ಪ್ರಧಾನಿ ಪಟ್ಟ ಬೇಕೆಂದು ರಾಹುಲ್ ಗಾಂಧಿ ಎಂದಿಗೂ ಹೇಳಿಲ್ಲ: ಕಮಲ್ ನಾಥ್

ಭೋಪಾಲ್, ಡಿಸೆಂಬರ್ 17: ರಾಹುಲ್ ಗಾಂಧಿಯವರೇ ದೇಶದ ಪ್ರಧಾನಿಯಾಗಬೇಕು ಎಂದು ಡಿಎಂಕೆ ಮುಖಂಡ ಎಂ ಕೆ ಸ್ಟಾಲಿನ್ ನೀಡಿದ ಹೇಳಿಕೆಗೆ ಮಧ್ಯಪ್ರದೇಶದ ನಿಯೋಜಿತ ಮುಖ್ಯಮಂತ್ರಿ ಕಮಲ್ ನಾಥ್ ಪ್ರತಿಕ್ರಿಯೆ ನೀಡಿದ್ದಾರೆ.

"ಪ್ರಧಾನಿ ಯಾರಾಗಬೇಕೆಂದು ಯೋಚಿಸುವುದಕ್ಕೆ ಇದು ಸರಿಯಾದ ಸಮಯವಲ್ಲ. ಆ ಬಗ್ಗೆ ಕಾಂಗ್ರೆಸ್ ಇನ್ನೂ ಯೋಚಿಸಿಲ್ಲ. ಸ್ವತಃ ರಾಹುಲ್ ಗಾಂಧಿಯವರೂ ತಾವೇ ಪ್ರಧಾನಿಯಾಗಬೇಕೆಂದು ಎಂದಿಗೂ ಹೇಳಿಲ್ಲ" ಎಂದು ಖಾಸಗಿ ಚಾನೆಲ್ ವೊಂದಕ್ಕೆ ಕಮಲ್ ನಾಥ್ ಪ್ರತಿಕ್ರಿಯೆ ನೀಡಿದರು.

"ಕಾಂಗ್ರೆಸ್ ಜೊತೆ ಮೈತ್ರಿ ಮಾಡಿಕೊಂಡಿರುವ ಕೆಲವು ಪಕ್ಷಗಳು ರಾಹುಲ್ ಗಾಂಧಿ ಅವರನ್ನು ಪ್ರಧಾನಿ ಅಭ್ಯರ್ಥಿ ಎನ್ನುತ್ತಿದೆಯಷ್ಟೆ. ಕಾಂಗ್ರೆಸ್ ಎಂದಿಗೂ ಈ ಬಗ್ಗೆ ಅಧಿಕೃತವಾಗಿ ಹೇಳಿಲ್ಲ" ಎಂದು 72 ವರ್ಷ ವಯಸ್ಸಿನ ಕಮಲ್ ನಾಥ್ ಹೇಳಿದ್ದಾರೆ.

"ಪ್ರಧಾನಿ ಯಾರು ಎಂಬ ಬಗ್ಗೆ ಲೋಕಸಭಾ ಚುನಾವಣೆಯ ನಂತರ ಏರ್ಪಡುವ ಸನ್ನಿವೇಶವನ್ನು ಆಧರಿಸಿ ನಿರ್ಧರಿಸಬೇಕಿದೆ. ಎಲ್ಲಾ ನಾಯಕರೂ ಒಗ್ಗಟ್ಟಿನಿಂದ ಒಂದು ಹೆಸರನ್ನು ಆರಿಸಿದರೆ ಅದಕ್ಕೆ ಬೆಂಬಲವಿರುತ್ತದೆ. ಅದಕ್ಕೂ ಮುನ್ನವೇ ಪ್ರಧಾನಿ ಯಾರು ಎಂಬ ಬಗ್ಗೆ ನಿರ್ಧರಿಸುವುದು ಅಪ್ರಬುದ್ಧವೆನ್ನಿಸುತ್ತದೆ" ಎಂದು ಕಮಲ್ ನಾಥ್ ಹೇಳಿದರು.

ಇದಕ್ಕೂ ಮುನ್ನ ಡಿಎಂಕೆ ಪಕ್ಷದ ನಾಯಕ ಎಂ ಕೆ ಸ್ಟಾಲಿನ್, 'ರಾಹುಲ್ ಗಾಂಧಿ ಅವರು ಪ್ರಧಾನಿಯಾಗಬೇಕು' ಎಂಬ ಹೇಳಿಕೆ ನೀಡಿದ್ದರು.

English summary

Congress president Rahul Gandhi never said he wants the prime minister's post, Congress leader Kamal Nath Said to media.