ಬೆಂಗಳೂರಿನ ಅನಧಿಕೃತ ಪಬ್ಸ್, ಬಾರ್‌ಗಳ ಮೇಲೆ BBMP ಸಮರ, ಈ ದಿಢೀರ್‌ ನಿರ್ಧಾರ ಏಕೆ?, ಇಲ್ಲಿದೆ ಮಾಹಿತಿ

ಬೆಂಗಳೂರು, ಅಕ್ಟೋಬರ್‌, 21: ಕೋರಮಂಗಲದ ಬಹುಮಹಡಿ ಕಟ್ಟಡದಲ್ಲಿ ಬೆಂಕಿ ಬಿದ್ದು ವ್ಯಕ್ತಿಯೋರ್ವ ಬಿಲ್ಡಿಂಗ್‌ನಿಂದ ಹಾರಿ ಬಿದ್ದ ಘಟನೆ ಇನ್ನೂ ಕಣ್ಣಿಗೆ ಕಟ್ಟಿದ ಹಾಗೇ ಇದೆ. ಈ ಘಟನೆ ನಡೆದ ಬಳಿಕ ನಗರದಲ್ಲಿ ಸಾಕಷ್ಟು ಅನಧಿಕೃತ ಬಾರ್ ಮತ್ತು ಪಬ್ಸ್ ಇರುವುದು ಬೆಳಕಿಗೆ ಬಂದಿದೆ. ಅಂತಹ ಅನಧಿಕೃತ ಪಬ್ಸ್, ಬಾರ್‌ಗಳ ಮೇಲೆ ಬಿಬಿಎಂಪಿ ಸಮರ ಸಾರಿದೆ.

ಕೆಲವು ಕಟ್ಟಡಗಳ ರೂಪ್‍ಟಾಪ್‍ಗಳ ಮೇಲೆ ನಿರ್ಮಾಣ ಮಾಡಿರುವ ಬಾರ್‌ಗಳಲ್ಲಿ ಅವಘಡಗಳು ಸಂಭವಿಸುವ ಸಾಧ್ಯತೆಯಿದೆ. ಈ ರೀತಿಯ ರೂಪ್ ಟಾಪ್ ನಿರ್ಮಾಣ ಮಾಡುವಾಗ ಅನುಮತಿ ತೆಗೆದುಕೊಳ್ಳುವ ಅನಿವಾರ್ಯತೆಯಿದೆ. ಆದರೆ ನಗರದ ಅದೆಷ್ಟೋ ಕಡೆ ಅನುಮತಿ ಪಡೆಯದೇ ನಾಯಿ ಕೊಡೆಯಂತೆ ಅಕ್ರಮ ರೂಪ್‍ಟಾಪ್ ಬಾರ್‌ಗಳ ನಿರ್ಮಾಣ ಆಗಿದೆ. ಈ ಹಿನ್ನೆಲೆ ರೂಪ್ ಟಾಪ್ ಬಾರ್ ಮೇಲೆ ಬಿಬಿಎಂಪಿ ದಾಳಿ ನಡೆಸಿದೆ. ಬಿಬಿಎಂಪಿ ವ್ಯಾಪ್ತಿಯಲ್ಲಿರುವ ಪಬ್, ಬಾರ್ ಮತ್ತು ರೆಸ್ಟೋರೆಂಟ್‌ಗಳ ಪರಿಶೀಲನೆ ನಡೆಸಿ ನೋಟಿಸ್ ನೀಡಲಾಗಿದೆ.

ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆ ವ್ಯಾಪ್ತಿಯಲ್ಲಿ ಇರುವ ವಲಯವಾರು ಪಬ್, ಬಾರ್ & ರೆಸ್ಟೋರೆಂಟ್‌ಗಳಿಗೆ ಸಂಬಂಧಿಸಿದಂತೆ ಪಾಲಿಕೆಯ 8 ವಲಯಗಳಲ್ಲಿ ಆರೋಗ್ಯಾಧಿಕಾರಿಗಳ‌ ನೇತೃತ್ವದಲ್ಲಿ ತಪಾಸಣೆ ನಡೆಸಲಾಗಿದ್ದು, ನ್ಯೂನ್ಯತೆಗಳು ಕಂಡುಬಂದಿರುವಂತಹ ಉದ್ದಿಮೆಗಳಿಗೆ ನೋಟಿಸ್ ಜಾರಿ ಮಾಡಲಾಗಿದೆ. ಜೊತೆಗೆ ಪರವಾನಿಗೆ ನಿಯಮಾವಳಿ ಪಾಲಿಸದ ಉದ್ದಿಮೆಗಳನ್ನು ಸ್ಥಳದಲ್ಲೇ ಮುಚ್ಚಿಸಲಾಗಿರುತ್ತದೆ.

ಪಾಲಿಕೆ ವ್ಯಾಪ್ತಿಯಲ್ಲಿ ಒಟ್ಟು 1118 ಉದ್ದಿಮೆಗಳಿಗೆ ಪರವಾನಿಗೆ ನೀಡಲಾಗಿದ್ದು, ಈ ಪೈಕಿ‌ ನಿನ್ನೆ (ಅಕ್ಟೋಬರ್‌ 20) 232 ಉದ್ದಿಮೆಗಳನ್ನು ಪರಿಶೀಲನೆ ಮಾಡಲಾಗಿದೆ. ಅದರಲ್ಲಿ 86 ಉದ್ದಿಮೆಗಳಿಗೆ ನೋಟಿಸ್ ಜಾರಿಗೊಳಿಸಿ 12 ಉದ್ದಿಮೆಗಳನ್ನು ಮುಚ್ಚಲಾಗಿರುತ್ತದೆ. ಸದರಿ ವಿವರ ಕೆಳಕಂಡಂತಿರುತ್ತದೆ.

ಕ್ರಮ ಸಂಖ್ಯೆ,	ವಲಯ	ಪರವಾನಿಗೆ ನೀಡಿರುವ ಸಂಖ್ಯೆ	ತಪಾಸಣೆ ನಡೆಸಿರುವ ಸಂಖ್ಯೆ	ನೋಟಿಸ್ ನೀಡಿರುವ ಸಂಖ್ಯೆ	ಮುಚ್ಚಿರುವ ಸಂಖ್ಯೆಯ ವಿವರ
1	ದಕ್ಷಿಣ	248	30	10	0
2	ಪಶ್ಚಿಮ	167	78	20	0
3	ಪೂರ್ವ	222	25	18	07
4	ರಾಜರಾಜೇಶ್ವರಿನಗರ	75	08	06	0
5	ದಾಸರಹಳ್ಳಿ	34	29	08	0
6	ಯಲಹಂಕ	110	18	0	0
7	ಮಹದೇವಪುರ	161	36	16	03
8	ಬೊಮ್ಮನಹಳ್ಳಿ	101	08	08	02
ಒಟ್ಟು		1118	232	86	12

English summary

BBMP Notice for Unauthorized Pubs, Bars in Bengaluru, what is the reason?, here see details,