ಮದುವೆಗೆ ಚಿನ್ನ ಬೇಡವೇ ಬೇಡ: ಲಕ್ಷಾಂತರ ರೂ. ಸುರಿಯುವ ಬದಲು ಯುವ ಜೋಡಿಗಳ ಹೊಸ ಟ್ರೆಂಡ್ ಏನು ಗೊತ್ತಾ?
ಭಾರತದಲ್ಲಿ 'ಮದುವೆ' ಎಂದರೆ ಎಲ್ಲರಿಗೂ ದುಬಾರಿ ರೇಷ್ಮೆ ಸೀರೆ, ಮೈತುಂಬಾ ಬಂಗಾರದ ಆಭರಣಗಳು, ಅದ್ದೂರಿ ಭೋಜನ ಮತ್ತು ಸಂಭ್ರಮ ಎನ್ನುವುದೇ ನೆನಪಾಗುತ್ತದೆ. ಅದರಲ್ಲೂ ವಧು ಎಂದರೆ ತಲೆಯಿಂದ ಕಾಲಿನವರೆಗೆ ಬಗೆಬಗೆಯ ಚಿನ್ನದ ಒಡವೆಗಳಿಂದ ಕಂಗೊಳಿಸುವುದು ಬಹುಕಾಲದ ಸಾಮಾನ್ಯ ಸಂಪ್ರದಾಯ. ಶತಮಾನಗಳಿಂದಲೂ ಚಿನ್ನವನ್ನು ಕೇವಲ ಆಭರಣವಾಗಿರದೆ, ಅಂತಸ್ತು, ಆರ್ಥಿಕ ಭದ್ರತೆ ಮತ್ತು ಸಂಪ್ರದಾಯದ ಸಂಕೇತವಾಗಿ ನೋಡಲಾಗುತ್ತಿದೆ. ಆದರೆ, ಈಗ ಕಾಲ ಬದಲಾಗಿದೆ. ಇಂದಿನ ಯುವ ಪೀಳಿಗೆ (ಮಿಲೆನಿಯಲ್ಸ್ ಮತ್ತು ಜೆನ್-ಝಿ) ಈ ಹಳೆಯ ಸಂಪ್ರದಾಯವನ್ನು ಗಂಭೀರವಾಗಿ ಪ್ರಶ್ನಿಸುತ್ತಿದ್ದು, "ಮದುವೆಗೆ ಮೈತುಂಬಾ ಚಿನ್ನ ಬೇಕೇ ಬೇಕಾ?" ಎಂಬ ಹೊಸ ಚರ್ಚೆಯನ್ನು ಹುಟ್ಟುಹಾಕಿದ್ದಾರೆ.
ಭಾರತೀಯ ಮದುವೆಗಳಲ್ಲಿ ಚಿನ್ನ ಕೇವಲ ಆಭರಣವಲ್ಲ; ಅದು ಕರೆನ್ಸಿ, ಭದ್ರತೆ, ಅಂತಸ್ತು ಮತ್ತು ಭಾವನೆಗಳ ಪ್ರತೀಕ. ಇಂತಹ ಆಳವಾದ ನಂಬಿಕೆಗಳಿರುವ ನಮ್ಮ ಸಮಾಜದಲ್ಲಿ ಚಿನ್ನದಿಂದ ದೂರ ಸರಿಯುತ್ತಿರುವ ಈ ಬೆಳವಣಿಗೆ ನಿಜಕ್ಕೂ ಗಮನಾರ್ಹವಾಗಿದೆ.
ಗಗನಕ್ಕೇರುತ್ತಿರುವ ಚಿನ್ನದ ಬೆಲೆ ಮತ್ತು ಬದಲಾದ ಮನಸ್ಥಿತಿ
ಪ್ರಸ್ತುತ ಮಾರುಕಟ್ಟೆಯಲ್ಲಿ 10 ಗ್ರಾಂ ಚಿನ್ನದ ಬೆಲೆ 70,000 ದಿಂದ 75,000 ರೂ. ಗಡಿ ದಾಟಿದೆ. ಹೀಗಿರುವಾಗ, ಮದುವೆಗಾಗಿ ಕೆಜಿಗಟ್ಟಲೆ ಚಿನ್ನ ಖರೀದಿಸುವುದು ಮಧ್ಯಮ ವರ್ಗದ ಕುಟುಂಬಗಳಿಗೆ ದೊಡ್ಡ ಆರ್ಥಿಕ ಹೊರೆಯಾಗಿ ಪರಿಣಮಿಸುತ್ತಿದೆ. ಮದುವೆ ದಿನ ಕೇವಲ ಒಂದೆರಡು ಗಂಟೆಗಳ ಕಾಲ ಪ್ರದರ್ಶನಕ್ಕಾಗಿ ಇಷ್ಟೊಂದು ಹಣ ಸುರಿದು, ನಂತರ ಅದನ್ನು ಬ್ಯಾಂಕ್ ಲಾಕರ್ಗಳಲ್ಲಿ ಭದ್ರಪಡಿಸುವುದು ಎಷ್ಟು ಸರಿ? ಎಂಬುದು ಯುವ ಜೋಡಿಗಳ ಪ್ರಶ್ನೆಯಾಗಿದೆ. ಈ ಕಾರಣಕ್ಕಾಗಿಯೇ ಅನೇಕರು ಚಿನ್ನದ ಬದಲು ಪರ್ಯಾಯ ಮಾರ್ಗಗಳನ್ನು ಹುಡುಕುತ್ತಿದ್ದಾರೆ. ಕೇವಲ ಅಂತಸ್ತು ತೋರಿಸುವುದಕ್ಕಾಗಿ ಸಾಲ ಮಾಡಿ ಒಡವೆ ಖರೀದಿಸುವ ಬದಲು, ಆ ಹಣವನ್ನು ಭವಿಷ್ಯದ ಭದ್ರತೆಗಾಗಿ ಬಳಸಲು ಯುವಜನತೆ ಮುಂದಾಗುತ್ತಿದ್ದಾರೆ.
