ಪಾಕಿಸ್ತಾನ ಮಡಿಲಿಗೆ ಟ್ವೆಂಟಿ-20 ವಿಶ್ವಕಪ್

ಲಾರ್ಡ್ಸ್, ಜೂ. 22 : ಪಾಕಿಸ್ತಾನ ತಂಡ ಎರಡನೇ ಆವೃತ್ತಿಯ ಐಸಿಸಿ ಟಿ20 ವಿಶ್ವಕಪ್ ಚಾಂಪಿಯನ್ ಷಿಪ್ ನಲ್ಲಿ ಪ್ರಶಸ್ತಿಯ ಒಡೆಯನಾಗಿದೆ. ಲಾರ್ಡ್ಸ್ ಮೈದಾನದಲ್ಲಿ ಭಾನುವಾರ ಸಂಜೆ ನಡೆದ ಫೈನಲ್ ಪಂದ್ಯದಲ್ಲಿ ಪಾಕಿಸ್ತಾನ ತಂಡ ಶ್ರೀಲಂಕಾ ತಂಡವನ್ನು 8 ವಿಕೆಟ್ ಗಳಿಂದ ಸೋಲಿಸಿ ವಿಶ್ವ ಚಾಂಪಿಯನ್ ಆಗಿ ಹೊರಹೊಮ್ಮಿದೆ.

ಟಾಸ್ ಗೆದ್ದು ಬ್ಯಾಟಿಂಗ್ ಆಯ್ದುಕೊಂಡ ಶ್ರೀಲಂಕಾ ಪಂದ್ಯದ ಮೊದಲ ಓವರ್ ನಲ್ಲೇ ಎರಡು ವಿಕೆಟ್ ಕಳೆದುಕೊಂಡಿತು. ಸರಣಿಯಲ್ಲಿ ಪ್ರಚಂಡ ಫಾರಂನಲ್ಲಿದ್ದ ದಿಲ್ಸಾನ್ ಮತ್ತು ಮುಬಾರಕ್ ಯಾವುದೇ ರನ್ ಗಳಿಸದೆ ಪೆವಲಿನ್ ಮರಳಿದರು. ನಾಯಕನ ಆಟವಾಡಿದ ಸಂಗಕ್ಕಾರ್ 64 ಗಳಿಸಿದರು. ಜಯಸೂರ್ಯ 17, ಮ್ಯಾಥೀವ್ಸ್ 35 ರನ್ ಗಳಿಸಿದರು. ಶ್ರೀಲಂಕಾ ನಿಗದಿತ ಓವರ್ ಗಳಲ್ಲಿ 6 ವಿಕೆಟ್ ಕಳೆದುಕೊಂಡು 138 ರನ್ ಗಳಿಸಿತು. ಪಾಕ್ ಪರ ರಜಾಕ್ 3, ಅಮೀರ್, ಆಫ್ರೀದಿ ಮತ್ತು ಉಮರ್ ಗುಲ್ ತಲಾ ಒಂದೊಂದು ವಿಕೆಟ್ ಪಡೆದರು.

139 ರನ್ ಗಳ ಗುರಿ ಬೆನ್ನಟ್ಟಿದ ಪಾಕ್ ಇನ್ನೂ 1.2 ಓವರ್ ಬಾಕಿ ಇರುತ್ತಲೇ ಕೇವಲ 2 ವಿಕೆಟ್ ಕಳೆದುಕೊಂಡು ಗುರಿ ತಲುಪಿತು. ಸಮಯೋಜಿತ ಆಟ ಪ್ರದರ್ಶಿಸಿದ ಆಫ್ರಿದಿ ಅಜೇಯ 54 ರನ್ ಗಳಿಸಿದರು. ಅಕ್ಮಲ್ 37, ಹಸನ್ 19 ಮತ್ತು ಮಲಿಕ್ ಅಜೇಯ 24 ರನ್ ಗಳಿಸಿದರು. ಆಲ್ರೌಂಡರ್ ಆಟ ಪ್ರದರ್ಶಿಸಿದ ಆಫ್ರಿದಿ ಪಂದ್ಯಶ್ರೇಷ್ಠ ಪ್ರಶಸ್ತಿ ಗಳಿಸಿದರು. ಶ್ರೀಲಂಕಾ ಆಟಗಾರ ತಿಲಕರತ್ನೆ ದಿಲ್ಸಾನ್ ಸರಣಿಶ್ರೇಷ್ಠ ಪ್ರಶಸ್ತಿಗೆ ಪಾತ್ರರಾದರು.

(ಏಜನ್ಸೀಸ್)