ.

English summary

Gold prices fell by Rs 250 per gram and silver prices by Rs 100 per KG on Friday.