ಅಮೆರಿಕ ಶಾಲೆಯಲ್ಲಿ ಮರಣಮೃದಂಗ: 20 ಮಕ್ಕಳ ಹತ್ಯೆ

ನ್ಯೂಯಾರ್ಕ್, ಡಿ.15: ಆಮ್ಮ ಶಿಕ್ಷಕಿಯಾಗಿ ಸೇವೆ ಸಲ್ಲಿಸುತ್ತಿದ್ದ ಶಾಲೆಗೆ ನುಗ್ಗಿದ ಯುವಕನೊಬ್ಬ ಮೊದಲು ಅಮ್ಮನ ಮೇಲೆಯೇ ಗುಂಡು ಹಾರಿಸಿ ಬಳಿಕ ಶಾಲೆಯಲ್ಲಿ ಪಾಠ ಕೇಳುತ್ತಿದ್ದ ಮಕ್ಕಳ ಮೇಲೆ ಮನಬಂದಂತೆ ಗುಂಡು ಹಾರಿಸುವ ಮೂಲಕ 20 ಮಕ್ಕಳನ್ನು ಆಹುತಿ ತೆಗೆದುಕೊಂಡಿದ್ದಾನೆ. ಜತೆಗೆ ಇನ್ನೂ 7 ಮಂದಿಯ ಮೇಲೂ ಗುಂಡುಹಾರಿಸಿ ಸಾಯಿಸಿದ್ದಾನೆ. ಇಷ್ಟೆಲ್ಲ ಆದ ಬಳಿಕ ಸ್ವತಃ ತಾನೂ ಗುಂಡುಹಾರಿಸಿಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾನೆ.

ಶುಕ್ರವಾರ ಬೆಳಗ್ಗೆ 9.30ರಲ್ಲಿ (ಭಾರತೀಯ ಕಾಲ ಮಾನದ ಪ್ರಕಾರ ನಿನ್ನೆ ರಾತ್ರಿ) ಈ ಪೈಶಾಚಿಕ ಘಟನೆ ನಡೆದಿದ್ದು ಶಾಲೆ ಆವರಣ ಸ್ಮಶಾನವಾಗಿದೆ. ಕನೆಕ್ಟಿಕಟ್‌ನ ನ್ಯೂಟೌನ್‌ನಲ್ಲಿನ ಸ್ಯಾಂಡಿ ಹೂಕ್ ಪ್ರಾಥಮಿಕ ಶಾಲೆಯ ಕೋಣೆಗೆ ಏಕಾಏಕಿ ನುಗ್ಗಿದ 20ರ ಹರೆಯದ ಯುವಕ ಈ ಕೃತ್ಯವೆಸಗಿದ್ದಾನೆ.

ಯುವಕನ ಹುಚ್ಚಾಟಕ್ಕೆ ಕಾರಣವೇನೆಂದು ತಿಳಿದುಬಂದಿಲ್ಲ. ಅತ್ಯಂತ ವ್ಯವಸ್ಥಿತವಾಗಿ ಈ ಭೀಬತ್ಸ ಕೃತ್ಯವೆಸಗಿರುವ ಪಾಪಿ, ಒಂದಲ್ಲ ನಾಲ್ಕು ಪಿಸ್ತೂಲುಗಳಿಂದ ಹತ್ಯಾದಾಳಿ ನಡೆಸಿದ್ದಾನೆ. ಜತೆಗೆ ಬುಲೆಟ್ಟುಗಳಿಂದ ತುಂಬಿದ್ದ ಜಾಕೆಟ್ ಸಹ ಧರಿಸಿದ್ದ ಎಂದು ಪ್ರತ್ಯಕ್ಷದರ್ಶಿಗಳು ತಿಳಿಸಿದ್ದಾರೆ.

ಘಟನೆ ತಿಳಿದು ತೀವ್ರ ದುಃಖಿತರಾದ ಅಧ್ಯಕ್ಷ ಬರಾಕ್ ಒಮಾಬಾ ಬಿಕ್ಕಿಬಿಕ್ಕಿ ಅತ್ತಿದ್ದಾರೆ. ಮೃತರ ಕುಟುಂಬಗಳಿಗೆ ಸಾಂತ್ವನ ಹೇಳಿದ್ದು, ಮೃತರ ಗೌರವಾರ್ಥ ಶ್ವೇತಭವನದಲ್ಲಿ ರಾಷ್ಟ್ರಧ್ವಜವನ್ನು ಅರ್ಧಕ್ಕೆ ಇಳಿಸಿ, ಹಾರಿಸಲಾಗಿದೆ. ಹೆಚ್ಚಿನ ಮಾಹಿತಿಗೆ ಇಲ್ಲಿ ಕ್ಲಿಕ್ಕಿಸಿ.

English summary

America New Town school shooting 20 kids among 27 dead on Dec 15. A gunman killed 26 people, including 20 young children, at a US school where his mother worked Friday morning in one of the worst school shootings in the country's history.