ಚಂಪಾಷಷ್ಠಿ ಮಡೆಸ್ನಾನಕ್ಕೆ ಕುಕ್ಕೆ ಸುಬ್ರಮಣ್ಯ ಸಜ್ಜು

ಸುಬ್ರಹ್ಮಣ್ಯ, ಡಿ.9: ಶ್ರೀಕ್ಷೇತ್ರ ಕುಕ್ಕೆ ಸುಬ್ರಹ್ಮಣ್ಯದಲ್ಲಿ ವಾರ್ಷಿಕ ಜಾತ್ರೋತ್ಸವ ಪ್ರಯುಕ್ತ ಡಿ. 10ರಂದು ರಾತ್ರಿ ಪಂಚಮಿ ರಥೋತ್ಸವ ಮತ್ತು 11ರಂದು ಬೆಳಿಗ್ಗೆ ಚಂಪಾಷಷ್ಠಿ ಮಹಾ ರಥೋತ್ಸವ ನಡೆಯಲಿದೆ. ಚಂಪಾಷಷ್ಠಿಯಂದು ನಡೆಯುವ 'ಮಡೆಸ್ನಾನ'ದ ವಿರುದ್ಧ ರಾಜ್ಯಾದ್ಯಂತ ಈಗಾಗಲೇ ವಿರೋಧ ವ್ಯಕ್ತವಾಗಿದೆ. ಆದರೆ, ದೇಗುಲದ ಆಡಳಿತ ಮಂಡಳಿ ಸಾಂಪ್ರದಾಯಿಕ ಆಚರಣೆ ಸಾಂಗವಾಗಿ ನಡೆಸಲು ಬೇಕಾದ ಎಲ್ಲಾ ರೀತಿಯ ವ್ಯವಸ್ಥೆಯನ್ನು ಕಲ್ಪಿಸಿದ್ದಾರೆ.

ಬ್ರಾಹ್ಮಣರು ಊಟ ಮಾಡಿ ಎಸೆದ ಎಂಜಲೆಲೆಯ ಮೇಲೆ ಉಪವಾಸವ್ರತ ಭಕ್ತರು ಮಡೆಸ್ನಾನ ಮಾಡಿದರೆ ಅವರಿಗೆ ಅಂಟಿಕೊಂಡಿರುವ ಚರ್ಮರೋಗ ಇತ್ಯಾದಿಗಳು ನಿವಾರಣೆಯಾಗುತ್ತದೆ ಎಂದು ಜನರು ನಂಬಿ ಈ ಆಚರಣೆ ಮಾಡುತ್ತಾರೆ, ದೇವಸ್ಥಾನದ ಒಳಾಂಗಣದಲ್ಲಿ ಷಷ್ಠಿ ಉತ್ಸವದ ಸಂದರ್ಭದಲ್ಲಿ ಈ ಸೇವೆ ನಡೆಯುತ್ತದೆ.

ಮಡೆಸ್ನಾನ(ಉರುಳು ಸೇವೆ) ಮಾಡಲು ಇಚ್ಛಿಸಿದವರು ಮಾತ್ರ ಆ ಸೇವೆ ಮಾಡಬಹುದು. ಇದಕ್ಕೆ ದೇಗುಲದ ಆಡಳಿತ ಮಂಡಳಿ ಯಾವುದೇ ಸೇವಾ ಶುಲ್ಕ ವಿಧಿಸುವುದಿಲ್ಲ. ದೇಗುಲದಿಂದ ಸುಮಾರು 1.5 ಕಿ.ಮೀ ದೂರದಲ್ಲಿರುವ ಕುಮಾರಧಾರಾ ನದಿಯಿಂದ ದೇವಳದವರೆಗೂ ಬೀದಿಯಲ್ಲಿ ಉರುಳಿಕೊಂಡು ಹೋಗಿ ಹರಕೆ ತೀರಿಸುವುದುಂಟು.

ಪಂಚಮಿ ದಿನದಂದು ಉಮಾಮಹೇಶ್ವರ ದೇವರನ್ನುಳ್ಳ ರಥವನ್ನು ನಾಗರ ಬೆತ್ತ ಬಳಸಿ ಎಳೆಯಲಾಗುತ್ತದೆ, ರಥೋತ್ಸವದ ನಂತರ ಷಷ್ಠಿಕಟ್ಟೆಯಲ್ಲಿ ಉಮಾಮಹೇಶ್ವರ ಹಾಗೂ ಸುಬ್ರಮಣ್ಯ ದೇವರ ಉತ್ಸವ ಮೂರ್ತಿಗಳನ್ನು ಪ್ರತಿಷ್ಠಾಪಿಸಿ ಪೂಜಿಸಲಾಗುತ್ತದೆ. ದೇವಳದ ಒಳಾಂಗಣದಲ್ಲಿ ನಡೆಯುವ ಮಡೆಸ್ನಾನದಲ್ಲಿ ಸಾವಿರಾರು ಜನ ಪಾಲ್ಗೊಳ್ಳುತ್ತಾರೆ.

ಮಡೆಸ್ನಾನವು ಸುಮಾರು 400ವರ್ಷಗಳಷ್ಟು ಹಳೆಯದಾದ ಜನರ ನಂಬಿಕೆಯಲ್ಲಿ ಉಳಿದುಕೊಂಡು ಬಂದಿರುವ ಧಾರ್ಮಿಕ ಪದ್ಧತಿ., ಇದನ್ನು ತಕ್ಷಣ ನಿಲ್ಲಿಸಲು ಸಾಧ್ಯವಿಲ್ಲ. ಆದರೆ, ಇದು ಜನರೇ ಚಿಂತಿಸಬೇಕಾದ ವಿಚಾರ ಏಕಾಏಕಿ ಬದಲಾವಣೆ ಅಸಾಧ್ಯ ಎಂದು ಕುಕ್ಕೆ ಸುಬ್ರಮಣ್ಯದ ವಿದ್ಯಾ ಪ್ರಸನ್ನ ಸ್ವಾಮೀಜಿ ಹೇಳಿದ್ದಾರೆ.

English summary

Urulu Seve (Made Snana) a religious ritual which has 400 years history, will be performed on December 10 this year in Kukke Subramanya Temple, Dakshina Kannada district. It is practice that Dalits roll on the plantain leaves on which Brahmins have taken food.