ವಿರೂಪರೇ, ಮರುಸೌಂದರ್ಯಕ್ಕಾಗಿ ವಿಕ್ಟೋರಿಯಾಕ್ಕೆ ತೆರಳಿ
ಬೆಂಗಳೂರು, ಅಕ್ಟೋಬರ್, 13 : ಬೆಂಕಿ ಅವಘಡ, ರಸ್ತೆ ಅಪಘಾತ, ಆಸಿಡ್ ದಾಳಿ, ವಿವಿಧ ಚರ್ಮ ಕಾಯಿಲೆಗಳಿಗೆ ತುತ್ತಾಗಿ ಚರ್ಮದ ಸೌಂದರ್ಯ ಹಾಳಾಗಿದೆಯೇ? ನಿಮ್ಮ ವಿರೂಪತೆ ನಿಮ್ಮನ್ನು ಗಾಢವಾಗಿ ಕಾಡುತ್ತಿದೆಯಾ?ಹಾಗಾದರೆ ಚರ್ಮದ ಕುರಿತಾಗಿ ನಿಮಗಿರುವ ಬೇಸರ ಕಡಿಮೆಯಾಗಲು ನವೆಂಬರ್ ತಿಂಗಳವರೆಗೆ ನೀವು ಕಾಯಲೇಬೇಕು.
ರಾಜ್ಯದಲ್ಲಿ ಮೊದಲ ಬಾರಿಗೆ ನಗರ ವಿಕ್ಟೋರಿಯಾ ಆಸ್ಪತ್ರೆಯಲ್ಲಿ ಚರ್ಮ ಬ್ಯಾಂಕ್ ಸ್ಥಾಪನೆ ಮಾಡಲು ನಿರ್ಧರಿಸಲಾಗಿದ್ದು, ನವೆಂಬರ್ ತಿಂಗಳಲ್ಲಿ ಲೋಕಾರ್ಪಣೆಗೊಳ್ಳಲಿದೆ. ಇಲ್ಲಿ ರಕ್ತದಾನ, ಅಂಗಾಂಗ ದಾನಗಳಂತೆ ಚರ್ಮದಾನಕ್ಕೂ ಅವಕಾಶ ಸಿಗಲಿದೆ. ಇದರಿಂದ ವಿರೂಪಗೊಂಡ ಚರ್ಮಗಳಿಗೆ ಹೊಸ ಕಾಂತಿ ದೊರೆಯುವ ಎಲ್ಲಾ ಭರವಸೆಗಳು ಗೋಚರವಾಗುತ್ತಿದೆ.[ಚರ್ಮದಾನ ಅಭಿಯಾನಕ್ಕೆ ನಟ ಪ್ರೇಮ್ ರಿಂದ ಚಾಲನೆ]
ಹೊಸ ಚರ್ಮ ಬ್ಯಾಂಕ್ ನಿರ್ಮಾಣ ಮಾಡಲು ಬೆಂಗಳೂರು ವೈದ್ಯ ಕಾಲೇಜು ಹಾಗೂ ಸಂಶೋಧನಾ ಸಂಸ್ಥೆ (ಬಿಎಂಸಿಆರ್ ಐ) ಮತ್ತು ರೋಟರಿ ಕ್ಲಬ್ ಗಳ ನಡುವೆ ಒಪ್ಪಂದ ಮಾಡಿಕೊಳ್ಳಲಾಗಿದ್ದು, ಅಗತ್ಯ ಉಪಕರಣಗಳನ್ನು ರೋಟರಿ ಕ್ಮಬ್ ಒದಗಿಸಲಿದೆ ಕೇಂದ್ರದ ನಿರ್ವಹಣೆ ಹಾಗೂ ಅಗತ್ಯ ಮಾನವ ಸಂಪನ್ಮೂಲ ದೊರಕಿಸುವ ಹೊಣೆಯನ್ನು ಬಿಎಂಸಿಆರ್ ಐ ಹೊರಲಿದೆ. ತಜ್ಞ ವೈದ್ಯರಿಗೆ ಈಗಾಗಲೇ ತರಬೇತಿ ನೀಡಲಾಗುತ್ತಿದೆ.
ಚರ್ಮದಾನ ಮಾಡುವವರು ಇದನ್ನು ನೆನಪಿನಲ್ಲಿಡಿ :
* ಚರ್ಮದಾನ ಮಾಡುವ ವ್ಯಕ್ತಿಗೆ 18 ವರ್ಷ ತುಂಬಿರಬೇಕು.
* ಎಚ್ಐವಿ ಸೋಂಕು, ವಿವಿಧ ಚರ್ಮರೋಗಗಗಳಿರುವ ವ್ಯಕ್ತಿಗಳಿಂದ ಚರ್ಮ ಸ್ವೀಕರಿಸುವುದಿಲ್ಲ.
* ಮೃತ ವ್ಯಕ್ತಿಯ 6 ಗಂಟೆಗಳೊಳಗೆ ಚರ್ಮ ಸಂಗ್ರಹಿಸಬೇಕು
* ದಾನ ಪಡೆದ ಚರ್ಮವನ್ನು ಕೋಲ್ಡ್ ಸ್ಟೋರೇಜ್ ನಲ್ಲಿ 3-4 ವಾರ ಮಾತ್ರ ಸಂಗ್ರಹಿಸಲಾಗುವುದು
* 50% ಹೆಚ್ಚು ಸುಟ್ಟ ಚರ್ಮಕ್ಕೆ ಮಾತ್ರ ಹೊಸ ಚರ್ಮ ನೀಡಲಾಗುತ್ತದೆ.[ಹುಡುಗಿ ಜೀನ್ಸ್ ಧರಿಸಿದರೆ ಆಸಿಡ್ ದಾಳಿ ಗ್ಯಾರಂಟಿ!]
ಪ್ರಸ್ತುತ ಎಲ್ಲೆಲ್ಲಿವೆ ಚರ್ಮ ಬ್ಯಾಂಕ್?
ಮುಂಬೈನಲ್ಲಿ ನ್ಯಾಷನಲ್ ಬರ್ನ್ಸ್ ಸೆಂಟರ್, ಚೆನ್ನೈನಲ್ಲಿ ಸ್ಕಿನ್ ಬರ್ನ್ ಕೇರ್ ಸೆಂಟರ್ ಪ್ರಸ್ತು ಕಾರ್ಯನಿರ್ವಹಿಸುತ್ತಿದ್ದು, ವಿಕ್ಟೋರಿಯಾ ಆಸ್ಪತ್ರೆ ದೇಶದ ಮೂರನೇ ಸ್ಕಿನ್ ಬರ್ನ್ ಸೆಂಟರ್ ಎಂಬ ಹೆಗ್ಗಳಿಕೆ ಇದು ಪಾತ್ರವಾಗಲಿದೆ.