Kambala: 'ಕಂಬಳ' ಆಯೋಜಕರಿಗೆ ಬಿಬಿಎಂಪಿಯಿಂದ ₹50000 ದಂಡ, ಕಾರಣವೇನು?

ಬೆಂಗಳೂರು, ನವೆಂಬರ್ 26: ಬೆಂಗಳೂರಿನಲ್ಲಿ ದಕ್ಷಿಣ ಕನ್ನಡದ ದೇಶಿಯ ಕ್ರೀಡೆ ಕಂಬಳ (Kambala) ಇದೇ ಮೊದಲ ಬಾರಿಗೆ ಆಯೋಜನೆ ಆಗಿದೆ. ಇಂದು ಭಾನವಾರಕ್ಕೆ ಎರಡು ದಿನ ಕಂಬಳಕ್ಕೆ ತೆರೆ ಬಿದ್ದಿದೆ. ಈ ಮಧ್ಯೆ ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆ (BBMP) ಕಂಬಳ ಆಯೋಜಕರಿಗೆ ಭಾರೀ ಪ್ರಯಾಣದಲ್ಲಿ ದಂಡ ವಿಧಿಸುವ ಮೂಲಕ ಆಘಾತ ನೀಡಿದೆ.

ಬೆಂಗಳೂರು ಅರಮನೆ ಮೈದಾನದಲ್ಲಿ ಶನಿವಾರ ಚಾಲನೆಗೊಂಡ ಕಂಬಳ ಆಯೋಜಕರಿಗೆ ಬಿಬಿಎಂಪಿಯು ಬರೊಬ್ಬರಿ 50000 ರೂಪಾಯಿ ದಂಡ ವಿಧಿಸಿದೆ. ಕಂಬಳ ಆಯೋಜಕರು ಬಿಬಿಎಂಪಿಯ ಫ್ಲೆಕ್, ಬ್ಯಾನರ್ ಅಳವಡಿಕೆ ನಿಯಮ ಉಲ್ಲಂಘಿಸಿದ್ದರಿಂದ ಈ ದಂಡ ವಿಧಿಸಲಾಗಿದೆ ಎಂದು ತಿಳಿದು ಬಂದಿದೆ.

ನಗರದಲ್ಲಿ ಫ್ಲೆಕ್ಸ್, ಬ್ಯಾನರ್ ಅಳವಡಿಕೆಗೆ ನಿಷೇಧವಿದೆ. ಹೀಗಿದ್ದರೂ ಸಹಿತ ಕಂಬಳ ನಡೆಯುತ್ತಿದ್ದ ಅರಮನೆ ಮೈದಾನ ಸುತ್ತಮುತ್ತ, ಬಳ್ಳಾರಿ ರಸ್ತೆಗಳ ಅಕ್ಕಪಕ್ಕದಲ್ಲಿ ಕಂಬಳಕ್ಕೆ ಕುರಿತಾದ ಬ್ಯಾನರ್, ಫ್ಲೆಕ್ಸ್ ಅಳವಡಿಸಿದ್ದರಿಂದ ಬಿಬಿಎಂಪಿ ಕಂಬಳ ಆಯೋಜಕರಿಗೆ ದಂಡ ವಿಧಿಸಿದ್ದಾರೆ. ಇನ್ನೂ ಈ ಪ್ರಕರಣ ಕುರಿತು ಸದಾಶಿವನಗರ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿದೆ. ದಂಡು ವಿಧಿಸಿದ ಬಿಬಿಎಂಪಿ ಸಿಬ್ಬಂಧಿ ಬ್ಯಾನರ್, ಫ್ಲೆಕ್ಸ್ ತೆರವು ಮಾಡಿದ್ದಾರೆ.

ಅಂದುಕೊಂಡಂತೆ ನಡೆದ ಕಂಬಳ ಉತ್ಸವ
ಇದೇ ಮೊದಲ ಬಾರಿಗೆ ಕರಾವಳಿ ಭಾಗದ ಸಾಂಪ್ರದಾಯಿಕ ಸೊಗಡು ಸಿಲಿಕಾನ್ ಸಿಟಿ ಬೆಂಗಳೂರಲ್ಲಿ ಪ್ರದರ್ಶನಗೊಂಡಿದೆ. ಈವರೆಗೆ ಕೆಸರುಗದ್ದೆಯಲ್ಲಿ ಎಮ್ಮೆ-ಕೋಣಗಳ ಓಟ (ಕಂಬಳ) ಕುರಿತು ಬೆಂಗಳೂರಿಗರಿಗೆ ಈ ಬಾರಿ ಈ ಕಂಬಳ ಉತ್ಸವವನ್ನು ಕಣ್ತುಂಬಿಕೊಳ್ಳುವ ಅವಕಾಶ ಸಿಕ್ಕಿದೆ.

