'ಆಫೀಸ್ ಸಮಯದ ಬಳಿಕ ನೋ ಮೆಸೇಜ್': ಅಮೆರಿಕದ ವರ್ಕ್ ಕಲ್ಚರ್ ಹೊಗಳಿದ ಬೆಂಗಳೂರು ಮಹಿಳೆ, ಪೋಸ್ಟ್ Viral
ಬೆಂಗಳೂರು: ಇತ್ತೀಚಿನ ದಿನಗಳಲ್ಲಿ ಕಾರ್ಪೊರೇಟ್ ವಲಯದಲ್ಲಿ ಉದ್ಯೋಗಿಗಳ ಮೇಲಿನ ಕೆಲಸದ ಒತ್ತಡ, ಸುದೀರ್ಘ ಕೆಲಸದ ಅವಧಿ ಮತ್ತು ವೀಕೆಂಡ್ನಲ್ಲೂ ಕೆಲಸ ಮಾಡಿಸಿಕೊಳ್ಳುವ ಸಂಸ್ಕೃತಿಯ ಕುರಿತು ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕ ಚರ್ಚೆಯಾಗುತ್ತಿದೆ. ಇದೇ ಸಂದರ್ಭದಲ್ಲಿ ಬೆಂಗಳೂರಿನ ಮಹಿಳೆಯೊಬ್ಬರು ಅಮೆರಿಕದ ತಂಡಗಳೊಂದಿಗೆ ಕೆಲಸ ಮಾಡುವ ಕುರಿತು ಹಂಚಿಕೊಂಡಿರುವ ಪೋಸ್ಟ್ ಒಂದು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗುತ್ತಿದ್ದು, ಕಾರ್ಪೊರೇಟ್ ವಲಯದಲ್ಲಿ ಹೊಸದೊಂದು ಸಂಚಲನ ಮೂಡಿಸಿದೆ.
'ಯಾವಾಗಲೂ ಆನ್ಲೈನ್ನಲ್ಲಿ ಲಭ್ಯವಿರುವುದೇ ವೃತ್ತಿಪರತೆ' ಎಂದು ಭಾವಿಸುವ ಕೆಲಸದ ಸಂಸ್ಕೃತಿಯಿಂದ ಬೇಸತ್ತಿರುವ ಅನೇಕ ಉದ್ಯೋಗಿಗಳು ಈ ವಿಡಿಯೋಗೆ ಸ್ಪಂದಿಸುತ್ತಿದ್ದಾರೆ.
ತಮ್ಮ ವೈರಲ್ ವಿಡಿಯೋದಲ್ಲಿ ಈ ಮಹಿಳೆ, ಅಮೆರಿಕ ಮೂಲದ ತಂಡಗಳ ಜೊತೆ ಕೆಲಸ ಮಾಡುವಾಗ ತಾವು ಗಮನಿಸಿದ ಕೆಲಸದ ಸಂಸ್ಕೃತಿ ಹಾಗೂ ಉತ್ತಮ ಅಭ್ಯಾಸಗಳ ಬಗ್ಗೆ ಎಳೆಎಳೆಯಾಗಿ ವಿವರಿಸಿದ್ದಾರೆ. ಈ ಅಂಶಗಳು ತಮಗೂ ಬಹಳ ಆಪ್ತವೆನಿಸುತ್ತಿವೆ ಮತ್ತು ವಾಸ್ತವಕ್ಕೆ ತುಂಬಾ ಹತ್ತಿರವಾಗಿವೆ ಎಂದು ಹಲವಾರು ನೆಟ್ಟಿಗರು ಕಮೆಂಟ್ಗಳ ಮೂಲಕ ತಮ್ಮ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.
ಮಹಿಳೆ ಪಟ್ಟಿ ಮಾಡಿರುವ ಪ್ರಮುಖ ಅಂಶಗಳೇನು?
ಈ ಕಿರು ವಿಡಿಯೋದಲ್ಲಿ ಆಕೆ ಅಮೆರಿಕದ ಕೆಲಸದ ಸಂಸ್ಕೃತಿಯ ಹಲವು ಪ್ರಮುಖ ಅಂಶಗಳನ್ನು ಪಟ್ಟಿ ಮಾಡಿದ್ದಾರೆ. ಅವುಗಳಲ್ಲಿ ಪ್ರಮುಖವಾದವು ಹೀಗಿವೆ:
1. ಮೀಟಿಂಗ್ಗಳಿಗೂ ಮುನ್ನ ಕ್ಯಾಶುವಲ್ ಆಗಿ ಮಾತನಾಡುವುದು ಸಾಮಾನ್ಯ.
