ಒಬಾಮ ಪ್ರಾರ್ಥನೆಗೆ ಹಿಂದೂ ಪೌರೋಹಿತ್ಯ

ವಾಷಿಂಗ್ ಟನ್, ಜ. 19 : ಜನವರಿ 20 ರಂದು ಅಮೆರಿಕದ ನೂತನ ಅದ್ಯಕ್ಷರಾಗಿ ಬರಾಕ್ ಒಬಾಮಾ ಪ್ರಮಾಣವಚನ ಸ್ವೀಕರಿಸಲಿದ್ದಾರೆ. ಮರುದಿನ ಬರಾಕ್ ಒಬಾಮ ಕರೆದಿರುವ ರಾಷ್ಟ್ರೀಯ ಪ್ರಾರ್ಥನಾ ಕಾರ್ಯಕ್ರಮದಲ್ಲಿ ಭಾಗವಹಿಸಲು ಹಿಂದೂ ಮಹಿಳಾ ಪುರೋಹಿತೆ ಸೇರಿದಂತೆ ಒಟ್ಟು ಆರು ಮಂದಿಗೆ ವಿಶೇಷ ಆಹ್ವಾನ ನೀಡಲಾಗಿದೆ. ಅಧ್ಯಕ್ಷರ ಅಧಿಕಾರ ಸ್ವೀಕಾರ ಸಮಾರಂಭ ಸಮಿತಿಯ ಪರವಾಗಿ ಡಾ ಉಮಾ ಮೈಸೂರ್ ಕರ್ ಅವರನ್ನು ಪ್ರಾರ್ಥನೆ ಕಾರ್ಯಕ್ರಮ ನೆರವೇರಿಸಿಕೊಡುವ೦ತೆ ಆಹ್ವಾನ ನೀಡಲಾಗಿದೆ.

ಡಾ.ಉಮಾ ಅವರು ಉತ್ತರ ಅಮೇರಿಕಾ ಹಿಂದೂ ದೇವಾಲಯ ಸಂಘಟನೆಗಳ ಅಧ್ಯಕ್ಷರಾಗಿದ್ದಾರೆ. ಹಾಗೂ ಸ್ತ್ರೀರೋಗ ತಜ್ಞೆಯಾಗಿ ಮತ್ತು ನ್ಯೂಯಾರ್ಕ್‌ನಲ್ಲಿರುವ ಗಣೇಶ ದೇವಾಲಯದ ಮುಖ್ಯಸ್ಥರಾಗಿ ಕೂಡ ಕೆಲಸ ನಿರ್ವಹಿಸುತ್ತಿದ್ದಾರೆ.

ನ್ಯಾಷನಲ್ ಕ್ಯಾಥೆಡ್ರೆಲ್ ಆಯೋಜಿಸಿರುವ ಈ ಪ್ರಾರ್ಥನಾ ಸಭೆಯಲ್ಲಿ ವಿವಿಧ ಧಾರ್ಮಿಕ ಮುಖಂಡರು ಭಾಗವಹಿಸಲಿದ್ದಾರೆ. ಜಾರ್ಜ್ ವಾಷಿಂಗ್ಟನ್‌‌ನಲ್ಲಿ ನಡೆಯಲಿರುವ ಈ ಪ್ರಾರ್ಥನಾ ಸಭೆ ನಮ್ಮ ದೇಶದ ಧಾರ್ಮಿಕ ಸಹಿಷ್ಣುತೆ ಹಾಗೂ ಸ್ವಾತಂತ್ರ್ಯದ ಪ್ರತೀಕ ಎಂದು ಅಧ್ಯಕ್ಷರ ಅಧಿಕಾರ ಸ್ವೀಕಾರ ಸಮಾರಂಭ ಸಮಿತಿ ಹೇಳಿದೆ.

(ದಟ್ಸ್ ಕನ್ನಡ ವಾರ್ತೆ)