Bengaluru Rent: ಬೆಂಗಳೂರಿನಲ್ಲಿ ಬಾಡಿಗೆ-ಲೀಸ್ ಮನೆ ಹುಡುಕುವವರೇ ಎಚ್ಚರ, ಸದ್ದಿಲ್ಲದೆ ನಡೆದಿದೆ ₹100 ಕೋಟಿ ಹಗರಣ

Updated: Tuesday, May 19, 2026, 21:17 [IST]

ಬೆಂಗಳೂರು: ಮನೆಗಳನ್ನು ಬಾಡಿಗೆಗೆ ಹಾಗೂ ಲೀಸ್‌ ಕೊಡಿಸುವುದಾಗಿ ನಂಬಿಸಿ ಸಾರ್ವಜನಿಕರಿಗೆ ಕೋಟ್ಯಂತರ ರೂಪಾಯಿ ವಂಚಿಸಿರುವ ಜಾಲವೊಂದು ಬೆಂಗಳೂರಿನಲ್ಲಿ ಬಯಲಿಗೆ ಬಂದಿದೆ. ನಗರದ ಪ್ರತಿಷ್ಠಿತ ಜೆಎಎಂ ಸಂಸ್ಥೆಯು 300ಕ್ಕೂ ಹೆಚ್ಚು ಜನರಿಂದ ಬರೋಬ್ಬರಿ ₹100 ಕೋಟಿಗೂ ಅಧಿಕ ಹಣವನ್ನು ದೋಚಿ ವಂಚಿಸಿದೆ ಎಂಬ ಗಂಭೀರ ಆರೋಪ ಕೇಳಿಬಂದಿದೆ. ಸಂಸ್ಥೆಯ ವ್ಯವಸ್ಥಾಪಕ ನಿರ್ದೇಶಕ ಜಾನ್ ಸ್ಟೀಫನ್ ಎಂಬಾತನೇ ಈ ಬೃಹತ್ ಹಗರಣದ ಮಾಸ್ಟರ್ ಮೈಂಡ್ ಆಗಿದ್ದು, ಸಂತ್ರಸ್ತರು ಇಂದಿರಾನಗರ ಪೊಲೀಸ್ ಠಾಣೆಗೆ ದೂರು ನೀಡುತ್ತಿದ್ದಂತೆ ಕಚೇರಿ ಮುಚ್ಚಿ ತಲೆಮರೆಸಿಕೊಂಡಿದ್ದಾನೆ.

ಬಾಡಿಗೆದಾರರೇ ಟಾರ್ಗೆಟ್‌

ಬೆಂಗಳೂರಿನಲ್ಲಿ ಐಟಿ ಉದ್ಯೋಗಿಗಳು ಹಾಗೂ ಹೊರಗಿನಿಂದ ಬರುವ ಬಾಡಿಗೆದಾರರು ಎದುರಿಸುತ್ತಿರುವ ವಸತಿ ಸಮಸ್ಯೆಯನ್ನೇ ಬಂಡವಾಳ ಮಾಡಿಕೊಂಡ ಈ ಸಂಸ್ಥೆ, ಜನರನ್ನು ಸೆಳೆಯಲು ಆಕರ್ಷಕ ಆಫರ್ ನೀಡಿತ್ತು. ಗ್ರಾಹಕರಿಂದ ₹10 ಲಕ್ಷದಿಂದ ಹಿಡಿದು ₹75 ಲಕ್ಷದವರೆಗೆ ಲೀಸ್ ಹಣವನ್ನು ಹೂಡಿಕೆ ಮಾಡಿಸಿಕೊಳ್ಳುತ್ತಿತ್ತು. ಜೊತೆಗೆ ₹30 ಲಕ್ಷಕ್ಕಿಂತ ಹೆಚ್ಚು ಹೂಡಿಕೆ ಮಾಡುವವರಿಗೆ ತಿಂಗಳಿಗೆ ಶೇ. 2ರಿಂದ ಶೇ 4.2ರವರೆಗೆ ಭಾರಿ ರಿಟರ್ನ್ಸ್ (ಲಾಭಾಂಶ) ಕೊಡುವುದಾಗಿ ಆಮಿಷ ಒಡ್ಡಲಾಗಿತ್ತು.