2. ಕ್ಯಾಲೆಂಡರ್ ಬ್ಲಾಕಿಂಗ್ಗೆ ಹೆಚ್ಚಿನ ಬೆಲೆ ನೀಡುವುದು.
3. ಯಾವುದೇ ಅಪರಾಧಿ ಭಾವನೆಯಿಲ್ಲದೆ ರಜೆಗಳನ್ನು ತೆಗೆದುಕೊಳ್ಳುವುದು.
4. ನಿಗದಿತ ಸಮಯಕ್ಕೆ ಸರಿಯಾಗಿ ಮೀಟಿಂಗ್ಗಳನ್ನು ಮುಕ್ತಾಯಗೊಳಿಸುವುದು.
5. ಕೆಲಸ ಮಾಡಲು ಸಾಧ್ಯವಾಗದಿದ್ದಾಗ ನೇರವಾಗಿ 'ಇಲ್ಲ' ಎಂದು ಹೇಳುವ ಸ್ವಾತಂತ್ರ್ಯ.
6. ಅತಿಯಾಗಿ ಕೆಲಸ ಮಾಡುವುದನ್ನು ವೈಭವೀಕರಿಸದಿರುವುದು.
7. ಕೇವಲ 'ಬ್ಯುಸಿ' ಎಂದು ತೋರಿಸಿಕೊಳ್ಳುವುದಕ್ಕಿಂತ ಕೆಲಸದ ಅಂತಿಮ ಫಲಿತಾಂಶಕ್ಕೆ ಪ್ರಾಮುಖ್ಯತೆ ನೀಡುವುದು.
8. ಕೆಲಸದ ಅವಧಿ ಮುಗಿದ ನಂತರ ಯಾವುದೇ ಮೆಸೇಜ್ ಅಥವಾ ಕರೆ ಮಾಡದಿರುವುದು.
ಈ ವಿಡಿಯೋದ ಜೊತೆಗೆ ಮಹಿಳೆ ಒಂದು ಸುಂದರವಾದ ಕ್ಯಾಪ್ಷನ್ ಕೂಡ ನೀಡಿದ್ದು, ಈ ಅನುಭವವು ಕೆಲಸದ ಸಂಸ್ಕೃತಿಯ ಬಗ್ಗೆ ತಮ್ಮ ದೃಷ್ಟಿಕೋನವನ್ನೇ ಬದಲಿಸಿದೆ ಎಂದಿದ್ದಾರೆ. "ಅಮೆರಿಕದ ತಂಡಗಳೊಂದಿಗೆ ಕೆಲಸ ಮಾಡಿದಾಗ ನನಗೆ ಅರ್ಥವಾಗಿದ್ದೆಂದರೆ, ವೃತ್ತಿಪರತೆ ಎಂದರೆ ದಿನದ 24 ಗಂಟೆಯೂ ಆನ್ಲೈನ್ನಲ್ಲಿ ಲಭ್ಯವಿರುವುದಲ್ಲ," ಎಂದು ಅವರು ಬರೆದುಕೊಂಡಿದ್ದಾರೆ.
ವೈಯಕ್ತಿಕ ಸಮಯಕ್ಕೆ ಸಿಗುವ ಗೌರವ
ಇದರ ಜೊತೆಗೆ, ಅಮೆರಿಕನ್ನರ ಕೆಲಸ ಮತ್ತು ವೈಯಕ್ತಿಕ ಜೀವನದ ನಡುವಿನ ಸ್ಪಷ್ಟ ಗಡಿಗಳು, ನೇರವಾದ ಸಂವಹನ, ಪ್ರತಿಯೊಂದಕ್ಕೂ ಕರಾರುವಕ್ಕಾದ ದಾಖಲೀಕರಣ, ಅನಗತ್ಯ ಮೀಟಿಂಗ್ಗಳನ್ನು ಕಡಿಮೆ ಮಾಡುವುದು ಹಾಗೂ ಉದ್ಯೋಗಿಗಳ ವೈಯಕ್ತಿಕ ಸಮಯಕ್ಕೆ ನೀಡುವ ಗೌರವವನ್ನು ತಾನು ಬಹಳವಾಗಿ ಮೆಚ್ಚಿರುವುದಾಗಿ ಆಕೆ ಹೇಳಿಕೊಂಡಿದ್ದಾರೆ. "ಪ್ರಾಮಾಣಿಕವಾಗಿ ಹೇಳಬೇಕೆಂದರೆ, ಆರೋಗ್ಯಕರ ಕೆಲಸದ ಸಂಸ್ಕೃತಿಯ ಬಗ್ಗೆ ನನಗಿದ್ದ ಕಲ್ಪನೆಯೇ ಇದರಿಂದ ಬದಲಾಯಿತು," ಎಂದು ಅವರು ವಿವರಿಸಿದ್ದಾರೆ.
