ಇದು ಶ್ರೀರಾಮುಲು Impact: ಬಿಜೆಪಿಗೆ 28 ಸದಸ್ಯರ ಗುಡ್ ಬೈ

Published: Saturday, March 17, 2012, 9:28 [IST]

ಬಳ್ಳಾರಿ, ಮಾ 17: ಪಕ್ಷ ತೊರೆದು ಹೊಸ ಪಕ್ಷ ಕಟ್ಟಿದ ಸ್ವಾಭಿಮಾನಿ ಶ್ರೀರಾಮುಲು ತನ್ನ ಮಾತೃ ಪಕ್ಷಕ್ಕೆ ಸರಿಯಾದ ಟಾಂಗ್ ನೀಡಿದ್ದಾರೆ. ಬಳ್ಳಾರಿ ಮಹಾನಗರಪಾಲಿಕೆಯಲ್ಲಿ ಈಗ ಶ್ರೀರಾಮುಲುದ್ದೇ ದರ್ಬಾರ್. ಬಿಜೆಪಿಯ ಪಾಲಿಕೆಯ 28 ಸದಸ್ಯರು ತಮ್ಮ ಪ್ರಾಥಮಿಕ ಸದಸ್ಯತ್ವಕ್ಕೆ ರಾಜೀನಾಮೆ ನೀಡಿದ್ದಾರೆ. ಶ್ರೀರಾಮುಲು ಅವರ ಬಿಎಸ್ಆರ್ ಪಕ್ಷ ಚುನಾವಣೆ ಎದುರಿಸದೆ ಬಳ್ಳಾರಿ ಮಾಹಾನಗರ ಪಾಲಿಕೆಯಲ್ಲಿ ವಿಜಯ ಪತಾಕೆ ಹಾರಿಸಿದೆ.

ಪಕ್ಷದ ಸದಸ್ಯರ ಹಠಾತ್ ನಿರ್ಧಾರದಿಂದ ತಬ್ಬಿಬ್ಬಾಗಿರುವ ಬಿಜೆಪಿ ಸದ್ಯದ ಪರಿಸ್ಥಿತಿಯನ್ನು ನಿಭಾಯಿಸಲಾಗದೆ ಕೈಚೆಲ್ಲಿ ಕೂತಿದೆ. ಬಳ್ಳಾರಿ ಪಾಲಿಕೆಯಲ್ಲಿ ಈಗ ಬಹುಪಾಲು ಶ್ರೀರಾಮುಲು ಬೆಂಬಲಿಗರಿಂದಲೇ ತುಂಬಿದೆ. ಈ ಮೂಲಕ ಬಳ್ಳಾರಿಯಲ್ಲೇ ಪಕ್ಷದ ಖಾತೆ ತೆರೆದು ಗೆಲುವಿಗೆ ಮುನ್ನುಡಿ ಬರೆದಿದ್ದಾರೆ.

ಶುಕ್ರವಾರ ( ಮಾ 16) ನಡೆದ ಚುನಾವಣೆಯಲ್ಲಿ ಮೇಯರ್ ಆಗಿ ಕೆ ಹನುಮಂತಪ್ಪ ಮತ್ತು ಉಪ ಮೇಯರ್ ಆಗಿ ಇಬ್ರಾಹಿಮ್ ಬಾಬು ಆಯ್ಕೆಯಾಗಿದ್ದೇ ತಡ ಬಿಎಸ್ಆರ್ ಪಕ್ಷದ ಬಾವುಟ ರಾರಾಜಿಸಿತು. ರೆಡ್ಡಿ ಸಹೋದರರು, ರಾಮುಲು ಪರ ಘೋಷಣೆ ಕೇಳಿಬಂತು.

ಬಳ್ಳಾರಿ ಪಾಲಿಕೆಯ 35 ಸದಸ್ಯರಲ್ಲಿ 30 ಬಿಜೆಪಿ, 3 ಜೆಡಿಎಸ್ ಮತ್ತು 2 ಬಿಎಸ್ಪಿ ಸದಸ್ಯರಿದ್ದರು.

Published On March 17, 2012