ಅಗತ್ಯ ಎಲ್ಲ ವ್ಯವಸ್ಥೆಯನ್ನು ಮಾಡಿಕೊಂಡಿದ್ದ ಕಂಬಳ ಆಯೋಜಕರು, ದೇಸಿ ಕ್ರೀಡೆ ಪರಿಚಯಿಸುವ ಜೊತೆಗೆ ಕರಾವಳಿಯ ಸಾಂಪ್ರದಾಯಿಕ ಅಡುಗೆ ಪರಿಚಯಿಸಲು ಮಳಿಗೆಗಳಿಗೂ ಅವಕಾಶ ಮಾಡಿಕೊಟ್ಟಿದ್ದರು. ಸುಮಾರು ಎರಡು ತಿಂಗಳಿಂದ ಮೊದಲೇ ಎಲ್ಲ ತಯಾರಿಗಳು ಆರಂಭವಾಗಿತ್ತು.

ಕಂಬಳ ರಕ್ಷಣೆಗೆ ಒಗ್ಗೂಡಲು ಸಂಸದ ಕರೆ
ಅಂದುಕೊಂಡಂತೆ ಎರಡು ದಿನದ ಕಂಬಳವು ನವೆಂಬರ್ 25 ರಂದು ಆರಂಭವಾಯಿತು. ನಟ ದಿವಂಗತ ಪುನೀತ್ ರಾಜಕುಮಾರ್ ಪತ್ನಿ ಅಶ್ವಿನಿ ಪುನೀತ್ ರಾಜಕುಮಾರ್ ಅವರು ಕಂಬಳಕ್ಕೆ ಚಾಲನೆ ನೀಡಿದರು. ಮೊದಲ ದಿನವೇ ಲಕ್ಷಾಂತರ ಜನರು ಕಂಬಳ ಕಣ್ತುಂಬಿಕೊಂಡರು. ಸಾವಿರಾರು ಜನ ಸೀಫುಡ್ ಸವಿದು ಆನಂದಿಸಿದರು. ಸುಮಾರು 178 ಜೋಡಿ ಎಮ್ಮೆಗಳು ಈ ಉತ್ಸವದಲ್ಲಿ ಪಾಲ್ಗೊಂಡಿದ್ದವು.

ಇನ್ನೂ ಎರಡನೇ ದಿನ ಕಂಬಳದಲ್ಲಿ ಪಾಲ್ಗೊಂಡಿದ್ದ ಬಿಜೆಪಿ ಸಂಸದ ತೇಜಸ್ವಿ ಸೂರ್ಯ ಅವರು, ಸಾಂಪ್ರದಾಯಿಕ ಕ್ರೀಡೆಗಳಾದ 'ಜಲ್ಲಿಕಟ್ಟು' ಮತ್ತು 'ಕಂಬಳ' ತಡೆಗೆ ಕೆಲವು ಅಜೆಂಡಾಗಳ ಶಕ್ತಿಗಳು ನ್ಯಾಯಾಲಯ ಮೊರೆ ಹೋಗಿದ್ದನ್ನು ಇಂದು ನಾವು ನೋಡಿದ್ದೇವೆ. ಇದು ಸರಿಯಲ್ಲ. ನಮ್ಮ ಸಾಂಪ್ರದಾಯಿಕ ಕ್ರೀಡೆಗಳನ್ನು ಉಳಿಸಲು ನಾವು ರಾಜಕೀಯ ಭಿನ್ನಾಭಿಪ್ರಾಯ ಮರೆದು ಒಗ್ಗೂಡಬೇಕು ಎಂದು ಅವರು ಕರೆ ನೀಡಿದ್ದಾರೆ.

English summary

Kamabala: BBMP rs 50000 fine imposed on Kambala, Why? see reason.