ಸಂಕ್ರಾತಿಗೆ ಬೆಲೆ ಏರಿಕೆಯ ಕಹಿ

ಬೆಂಗಳೂರು, ಜ. 13 : ಕಳೆದ ಬಾರಿಯ ಸಂಕ್ರಾತಿಯಂದು ಸೂರ್ಯಗ್ರಹಣವಾದರೆ, ಈ ಬಾರಿ ಎಳ್ಳು ಬೆಲ್ಲ ತಿಂದು ದಿನನಿತ್ಯ ಪದಾರ್ಥಗಳ ದುಬಾರಿ ಬೆಲೆ ಬಗ್ಗೆ ಮಾತನಾಡಬೇಕಾದ ಪರಿಸ್ಥಿತಿ. ಎಲ್ಲಾ ತರಕಾರಿಗಳ ಜೊತೆಗೆ ಕಬ್ಬು, ಬೆಲ್ಲಗಳ ಬೆಲೆಯೂ ತುಟ್ಟಿಯೋ ತುಟ್ಟಿ.

ಸಂಪ್ರದಾಯದಂತೆ ಹಬ್ಬ ಆಚರಿಸಬೇಕಾದ ಅನಿವಾರ್ಯತೆ ಇರುವುದರಿಂದ ಕಬ್ಬು, ಎಳ್ಳು, ಬೆಲ್ಲ, ಸಕ್ಕರೆ ಅಚ್ಚು ಮುಂತಾದವುಗಳ ಬೆಲೆ ಕೂಡ ಕಳೆದ ಬಾರಿಗಿಂತ ಈ ಬಾರಿ ವಿಪರೀತ ಜಾಸ್ತಿಯಾಗಿದೆ. ಹಾಗಾಗಿ ಕೊಳ್ಳುವ ಪ್ರಮಾಣವನ್ನು ಕಮ್ಮಿ ಮಾಡಿಯಾದರೂ ಕಷ್ಟಪಟ್ಟು ಹಬ್ಬ ಆಚರಿಸಬೇಕಾಗಿದೆ. ಇದರ ಜೊತೆಗೆ ಹೂಗಳ ಬೆಲೆ ಕೂಡಾ ಗಗನಕ್ಕೇರಿದೆ. ಮಲ್ಲಿಗೆ ಹೂವಿನ ಬೆಲೆ ಕೆಜಿಗೆ 900 -1000, ಸೇವಂತಿಗೆ 100 -140, ಕನಕಾಂಬರ 500 -650, ಗುಲಾಬಿ ಹೂವು 150 -200, ಸುಗಂಧರಾಜ ಹೂಗಳ ಬೆಲೆ 100 -150 ರುಪಾಯಿವರೆಗಿದೆ.

ಇನ್ನು ಕಪ್ಪು ಕಬ್ಬು ಒಂದು ಕಟ್ಟಿಗೆ ರುಪಾಯಿ 200 - 225, ಕೆಂಪು ಕಬ್ಬು 100 -125, ಎಳ್ಳು ಕೆಜಿಗೆ 125-150, ಬೆಲ್ಲ 170-200, ಸಕ್ಕರೆ ಅಚ್ಚು 125-200, ಹುರಿಗಡಲೆ 50 -70, ಜೀರಿಗೆ ಪೆಪ್ಪರ್ ಮಿಂಟ್ 80 -95, ಎಲ್ಲದರ ಮಿಶ್ರಣ 125 -150 ರುಪಾಯಿವರೆಗಿದೆ. ಕಳೆದ ಬಾರಿಗೆ ಹೋಲಿಸಿದ್ದಲ್ಲಿ ಈ ಬಾರಿ ಸಂಕ್ರಾಂತಿ ಹಬ್ಬಕ್ಕೆ ಉಪಯೋಗಿಸುವ ವಸ್ತುಗಳ ಬೆಲೆ ಶೇ. 20 ರಷ್ಟು ದುಬಾರಿಯಾಗಿದೆ.(ಸಂಕ್ರಾಂತಿ)

English summary

Inflation has touched the essential yellu and bella of Sankranthi festival too his year, with prices of most products seeing a 20 percent hike.