ಬಿಎಸ್‌ವೈ, ಮೋದಿ ಗೈರು; ಜೋಷಿ ರಾಜೀನಾಮೆ

ಬೆಂಗಳೂರು, ಮೇ 24: ಇತ್ತ ಮಾಜಿ ಸಿಎಂ ಬಿಎಸ್ ಯಡಿಯೂರಪ್ಪ ಅವರು ಮಲ್ಲೇಶ್ವರಂನಲ್ಲಿರುವ ತಮ್ಮ ನೂತನ ಜನಸಂಪರ್ಕ ಕಚೇರಿಯಲ್ಲಿ ಪಟ್ಟಾಂಗ ಹಾಕಿಕುಳಿತುಕೊಂಡು 'ಬಿಜೆಪಿನೂ ಬೇಡ, ಅದರ ರಾಷ್ಟ್ರೀಯ ಕಾರ್ಯಕಾರಿಣಿಯೂ ಬೇಡ' ಎಂದು ಸಿಡಿದೆದ್ದಿದ್ದರೆ ಅತ್ತ ಭಾವಿ ಪ್ರಧಾನಿ ಎಂದೇ ಪರಿಣಿತರಾಗಿರುವ ಗುಜರಾತಿನ ಮುಖ್ಯಮಂತ್ರಿ ನರೇಂದ್ರ ಮೋದಿ ಸಾಹೇಬರು ಸಹ ಮುನಿಸಿಕೊಂಡು ಕಾರ್ಯಕಾರಿಣಿಗೆ ಗೈರು ಹಾಜರಾಗಿದ್ದಾರೆ.

ಪ್ರಮುಖ ನಾಯಕರ ಅನುಪಸ್ಥಿತಿಯಲ್ಲಿ ನಡೆಯುತ್ತಿರುವ ಪಕ್ಷದ ರಾಷ್ಟ್ರೀಯ ಕಾರ್ಯಕಾರಿಣಿ ಪಾಲ್ಗೊಳ್ಳಲು ರಾಜ್ಯದ ಮುಖ್ಯಮಂತ್ರಿ ಸದಾನಂದ ಗೌಡರು ತಮ್ಮ ಪಟಾಲಂನೊಂದಿಗೆ ಇದೀಗತಾನೆ ಮುಂಬೈ ವಿಮಾನ ಹತ್ತಿದ್ದಾರೆ. ಈ ಮಧ್ಯೆ, ನಿತಿನ್ ಗಡ್ಕರಿ ಅವರಿಗೆ ಎರಡನೆಯ ಅವಧಿಗೆ ರಾಷ್ಟ್ರಾಧ್ಯಕ್ಷ ಪಟ್ಟಾಭಿಷೇಕ ಕಾರ್ಯವೂ ನೆರವೇರಲಿದೆ.

ಜೋಷಿ ರಾಜೀನಾಮೆ ಫ್ಯಾಕ್ಸ್: ನನಗೆ ರಾಜ್ಯದ ಪಕ್ಷಾಧ್ಯಕ್ಷ ಸ್ಥಾನ ನೀಡಿಲ್ಲ ಎಂಬ ಕೊರಗಿನಿಂದ ಸನ್ಮಾನ್ಯ ಯಡಿಯೂರಪ್ಪ ಅವರು ಇದೇ ಮೊದಲ ಬಾರಿಗೆ ಪಕ್ಷದ ರಾಷ್ಟ್ರೀಯ ಕಾರ್ಯಕಾರಿಣಿಯಲ್ಲಿ ಭಾಗವಹಿಸುತ್ತಿಲ್ಲ. ಇನ್ನು, ಪಕ್ಷದ ರಾಷ್ಟ್ರಾಧ್ಯಕ್ಷ ಸ್ಥಾನ ನೀಡಿಲ್ಲ ಎಂದು ನಮೋ ವಿಮುಖಗೊಂಡಿದ್ದಾರೆ.

ಕಳೆದ ವರ್ಷದ ಡಿಸೆಂಬರ್‌ನಲ್ಲಿ ದೆಹಲಿಯಲ್ಲಿ ನಡೆದ ರಾಷ್ಟ್ರೀಯ ಕಾರ್ಯಕಾರಿಣಿಯಲ್ಲೂ ಮೋದಿ ಪಾಲ್ಗೊಂಡಿರಲಿಲ್ಲ. ಉತ್ತರಪ್ರದೇಶದ ಚುನಾವಣಾ ಪ್ರಚಾರ ಕಾರ್ಯಕ್ಕೆ ತಮ್ಮ ಬದ್ಧವೈರಿ ಸಂಜಯ್ ಜೋಶಿ ಅವರನ್ನು ನೇಮಿಸಿದ್ದರಿಂದ ಕಿರಿಕಿರಿಗೊಂಡ ಮೋದಿ ಈ ಸಭೆಯಲ್ಲಿ ಭಾಗವಹಿಸಿರಲಿಲ್ಲ.

ತಮಗೆ ಮಗ್ಗುಲಮುಳ್ಳಾಗಿದ್ದ ಸಂಜಯ್ ಜೋಷಿ ವಿರುದ್ಧ ಮೋದಿ ಬುಸುಗುಡುತ್ತಲೇ ಇದ್ದರು. ತಾಜಾ ವರದಿಯ ಪ್ರಕಾರ ಜೋಷಿ ಅವರು ಪಕ್ಷದ ಎಲ್ಲ ಸ್ಥಾನಗಳಿಗೂ ಗುಡ್ ಬೈ ಹೇಳಿದ್ದು, ರಾಜೀನಾಮೆ ಪತ್ರವನ್ನು ಪಕ್ಷಾಧ್ಯಕ್ಷ ನಿತಿನ್ ಗಡ್ಕರಿ ಅವರಿಗೆ ದಿಢೀರನೆ ಫ್ಯಾಕ್ಸ್ ಮಾಡಿದ್ದಾರೆ. So, ಮೋದಿ ಇನ್ನಾದರೂ ಸಭೆಯಲ್ಲಿ ಭಾಗವಹಿಸುತ್ತಾರಾ ಎಂಬುದು ಕುತೂಹಲದ ಸಂಗತಿಯಾಗಿದೆ.

ಇದೇ ವೇಳೆ, ಎರಡು ದಿನಗಳ ಬಿಜೆಪಿ ಕಾರ್ಯಕಾರಿಣಿ ಇಂದಿನಿಂದ (ಗುರುವಾರ) ಮುಂಬೈನಲ್ಲಿ ಆರಂಭವಾಗಲಿದ್ದು, ಪಕ್ಷದೊಳಗಿನ ಆಂತರಿಕ ಕಚ್ಚಾಟವನ್ನು ತಹಬದಿಗೆ ತರುವುದು ಈ ಕಾರ್ಯಕಾರಿಣಿಯ ಪ್ರಮುಖ ಕಾರ್ಯಸೂಚಿಯಾಗಲಿದೆ.

English summary

The absence of Gujarat Chief Minister Narendra Modi and former Karnataka Chief Minister B S Yeddyurappa could cast a cloud over the BJP National Executive beginning here tomorrow which is all set to pave the way for a second term to party chief Nitin Gadkari.