ಶುಕ್ರವಾರ ಮನಮೋಹನ್ ಸಿಂಗ್ ಪ್ರಮಾಣ ವಚನ

ಬೆಂಗಳೂರು, ಮೇ. 20 : ಡಾ ಮನಮೋಹನ್ ಸಿಂಗ್ ಅವರನ್ನು ಸಂಸದೀಯ ಪಕ್ಷದ ನಾಯಕರನ್ನಾಗಿ ಮಂಗಳವಾರ ಆಯ್ಕೆ ಮಾಡಲಾಗಿದ್ದು, ಶುಕ್ರವಾರ ಅವರುನೂತನ ಸರಕಾರದ ಪ್ರಧಾನಮಂತ್ರಿಯಾಗಿ ಪ್ರತಿಜ್ಞಾವಿಧಿಯನ್ನು ಸ್ವೀಕರಿಸುವ ನಿರೀಕ್ಷೆಯಿದೆ. ಪಕ್ಷದಿಂದ ಪ್ರಧಾನಿ ಅಭ್ಯರ್ಥಿಯೆಂದು ಈಗಾಗಲೇ ಹೆಸರಿಸಲ್ಪಟ್ಟಿರುವ ಸಿಂಗ್, ಐದು ವರ್ಷಗಳ ಕಾಲ ಪೂರ್ಣಾವಧಿ ಮುಗಿಸಿ ಎರಡನೇ ಬಾರಿ ಪ್ರಧಾನಿಯಾಗುತ್ತಿರುವ ಎರಡನೇ ವ್ಯಕ್ತಿ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಜವಾಹರ್ ಲಾಲ್ ನೆಹರು ಅವರೊಬ್ಬರೆ ಈ ವರೆಗೆ ಈ ಖ್ಯಾತಿ ಹೊಂದಿದ್ದರು.

ಸಿಪಿಪಿ ಅಧ್ಯಕ್ಷೆರಾಗಿ ಸೋನಿಯಾ ಗಾಂಧಿ ಪುನರಾಯ್ಕೆಗೊಂಡಿದ್ದು, ಭವಿಷ್ಯದಲ್ಲಿ ಪಕ್ಷ ಇನ್ನಷ್ಟು ಬಲಿಷ್ಠವಾಗಿ ಮೂಡಿಬರುವುದಕ್ಕೆ ಸ್ವಹಿತಾಸಕ್ತಿಗಿಂತ ಪಕ್ಷಕ್ಕೆ ಹೆಚ್ಚಿನ ಆದ್ಯತೆ ನೀಡಲು, ಶಿಸ್ತು ಪಾಲಿಸಲು ಮತ್ತು ಸಂಘಟಿತರಾಗಲು ಪಕ್ಷದ ಕಾರ್ಯಕರ್ತರಿಗೆ ಕರೆ ನೀಡಿದರು. ಅನೇಕ ಹೊಸ ಹಾಗೂ ಯುವ ಮುಖಗಳು ಆಯ್ಕೆಯಾಗಿರುವುದಕ್ಕೆ ಸೋನಿಯಾಗಾಂಧಿ ಹರ್ಷ ವ್ಯಕ್ತಪಡಿಸಿದರು.

ಸಂಭಾವ್ಯ ಸಚಿವರ ಪಟ್ಟಿ

ಪ್ರಣಬ್ ಮುಖರ್ಜಿ, ಮೊಂಟೆಕ್ ಸಿಂಗ್ ಅಹ್ಲುವಾಲಿಯಾ, ಕಮಲ್ ನಾಥ್, ಪಿ ಚಿದಂಬರಂ, ಮಮತಾ ಬ್ಯಾನರ್ಜಿ, ಎ ಕೆ ಎಂಟನಿ, ರಾಹುಲ್ ಗಾಂಧಿ, ಕಪಿಲ್ ಸಿಬಲ್, ಮೀರಾ ನಾಯರ್, ಸುಶೀಲ್ ಕುಮಾರ್ ಸಿಂಧೆ, ಶರದ್ ಪವಾರ್, ಪ್ರಫುಲ್ ಪಟೇಲ್, ಮಲ್ಲಿಕಾರ್ಜನ ಖರ್ಗೆ, ಮಾಣಿಕ್ಯ ಠಾಗೋರ್, ಮಿಲಿಂದ್ ದೇವೋರಾ, ಸಚಿನ್ ಪೈಲೆಟ್, ನವೀನ್ ಜಿಂದಾಲ್, ಜ್ಯೋತಿರಾದಿತ್ಯ ಸಿಂಧಿಯಾ, ಜಿತಿನ್ ಪ್ರಸಾದ್, ಸನ್ಮಾನ್ ಖುರ್ಷಿದ್, ಸಲೀಂ ಶೇರ್ವಾನಿ, ಬೇಣಿ ಪ್ರಸಾದ್ ವರ್ಮಾ, ಎಂ ಕೆ ಅಳಗಿರಿ, ದಯಾನಿಧಿ ಮಾರನ್, ಎ ರಾಜಾ, ಮತ್ತು ಕನಿಮೋಳಿ, ಯೋಜನಾ ಆಯೋಗದ ಅಧ್ಯಕ್ಷರಾಗಿ ಸಿ ರಂಗರಾಜನ್ ಆಯ್ಕೆಯಾಗುವ ಸಾಧ್ಯತೆ ಇದೆ.

(ಏಜನ್ಸೀಸ್)