ಜನವರಿ 2023 ರಲ್ಲಿ ವಿವಾಹವಾದ 30 ವರ್ಷದ ದಂತ ವೈದ್ಯೆ ಡಾ. ಶ್ರೀಕುಟ್ಟಿ ಸುನಿಲ್ಕುಮಾರ್, ವರದಕ್ಷಿಣೆ ಮತ್ತು ಚಿನ್ನದ ಮೇಲಿನ ನಿರೀಕ್ಷೆಗಳು ಹೇಗೆ ಆರ್ಥಿಕ ಹೊರೆ, ಕೌಟುಂಬಿಕ ಹಿಂಸೆ ಮತ್ತು ಆತ್ಮಹತ್ಯೆಯಂತಹ ಗಂಭೀರ ಸಮಸ್ಯೆಗಳಿಗೆ ಕಾರಣವಾಗುತ್ತವೆ ಎಂಬುದನ್ನು ಅರಿತು ಈ ನಿರ್ಧಾರ ತೆಗೆದುಕೊಂಡರು. "ನನ್ನ ಮದುವೆಯಲ್ಲಿ ಚಿನ್ನವನ್ನು ಸಂಪೂರ್ಣವಾಗಿ ತಪ್ಪಿಸಲು ನಾನು ಕಟ್ಟುನಿಟ್ಟಾದ ನಿರ್ಧಾರ ಮಾಡಿದೆ. ನಾನು ಭೌತಿಕ ವಸ್ತುಗಳಿಗಿಂತ ಮದುವೆಯ ಅರ್ಥ ಮತ್ತು ಅನುಭವದ ಮೇಲೆ ಹೆಚ್ಚು ಗಮನಹರಿಸಲು ಬಯಸಿದ್ದೆ" ಎಂದು ಕೊಚ್ಚಿ ಮೂಲದ ವೈದ್ಯೆ ಹೇಳುತ್ತಾರೆ. ಆರಂಭದಲ್ಲಿ ಪೋಷಕರು ಹಿಂದೇಟು ಹಾಕಿದರೂ, ನಂತರ ಅವರ ಆಯ್ಕೆಯನ್ನು ಬೆಂಬಲಿಸಿದರು. ಶ್ರೀಕುಟ್ಟಿ ಕೇವಲ 2,500 ರೂಪಾಯಿ ಬೆಲೆಯ ಅಮೇರಿಕನ್ ಡೈಮಂಡ್ ಜ್ಯುವೆಲರಿ ಸೆಟ್ ಧರಿಸಿ ಕಂಗೊಳಿಸಿದರು.
ಪೋಷಕರಿಗೆ ಹೊರೆಯೇಕೆ?
ಕೇರಳದ ತಿರುವಲ್ಲಾ ಮೂಲದ ಬ್ಯಾಂಕಿಂಗ್ ವೃತ್ತಿಪರ ಗೌರಿ ಎಸ್ ನಾಯರ್ (30) ಮದುವೆಯಾದಾಗ, ಮದುವೆಯು ಪೋಷಕರಿಗೆ ಆರ್ಥಿಕ ಹೊರೆಯಾಗುವುದು ಇಷ್ಟವಿರಲಿಲ್ಲ. "ನಾನು ಮಧ್ಯಮ ವರ್ಗದ ಕುಟುಂಬದಿಂದ ಬಂದವಳು. ನನ್ನ ಪೋಷಕರು ನಮ್ಮ ಶಿಕ್ಷಣಕ್ಕಾಗಿ ಪಟ್ಟಿರುವ ಕಷ್ಟ ನನಗೆ ತಿಳಿದಿದೆ. ದಿನೇ ದಿನೇ ಏರುತ್ತಿರುವ ಚಿನ್ನದ ಬೆಲೆಯ ನಡುವೆ ಸಾಲ ಮಾಡಿ ಚಿನ್ನ ಖರೀದಿಸುವುದು ಜಾಣತನವಲ್ಲ," ಎಂಬುದು ಅವರ ಸ್ಪಷ್ಟ ನಿಲುವು. ಪ್ರತಿದಿನ ಧರಿಸುವ ಮಾಂಗಲ್ಯ ಸರವನ್ನು ಹೊರತುಪಡಿಸಿ, ಬೇರೆ ಯಾವುದೇ ಚಿನ್ನದ ಒಡವೆಗಳನ್ನು ಅವರು ಖರೀದಿಸಲಿಲ್ಲ.