ಆರಂಭದಲ್ಲಿ ನಂಬಿಕೆ ಗಳಿಸಲು ಕೆಲವು ತಿಂಗಳುಗಳ ಕಾಲ ಮಾಲೀಕರಿಗೆ ಸಮರ್ಪಕವಾಗಿ ಬಾಡಿಗೆ ಪಾವತಿಸುತ್ತಿದ್ದ ಸಂಸ್ಥೆ, ಆ ನಂತರ ಹಣ ನೀಡುವುದನ್ನು ಸಂಪೂರ್ಣವಾಗಿ ನಿಲ್ಲಿಸಿ ಕೈಕೊಟ್ಟಿದೆ. ಹೊಸ ಹೂಡಿಕೆದಾರರಿಂದ ಬಂದ ಹಣವನ್ನು ಹಳೆಯ ಹೂಡಿಕೆದಾರರಿಗೆ ಹಂಚುವ ಮಾದರಿಯಲ್ಲಿ ಈ ವಂಚನೆ ನಡೆದಿದೆ ಎಂದು ಪೊಲೀಸರು ಶಂಕಿಸಿದ್ದಾರೆ.

ಸೂರು ಕಳೆದುಕೊಂಡು ಬೀದಿಗೆ ಬಿದ್ದ ಸಂತ್ರಸ್ತರು

ಈ ಹಗರಣದಿಂದಾಗಿ ಮನೆ ಮಾಲೀಕರು ಮತ್ತು ಬಾಡಿಗೆದಾರರು ಇಬ್ಬರೂ ಕಂಗಾಲಾಗಿದ್ದಾರೆ. ಸ್ಥಿರವಾದ ವಸತಿ ಮತ್ತು ತಿಂಗಳ ಆದಾಯದ ಆಸೆಗೆ ಬಿದ್ದು ನಮ್ಮ ಕುಟುಂಬ ₹37 ಲಕ್ಷ ಹೂಡಿಕೆ ಮಾಡಿತ್ತು. ಆದರೆ, ಸಂಸ್ಥೆಯು ಮನೆ ಮಾಲೀಕರಿಗೆ ಬಾಡಿಗೆ ಕಟ್ಟದಿದ್ದಾಗ ನಮಗೆ ಸತ್ಯ ಗೊತ್ತಾಯಿತು. ಈಗ ಮನೆ ಖಾಲಿ ಮಾಡುವಂತೆ ಮಾಲೀಕರು ಒತ್ತಡ ಹೇರುತ್ತಿದ್ದಾರೆ. ಕೊಟ್ಟ ಹಣವೂ ಇಲ್ಲ, ಇರಲು ಮನೆಯೂ ಇಲ್ಲದಂತಾಗಿದೆ" ಎಂದು ವಂಚನೆಗೊಳಗಾದವರು ತಮ್ಮ ಅಳಲು ತೋಡಿಕೊಂಡಿದ್ದಾರೆ.

ಈ ಹಿಂದೆಯೂ ಜೈಲು ಸೇರಿದ್ದ ಸ್ಟೀಫನ್

ಪೊಲೀಸ್ ಮೂಲಗಳ ಪ್ರಕಾರ, ಆರೋಪಿ ಜಾನ್ ಸ್ಟೀಫನ್ ಇಂತಹ ವಂಚನೆಗೆ ಇಳಿಯುತ್ತಿರುವುದು ಇದೇ ಮೊದಲೇನಲ್ಲ. ಈ ಹಿಂದೆ ಕೂಡ ಇದೇ ಮಾದರಿಯ ಚೀಟಿಂಗ್ ಕೇಸ್‌ನಲ್ಲಿ ಈತನನ್ನು ಸಿಸಿಬಿ (CCB) ಅಧಿಕಾರಿಗಳು ಬಂಧಿಸಿ ಜೈಲಿಗಟ್ಟಿದ್ದರು. ಆದರೆ ಜೈಲಿನಿಂದ ಬೇಲ್ ಮೇಲೆ ಹೊರಬಂದ ಈ ಖದೀಮ, ಮತ್ತೆ ಅದೇ ಹೆಸರಿನಲ್ಲಿ ಕಂಪನಿ ಆರಂಭಿಸಿ ಜನರಿಗೆ ನೂರಾರು ಕೋಟಿ ನಾಮ ಹಾಕಿದ್ದಾನೆ. ಪ್ರಸ್ತುತ ಬೆಂಗಳೂರು ಮಾತ್ರವಲ್ಲದೆ ಚೆನ್ನೈನಲ್ಲೂ ಪ್ರಾದೇಶಿಕ ಕಚೇರಿ ಹೊಂದಿರುವ ಈ ಸಂಸ್ಥೆಯ ಎಲ್ಲ ಅಧಿಕೃತ ಮೊಬೈಲ್ ಸಂಖ್ಯೆಗಳು ಸ್ವಿಚ್ ಆಫ್ ಆಗಿದ್ದು, ತಲೆಮರೆಸಿಕೊಂಡಿರುವ ಆರೋಪಿ ಜಾನ್ ಸ್ಟೀಫನ್ ಪತ್ತೆಗಾಗಿ ಪೊಲೀಸರು ತನಿಖೆಯನ್ನು ತೀವ್ರಗೊಳಿಸಿದ್ದಾರೆ.