ಇಲ್ಲದ ಪರವಾನಗಿ, ನಿಲ್ಲದ ಸಂಗೀತ, 400 ಬಾರ್‌, ಪಬ್‌ಗಳಿಗೆ ನೋಟಿಸ್‌

ಬೆಂಗಳೂರು, ಜು.18: ಸಾರ್ವಜನಿಕರಿಗೆ ಕಿರಿಕಿರಿ ಉಂಟು ಮಾಡುತ್ತಿರುವ ಹಾಗೂ ಪರವಾನಗಿ ಪಡೆಯದೆ ಸಂಗೀತ ಹಾಕುತ್ತಿರುವ ನಗರದ 400 ಕ್ಕೂ ಹೆಚ್ಚು ಬಾರ್‌ಗಳಿಗೆ ನೋಟಿಸ್ ನೀಡಿರುವುದಾಗಿ ನಗರ ಪೊಲೀಸ್‌ ಆಯುಕ್ತ ಸುನೀಲ್‌ ಕುಮಾರ್‌ ತಿಳಿಸಿದ್ದಾರೆ.

ಸಾರ್ವಜನಿಕರ ಮನೋರಂಜನೆ ಸ್ಥಳ ನಿಯಂತ್ರಣ ಮತ್ತು ಪರವಾನಗಿ ಕುರಿತು ಬೆಂಗಳೂರು ಪೊಲೀಸರ ಆದೇಶವನ್ನು 2018ರ ಜನವರಿಯಲ್ಲಿ ಸುಪ್ರೀಂಕೋರ್ಟ್ ಎತ್ತಿಹಿಡಿದಿತ್ತು. ಅದರ ಪಾಲನೆಗಾಗಿ 400 ಮಾಲೀಕರಿಗೆ ನೋಟಿಸ್‌ ನೀಡಲಾಗಿದೆ. ನೋಟಿಸ್ ಸ್ವೀಕರಿಸಿದ 15 ದಿನಗಳಲ್ಲಿ ಪರವಾನಗಿ ಪಡೆಯಬೇಕೆಂದು ತಿಳಿಸಲಾಗಿದೆ ಎಂದರು.

ಅಗ್ನಿಶಾಮಕ ಇಲಾಖೆ, ಬಿಬಿಎಂಪಿ ಸೇರಿ ವಿವಿಧ ಇಲಾಖೆಯಿಂದ 10 ಪರವಾನಗಿ ಮತ್ತು ನಿರಪೇಕ್ಷಣಾ ಪತ್ರ ಪಡೆಯಬೇಕಿದೆ. ಆದರೆ ಕೆಲವರು ಬಾರ್‌ ಅಂಡ್ ರೆಸ್ಟೋರೆಂಟ್‌ ಕಾನೂನಿನ ಅನ್ವಯ ಪರವಾನಗಿ ಪಡೆದು ಸಂಗೀತ ಹಾಕುತ್ತಾರೆ. ಇದರಿಂದ ಜನಜೀವನಕ್ಕೆ ಅಡ್ಡಿ ಉಂಟಾಗುತ್ತಿದೆ. ಇದನ್ನು ಅರಿತು ಪಬ್‌, ಲೈವ್‌ ಬ್ಯಾಂಡ್‌, ಬಾರ್‌ ಅಂಡ್ ರೆಸ್ಟೋರೆಂಟ್‌ ಇನ್ನಿತರೆ ಮಳಿಗೆಗಳ ಮಾಲೀಕರಿಗೆ ನೋಡಿಸ್‌ ನೀಡಲಾಗಿದೆ.

15 ದಿನಗಳಲ್ಲಿ ಪರವಾನಗಿ ಪಡೆದು ಸ್ಥಳೀಯ ಠಾಣೆಗೆ ಹಾಜರು ಪಡಿಸಬೇಕು. ಲೈವ್‌ ಬ್ಯಾಂಡ್‌ ಪ್ರದರ್ಶನ ಸ್ಥಗಿತಗೊಳಿಸಬೇಕು. ಇಲ್ಲವಾದರೆ ಕಾನೂನು ಕ್ರಮ ಕೈಗೊಳ್ಳಲಾಗುವುದು , ಅವಧಿ ಅಂತ್ಯವಾಗಿರುವವರ ವಿರುದ್ಧ ಶಿಸ್ತು ಕ್ರಮ ತೆಗೆದುಕೊಳ್ಳಲಾಗುತ್ತದೆ. ಅಕ್ರಮವಾಗಿ ಮನೋರಂಜನಾ ಸ್ಥಳವೆಂದು ಸಂಗೀತ ಹಾಕುವವರನ್ನು ಪತ್ತೆ ಹಚ್ಚಿ ಕ್ರಮ ತೆಗೆದುಕೊಳ್ಳಲಾಗುತ್ತದೆ ಎಂದು ತಿಳಿಸಿದರು.

English summary

Police have issued notices to as many as 400 pubs, bars, restaurants and other commercial establishments in the city to obtain a licence to play music. Bengaluru Police Commissioner T Suneel Kumar invoked provisions of the Licensing and Controlling Places of Public Entertainment (Bengaluru City) Order, 2005.