ಬೆಂಗಳೂರು ಮೂಲದ ವಿಜ್ಞಾನಿಗೆ ಅಮೆರಿಕದಲ್ಲಿ ಪ್ರತಿಷ್ಠಿತ ಪ್ರಶಸ್ತಿ
ಬೆಂಗಳೂರು, ಆಗಸ್ಟ್ 14: ಭಾರತೀಯ ಮೂಲದ ವಿಜ್ಞಾನಿ ಸುಬಿರ್ ಸಚ್ದೇವ್ ಅವರಿಗೆ ದಿ ಇಂಟರ್ನಾಶ್ನಲ್ ಸೆಂಟರ್ ಫಾರ್ ಥಿಯರೆಟಿಕಲ್ ಫಿಸಿಕ್ಸ್ (ಐಸಿಟಿಪಿ) ಕೊಡಮಾಡುವ ಪಾಲ್ ಡೈರಾಕ್ ಪ್ರತಿಷ್ಠಿತ ಪ್ರಶಸ್ತಿ ಲಭಿಸಿದೆ.
ಹಾರ್ವರ್ಡ್ ವಿಶ್ವವಿದ್ಯಾಲಯದಲ್ಲಿ ಪ್ರೊಫೆಸರ್ ಆಗಿರುವ ಸಚ್ದೇವ್ ಅವರು ತಮ್ಮ ಪ್ರಾಥಮಿಕ, ಪ್ರೌಢ ವಿದ್ಯಾಭ್ಯಾಸ ಮಾಡಿದ್ದು ಕರ್ನಾಟಕದ ರಾಜಧಾನಿ ಬೆಂಗಳೂರಿನಲ್ಲಿ ಎಂಬುದು ಕನ್ನಡಿಗರು ಹೆಮ್ಮೆ ಪಡುವ ವಿಷಯ.
ಸೈದ್ಧಾಂತಿಕ ಭೌತಶಾಸ್ತ್ರಕ್ಕೆ ಸಚ್ದೇವ್ ಅವರು ನೀಡಿದ ಗಣನೀಯ ಕೊಡುಗೆಯನ್ನು ಪರಿಗಣಿಸಿ ಈ ಪ್ರಶಸ್ತಿಯನ್ನು ನೀಡಲಾಗಿದೆ. ಬ್ರಿಟಿಷ್ ವಿಜ್ಞಾನಿ ಪಾಲ್ ಅಡ್ರೇನ್ ಮೌರಿಸ್ ಡೈರಾಕ್ ಅವರು ಹೆಸರಿನಲ್ಲಿ ಕೊಡಮಾಡುವ ಈ ಪ್ರಶಸ್ತಿಯನ್ನು ಭೌತಶಾಸ್ತ್ರ ಲೋಕಕ್ಕೆ ಕೊಡುಗೆ ನೀಡಿದ ವಿಜ್ಞಾನಿಗಳಿಗೆ ನೀಡಲಾಗುತ್ತದೆ.
ಬೆಂಗಳೂರಿನ ಕೇಂದ್ರೀಯ ವಿದ್ಯಾಲಯದಲ್ಲಿ ಓದು ಮುಗಿಸಿದ್ದ ಸಚ್ದೇವ್ ಅವರು ನಂತರ ದೆಹಲಿಯ ಐಐಟಿಯಲ್ಲಿಯೂ ಓದಿದರು. 1984 ರಲ್ಲಿ ಹಾರ್ವರ್ಡ್ ವಿಶ್ವವಿದ್ಯಾಲಯಕ್ಕೆ ತೆರಳಿದ ಅವರು, ಇಲ್ಲಿಯೇ ಪಿಎಚ್ ಡಿ ಪದವಿ ಪಡೆದರು.
2014 ರಲ್ಲಿ ಅಮೆರಿಕನ್ ಫಿಸಿಕಲ್ ಸೊಸೈಟಿಯಿಂದ ಲಾರ್ಸ್ ಒನ್ಸಗಾರ್ ಪ್ರಶಸ್ತಿ ಪಡೆದ ಸಚ್ದೇವ್ ಈ ಭಾರಿಯ ಪಾಲ್ ಡೈರಕ್ ಪ್ರಶಸ್ತಿಯನ್ನು ಮುಡಿಗೇರಿಸಿಕೊಂಡಿದ್ದಾರೆ.
Click it and Unblock the Notifications
Sign in with Google