ಕಮೆಂಟ್ ಬಾಕ್ಸ್ನಲ್ಲಿ ನೆಟ್ಟಿಗರ ಚರ್ಚೆ
ಈ ಪೋಸ್ಟ್ ಆನ್ಲೈನ್ನಲ್ಲಿ ಅತಿ ವೇಗವಾಗಿ ವೈರಲ್ ಆಗಿದ್ದು, ಅನೇಕ ಬಳಕೆದಾರರು ತಮ್ಮದೇ ಆದ ಇದೇ ರೀತಿಯ ಅನುಭವಗಳನ್ನು ಮತ್ತು ಕೆಲಸದ ಸಂಸ್ಕೃತಿಯ ಮೇಲಿರುವ ಹತಾಶೆಯನ್ನು ಹಂಚಿಕೊಂಡಿದ್ದಾರೆ. ಕಮೆಂಟ್ ವಿಭಾಗವು ಅಕ್ಷರಶಃ ಒಂದು ಚರ್ಚಾ ವೇದಿಕೆಯಾಗಿ ಮಾರ್ಪಟ್ಟಿದ್ದು, ಬಳಕೆದಾರರು ವಿವಿಧ ದೇಶಗಳ ಕೆಲಸದ ಸಂಸ್ಕೃತಿಗಳನ್ನು ಹೋಲಿಕೆ ಮಾಡುತ್ತಿದ್ದಾರೆ. ಬಳಕೆದಾರರೊಬ್ಬರು, "ನಾನು ಐರಿಶ್ ತಂಡದೊಂದಿಗೆ ಕೆಲಸ ಮಾಡುತ್ತೇನೆ, ಅವರು ಅಮೆರಿಕನ್ನರಿಗಿಂತಲೂ ಉತ್ತಮವಾಗಿದ್ದಾರೆ," ಎಂದು ಪ್ರತಿಕ್ರಿಯಿಸಿದ್ದಾರೆ.
ಇನ್ನೊಬ್ಬರು ಕಚೇರಿಗಳಲ್ಲಿನ ಅತಿಯಾದ ಒತ್ತಡದ ಬಗ್ಗೆ ಮಾತನಾಡುತ್ತಾ, "ಸತ್ಯ!! ಕಚೇರಿಯ ಅನಗತ್ಯ ಸಂವಹನದ ಒತ್ತಡವನ್ನು ಕಡಿಮೆ ಮಾಡುವುದರಿಂದ ಉದ್ಯೋಗಿಗಳ ಹತಾಶೆ ಬಹುಪಾಲು ಕಡಿಮೆಯಾಗುತ್ತದೆ," ಎಂದು ಬರೆದಿದ್ದಾರೆ. ಆದರೆ, ಎಲ್ಲಾ ಕಮೆಂಟ್ಗಳು ಸಕಾರಾತ್ಮಕವಾಗಿರಲಿಲ್ಲ. ಭಾರತೀಯರ ಕಾರ್ಯವೈಖರಿಯನ್ನು ವ್ಯಂಗ್ಯವಾಡುವ ಕಮೆಂಟ್ ಒಂದೂ ಕೂಡ ಭಾರಿ ಗಮನ ಸೆಳೆದಿದೆ. "ನಿಮ್ಮ ಆ ಅಮೆರಿಕನ್ ತಂಡಕ್ಕೆ ಮೊದಲನೇ ಅಥವಾ ಎರಡನೇ ತಲೆಮಾರಿನ ಭಾರತೀಯ ಮೂಲದ ಮ್ಯಾನೇಜರ್ ಬರುವವರೆಗೂ ಕಾಯಿರಿ, ಆಮೇಲೆ ಕಥೆ ಗೊತ್ತಾಗುತ್ತದೆ," ಎಂದು ನೆಟ್ಟಿಗರೊಬ್ಬರು ತಮಾಷೆಯಾಗಿ ಕಮೆಂಟ್ ಮಾಡಿದ್ದಾರೆ.
Click it and Unblock the Notifications
Sign in with Google