ಪತ್ನಿ, ಪುತ್ರನ ಜತೆ ಊಟ ಮಾಡಿದ ರೆಡ್ಡಿ

ಬೆಂಗಳೂರು,ಮಾ.27: ಪರಪ್ಪನ ಅಗ್ರಹಾರ ಜೈಲುವಾಸಿ, ಅಕ್ರಮ ಗಣಿವೀರ ಜನಾರ್ದನ ರೆಡ್ಡಿ ಅವರು ಸೋಮವಾರ (ಮಾ.26) ಮಧ್ಯಾಹ್ನ 1.30ರಲ್ಲಿ ತಮ್ಮ ಪುತ್ರ ಕಿರೀಟಿ ಹಾಗೂ ಪತ್ನಿ ಅರುಣಾ ಲಕ್ಷ್ಮಿ ಅವರ ಜತೆ ಒಟ್ಟಿಗೆ ಊಟಮಾಡಿ ಸಂತೃಪ್ತರಾದರು. ಮಾಡಿದ್ದುಣ್ಣೋ ಮಹರಾಯ!

ಪತಿಯನ್ನು ಕಾಣಲು ಅರುಣಾ ತಮ್ಮ ಪುತ್ರನೊಡಗೂಡಿ ಜೈಲಿಗೆ ಬಂದರು. ಸೆರೆಮನೆಯಲ್ಲಿ ಬಂಧಿಯಾಗಿರುವ ಗಂಡನನ್ನು ಕಂಡು ಅರುಣಾ ಭಾವುಕರಾದರು ಎಂದು ಕಾರಾಗೃಹ ಮೂಲಗಳು ತಿಳಿಸಿವೆ. ಆರು ತಿಂಗಳ ಹಿಂದೆ (ಸೆ. 5) ಆಂಧ್ರ ಸಿಬಿಐನಿಂದ ಬಂಧನಕ್ಕೊಳಗಾದ ರೆಡ್ಡಿಯನ್ನು ಚಂಚಲಗೂಡ ಜೈಲಿನಲ್ಲಿ ಅವರ ಪತ್ನಿ ಅರುಣಾ ಒಮ್ಮೆ ಭೇಟಿಯಾಗಿದ್ದರು.

ಆಗ, ರೆಡ್ಡಿ ತಮ್ಮ 46ನೇ ಹುಟ್ಟುಹಬ್ಬದಂದು (ಜನವರಿ 11) ಇಡೀ ಕುಟುಂಬದ ಜತೆ ಜೈಲಿನಲ್ಲಿ ಕಾಲ ಕಳೆದಿದ್ದರು. ಅದಾದನಂತರ ನಿನ್ನೆ ಎರಡನೆಯ ಬಾರಿಗೆ ಬೆಂಗಳೂರು ಜೈಲಿನಲ್ಲಿ ಮುಖಾಮುಖಿಯಾದರು. ಸೋದರ ಸೋಮಶೇಖರ ರೆಡ್ಡಿ ಸಹ ನಿನ್ನೆ ರೆಡ್ಡಿಯನ್ನು ಕಂಡು ಮಾತನಾಡಿಸಿದ್ದಾರೆ.

ಜನಾ ರೆಡ್ಡಿ 2 ಗಂಟೆಗಳ ಕಾಲ ಪತ್ನಿ ಹಾಗೂ ಪುತ್ರನ ಜತೆ ಕಾಲ ಕಳೆದರು. ಈ ವೇಳೆ ಅವರು ತುಂಬ ಉಲ್ಲಸಿತರಾಗಿದ್ದರು ಎನ್ನಲಾಗಿದೆ. ಆ ವೇಳೆಯಲ್ಲಿ ಮನೆಯಿಂದ ಪತಿಗಾಗಿ ತಂದಿದ್ದ ವಿಶೇಷ ಅಡುಗೆಯನ್ನು ಅಡುಗೆಯನ್ನು ಅರುಣಾ ಸ್ವತಃ ಕೈಯಾರೆ ಬಡಿಸಿದರು. ಒಟ್ಟಿನಲ್ಲಿ ಬಹುದಿನಗಳ ಬಳಿಕ ರೆಡ್ಡಿ, ಮಡದಿ ಮತ್ತು ಮಗನೊಂದಿಗೆ ಒಟ್ಟಿಗೆ ಕುಳಿತು ಊಟ ಸವಿದರು.

English summary

The former Karnataka minister Janardhana Reddy who is serving judicial custody in connection with the illegal mining case in Parappana Agrahara jail in Bangalore was served dinner by his wife Lakshmi Aruna along with his son on Mar 25.