ವೆಬ್ ನಲ್ಲಿ ವಿಹರಿಸದ ವಿಮಾನ ನಿಲ್ದಾಣಗಳು

ಬೆಂಗಳೂರು, ಜೂ.4:ಭಾರತದಲ್ಲಿ ಒಟ್ಟು 92 ಸುಸಜ್ಜಿತ ವಿಮಾನ ನಿಲ್ದಾಣಗಳಿವೆ. ಅವುಗಳಲ್ಲಿ ಒಟ್ಟು 12 ಅಂತಾರಾಷ್ಟ್ರೀಯ ಮಾನ್ಯತೆಯುಳ್ಳ ನಿಲ್ದಾಣಗಳು. ಆದರೆ ಇವುಗಳಲ್ಲಿ ಕೇವಲ ದೆಹಲಿ,ಮುಂಬೈ, ಬೆಂಗಳೂರು , ಹೈದರಾಬಾದ್ ಮತ್ತು ಕೊಚ್ಚಿನ್ ಈ ಐದು5 ನಿಲ್ದಾಣಗಳು ಮಾತ್ರ ವೆಬ್ ಲೋಕದಲ್ಲಿ ವಿಹರಿಸಿದೆ. ಅಂದರೆ, ತನ್ನದೇ ಆದ ವೆಬ್ ಸೈಟ್ ಹೊಂದಿದೆ ಎಂಬುದು ಅಚ್ಚರಿಯಾದರೂ ಸತ್ಯ.

ಆದರೆ, ಅಮೆರಿಕದಲ್ಲಿ ಎಲ್ಲವೂ ತದ್ವಿರುದ್ಧ ಅಲ್ಲಿ ಸಣ್ಣ ಪುಟ್ಟ ವಿಮಾನ ನಿಲ್ದಾಣಗಳು ವೆಬ್ ಲೋಕದ ಲಾಭ ಪಡೆಯುವಲ್ಲಿ ಮುಂದಿವೆ. ಭಾರತದಲ್ಲಿ ಪ್ರಮುಖ ನಗರಗಳಾದ ಚೆನ್ನೈ ಹಾಗೂ ಕೋಲ್ಕತ್ತಾದ ವಿಮಾನ ನಿಲ್ದಾಣಗಳು ಈ ಬಗ್ಗೆ ತಲೆ ಕೆಡಿಸಿಕೊಂಡಿಲ್ಲ. ದಿನಕ್ಕೆ ಲಕ್ಷಾಂತರ ಜನರು ಬಂದು ಹೋಗಿ ಮಾಡುವ ಈ ತಾಣಗಳು ಇನ್ನೂ ವೆಬ್ ಪ್ರಪಂಚದಲ್ಲಿ ಸ್ಥಾನ ಪಡೆಯಲು ಹಿಂದೇಟು ಹಾಕುತ್ತಿರುವುದು ವಿಷಾದನೀಯ. ಆದರೆ, ಕೊಚ್ಚಿನ್ , ಹೈದರಾಬಾದ್ ಏರ್ ಪೋರ್ಟ್ ಗಳು ವೆಬ್ ಮೂಲಕ ಪ್ರಯಾಣಿಕರಿಗೆ ಅಗತ್ಯ ಮಾಹಿತಿಯನ್ನು ನೀಡುತ್ತಿದೆ.

ಸರ್ಕಾರಿ ಹಾಗೂ ಖಾಸಗಿ ಸಹಭಾಗಿತ್ವದ ಕೊಚ್ಚಿನ್ ಅಂತಾರಾಷ್ಟ್ರೀಯ ಏರ್ ಪೋರ್ಟ್ ಲಿ (CIAL) ತನ್ನದೇ ಆದ ವೆಬ್ ಸೈಟ್ ಪಡೆದ ಮೊದಲ ನಿಲ್ದಾಣ ಎನಿಸಿದೆ. ವಿಮಾನಗಳ ಆಗಮನ, ನಿರ್ಗಮನ, ತಂಗುವ ತಾಣದ ಬಗ್ಗೆ ಮಾಹಿತಿಯನ್ನು ಗ್ರಾಹಕರಿಗೆ ನೀದಲಾಗುತ್ತಿದ್ದು ಪ್ರತಿ 3 ನಿಮಿಷಕ್ಕೆ ವೆಬ್ ಪುಟಗಳು ಹೊಸ ಬದಲಾವಣೆಗಳನ್ನು ಕಾಣುತ್ತಿವೆ ಎನ್ನುತ್ತಾರೆ ಸಿಐಎಎಲ್ ನ ಐಟಿ ವಿಭಾಗದ ಮುಖ್ಯಸ್ಥ ಶ್ರೀಜೀತ್ ಪ್ರಭಾಕರನ್.ಇದಲ್ಲದೆ ಗ್ರಾಹಕರಿಗೆ ಅಗತ್ಯ ಸೌಲಭ್ಯ, ಸೇವೆಗಳು, ಮಳಿಗೆಗಳ ಮಾಹಿತಿ ನೀಡಲು ಮತ್ತೊಂದು ವೆಬ್ ತಾಣವನ್ನು ತೆರೆಯಲಾಗುವುದು ಎಂದರು.

ಹೊಸ ತಂತ್ರಜ್ಞಾನವನ್ನು ತನ್ನದಾಗಿಸಿಕೊಳ್ಳಲು ಇಚ್ಛೆಪಡದ ಸರ್ಕಾರಿ ಸ್ವಾಮ್ಯದ ನಿಲ್ದಾಣಗಳು ಒಂದೆಡೆಯಾದರೆ, ಇನ್ನೊಂದೆಡೆ ಖಾಸಗಿ ನಿಲ್ದಾಣಗಳು ಪ್ರಯಾಣಿಕರಿಗೆ ಹೆಚ್ಚಿನ ಸೌಲಭ್ಯ ನೀಡಲು ವೆಬ್ ಮೊರೆ ಹೋಗುತ್ತಿವೆ.ಈ ಬಗ್ಗೆಏರ್ ಪೋರ್ಟ್ ಅಥಾರಿಟಿ ಆಫ್ ಇಂಡಿಯಾ ದಿವ್ಯ ನಿರ್ಲಕ್ಷ್ಯ ತೋರುತ್ತಿದೆ ಎಂಬುದಂತೂ ಗೋಚರಿಸುತ್ತದೆ.

(ದಟ್ಸ್ ಕನ್ನಡವಾರ್ತೆ)