50 ರುಪಾಯಿಗಾಗಿ ಮಗು ಅಪಹರಿಸಿದ್ದ ಮಹಿಳೆ ಈಗ ಪೊಲೀಸರ ಅತಿಥಿ

ಬೆಳಗಾವಿ, ಫೆಬ್ರವರಿ 16 : ಇಲ್ಲಿನ ಅಶೋಕ ನಗರದಲ್ಲಿ ಎರಡು ವರ್ಷದ ಮಗುವನ್ನು 50 ರುಪಾಯಿಗಾಗಿ ಅಪಹರಿಸಿದ ಪ್ರಕರಣ ವರದಿಯಾಗಿದೆ. ಅಶೋಕ ನಗರದ ಜೋಪಡಪಟ್ಟಿಯ ಬಳಿ ನಿಲ್ಲಿಸಿದ ಟಾಟಾ ಏಸ್ ಗೂಡ್ಸ್ ಗಾಡಿಯಲ್ಲಿ ಆಡುತ್ತಿದ್ದ ಮಗುವನ್ನು ಈಚೆಗೆ ಅಪಹರಿಸಲಾಗಿತ್ತು. ಆ ಮಗುವನ್ನು 24 ಗಂಟೆಗಳ ಒಳಗಾಗಿ ಪತ್ತೆ ಹಚ್ಚಲಾಗಿದೆ.

ಈ ಬಗ್ಗೆ ಪತ್ರಿಕಾಗೋಷ್ಠಿ ಮಾಡಿ, ಮಾತನಾಡಿದ ಸೀಮಾ ಲಾಟ್ಕರ್, ಶಿವಬಸವ ನಗರದ ಮಾಲಾ ವಿಠ್ಠಲ್ ಬಸರಗಿ ಎಂಬಾಕೆ ಬಂಧಿತೆ. ಸುವರ್ಣಾ ಸುರೇಶ್ ಲಮಾಣಿ ಎಂಬುವರ 2 ವರ್ಷದ ಮಗು ಜೋಪಡಿಪಟ್ಟಿ ಸಮೀಪ ಮನೆ ಬಳಿ ಆಟವಾಡುತ್ತಿದ್ದಾಗ ಅಪಹರಿಸಲಾಗಿತ್ತು.

ಮಾಳಮಾರುತಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಿಸಿಕೊಂಡ PSI ಚನ್ನಕೇಶವ ತಿಂಗಳೆಕರ ತಂಡವು ಆರೋಪಿ ಮಾಲಾಳನ್ನು ವಶಕ್ಕೆ ಪಡೆದಿದ್ದಾರೆ ಎಂದು ಹೇಳಿದರು.

ಮಗುವನ್ನು ಸುರಕ್ಷಿತವಾಗಿ ಪೋಷಕರಿಗೆ ಒಪ್ಪಿಸಲಾಗಿದೆ. 50 ರುಪಾಯಿ ಹಣದ ಸಲುವಾಗಿ ಮಗುವನ್ನು ಅಪಹರಣ ಮಾಡಲಾಗಿತ್ತು ಎಂದು ಪ್ರಾಥಮಿಕ ತನಿಖೆಯಲ್ಲಿ ಆರೋಪಿ ಬಾಯಿ ಬಿಟ್ಟಿದ್ದು, ಈ ಮೊದಲು ಯಾವುದೇ ಪ್ರಕರಣಗಳಲ್ಲಿ ಭಾಗಿಯಾಗಿಲ್ಲ. ಅಲ್ಲದೆ ಅಪಹರಣಕ್ಕೆ ಒಳಗಾದ ಬಾಲಕಿಯ ಪೋಷಕರಿಗೂ ಇವರು ಸಂಬಂಧಿಗಳಾಗಿಲ್ಲ ಎಂದು ತಿಳಿಸಿದರು.

English summary

Mala Vittal Basaragi arrested by Belagavi police on allegation of kidnapping a child. She confessed about crime and admitted that, kidnapped the child for 50 rupees.