ದೇಶಿ ಪ್ರಯಾಣಿಕರಿಗೆ ಅಭಿವೃದ್ಧಿ ಶುಲ್ಕದ ಹೊರೆ

ಬೆಂಗಳೂರು, ಸೆ.30: ದೇಶಿ ಪ್ರಯಾಣಿಕರು ಇನ್ನು ಮುಂದೆ ಗ್ರಾಹಕಅಭಿವೃದ್ಧಿ ಶುಲ್ಕ [User Development Fee (UDF) ]ದ ವೆಚ್ಚವನ್ನು ಭರಿಸಬೇಕಾಗುತ್ತದೆ. ಆದರೆ ಶುಲ್ಕದ ವೆಚ್ಚ ಹಾಗೂ ಅನುಷ್ಠಾನಗೊಳ್ಳುವ ದಿನಾಂಕದ ಬಗ್ಗೆ ಇನ್ನೂ ಸ್ಪಷ್ಟ ಮಾಹಿತಿ ದೊರೆತಿಲ್ಲ. ಈ ಬಗ್ಗೆ ನಾಗರೀಕ ವಿಮಾನಯಾನ ಇಲಾಖೆಗೆ ಮನವಿ ಕಳಿಸಲಾಗಿದ್ದು, ಶೀಘ್ರದಲ್ಲೆ ಬೆಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಜಾರಿಗೆ ಬರಲಿದೆ ಎಂದು ಬಿಐಎ ನ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ (ಸಿಇಒ)ಅಲ್ಬರ್ಟ್ ಬ್ರೂನರ್ ಹೇಳಿದ್ದಾರೆ.

ಹೈದರಾಬಾದಿನ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ ಈ ರೀತಿಯ ಅಭಿವೃದ್ಧಿ ಶುಲ್ಕವನ್ನು ಸ್ವೀಕರಿಸಲಾಗುತ್ತಿದೆ. ಏರ್ ಟಿಕೆಟ್ ದರದ ಜೊತೆಗೆ ಹೆಚ್ಚುವರಿಯಾಗಿ 375 ರು. ಗಳನ್ನು ದೇಶಿ ಪ್ರಯಾಣಿಕರಿಂದ ಪಡೆಯಲಾಗುತ್ತಿದೆ. ಚೆಕ್ಕಿಂಗ್ ಇನ್ ಗೆ ಮೊದಲು ಅಥವಾ ಬೋರ್ಡಿಂಗ್ ಕಾರ್ಡ್ ಪಡೆದ ನಂತರ ಈ ಶುಲ್ಕವನ್ನು ಪಾವತಿಸಬಹುದಾಗಿದೆ. ಆದರೆ, ಬೆಂಗಳೂರಿನಲ್ಲಿ ಶುಲ್ಕ ವಸೂಲಿಯ ಸ್ವರೂಪ ಇನ್ನೂ ಬಹಿರಂಗವಾಗಿಲ್ಲ.

ಶುಲ್ಕ ವಸೂಲಾತಿ ಬಗ್ಗೆ ಕಿಂಗ್ ಫಿಷರ್ ಏರ್ ಲೈನ್ಸ್ ನ ಮಾಲೀಕ ವಿಜಯ್ ಮಲ್ಯ ಅವರನ್ನು ಕೇಳಿದಾಗ, "ನಾವು ಅಭಿವೃದ್ಧಿ ಶುಲ್ಕ ಹೇರಿಕೆಗೆ ವಿರೋಧಿಗಳಲ್ಲ. ಆದರೆ ಪ್ರಯಾಣ ವೆಚ್ಚದ ಜೊತೆಗೆ ಸೇರಿಸುವುದನ್ನು ಸಹಿಸುವುದಿಲ್ಲ. ಬಿಐಎ ನವರು ಪ್ರತ್ಯೇಕವಾಗಿ ಸ್ವೀಕರಿಸಲಿ. ಆಗ ಯಾರಿಗೂ ಗೊಂದಲವಾಗಲಿ, ತೊಂದರೆಯಾಗಲಿ ಇರುವುದಿಲ್ಲ" ಎಂದರು.

ಈ ನಡುವೆ ಬಿಐಎ ನ ವಿಸ್ತರಣೆ ಕಾರ್ಯ ಪ್ರಗತಿಯಲ್ಲಿದೆ. ಮುಂಬರುವ ಮೂರ್ನಾಲ್ಕು ವರ್ಷಗಳಲ್ಲಿ ಇನ್ನೊಂದು ಟರ್ಮಿನಲ್ ಹಾಗೂ ರನ್ ವೇ ನಿರ್ಮಾಣವಾಗಲಿದೆ. ಸದ್ಯ ಒಂದೆರಡು ವರ್ಷಗಳ ತನಕ ಈಗಿರುವ ಮೂಲಸೌಕರ್ಯಗಳ ಬಳಸಿ ಪ್ರಯಾಣಿಕರ ಟ್ರಾಫಿಕ್ ಅನ್ನು ನಿಭಾಯಿಸಲಾಗುವುದು ಎಂದು ಬ್ರೂನರ್ ಹೇಳಿದರು.
(ದಟ್ಸ್ ಕನ್ನಡ ವಾರ್ತೆ)