ಲ್ಯಾಬ್-ಗ್ರೋನ್ ವಜ್ರಗಳು ಮತ್ತು ಆರ್ಟಿಫಿಷಿಯಲ್ ಜ್ಯುವೆಲರಿ ಟ್ರೆಂಡ್
ಚಿನ್ನದ ಮೇಲಿನ ವ್ಯಾಮೋಹ ಕಡಿಮೆಯಾಗುತ್ತಿರುವಂತೆ, ಮಾರುಕಟ್ಟೆಯಲ್ಲಿ ಕೃತಕ ಆಭರಣಗಳಿಗೆ ಮತ್ತು ಲ್ಯಾಬ್-ಗ್ರೋನ್ ವಜ್ರಗಳಿಗೆ (Lab-Grown Diamonds) ಭಾರೀ ಬೇಡಿಕೆ ಸೃಷ್ಟಿಯಾಗಿದೆ. ನೋಡಲು ಅಸಲಿ ಚಿನ್ನ ಮತ್ತು ವಜ್ರದಂತೆಯೇ ಕಾಣುವ, ಆದರೆ ಬೆಲೆಯಲ್ಲಿ ಅತ್ಯಂತ ಕೈಗೆಟುಕುವ ದರದಲ್ಲಿ ಸಿಗುವ ಕುಂದನ್, ಪೋಲ್ಕಿ ಮತ್ತು ಬೆಳ್ಳಿಯ ಆಧಾರಿತ ಜ್ಯುವೆಲರಿಗಳನ್ನು ವಧುವಿನ ಅಲಂಕಾರಕ್ಕೆ ಅತಿ ಹೆಚ್ಚಾಗಿ ಬಳಸಲಾಗುತ್ತಿದೆ. ಬಾಲಿವುಡ್ ತಾರೆಯರು ಸೇರಿದಂತೆ ಅನೇಕ ಸೆಲೆಬ್ರಿಟಿಗಳು ಕೂಡ ತಮ್ಮ ಮದುವೆಯಲ್ಲಿ ಮಿನಿಮಲಿಸ್ಟಿಕ್ ಡಿಸೈನ್ನ ಆಭರಣಗಳನ್ನು ಧರಿಸುವ ಮೂಲಕ ಈ ಟ್ರೆಂಡ್ಗೆ ಮತ್ತಷ್ಟು ಜನಪ್ರಿಯತೆ ತಂದುಕೊಟ್ಟಿದ್ದಾರೆ. ಇದು ಕೇವಲ ಹಣ ಉಳಿಸುವ ತಂತ್ರವಲ್ಲ, ಬದಲಾಗಿ ವಿಭಿನ್ನವಾಗಿ ಮತ್ತು ಸುಂದರವಾಗಿ ಕಾಣುವ ಆಧುನಿಕ ಫ್ಯಾಷನ್ ಕೂಡ ಆಗಿದೆ ಎಂದು ವಿನ್ಯಾಸಕರು ಅಭಿಪ್ರಾಯಪಡುತ್ತಾರೆ.
ಸಮಾಜದ ದೃಷ್ಟಿಕೋನದಲ್ಲಿ ಬದಲಾವಣೆ
ಮೊದಲೆಲ್ಲಾ ಮದುವೆಯಲ್ಲಿ ವಧು ಕಡಿಮೆ ಚಿನ್ನ ಹಾಕಿದ್ದರೆ, ಸಮಾಜ ಮತ್ತು ಸಂಬಂಧಿಕರು ಆಡಿಕೊಳ್ಳುತ್ತಾರೆ ಎಂಬ ಭಯ ಪೋಷಕರಲ್ಲಿ ಹೆಚ್ಚಾಗಿ ಇರುತ್ತಿತ್ತು. ಆದರೆ, ಈಗ ವಿದ್ಯಾವಂತ ಯುವಜನತೆ ಈ "ಸ್ಟೇಟಸ್ ಸಿಂಬಲ್" ಕಲ್ಪನೆಯನ್ನು ಮುರಿಯುತ್ತಿದ್ದಾರೆ. ಪೋಷಕರಿಗೂ ಸಹ ಇದರ ಹಿಂದಿನ ಆರ್ಥಿಕ ಲಾಭಗಳು ಅರ್ಥವಾಗುತ್ತಿದ್ದು, ಮಕ್ಕಳ ಈ ದಿಟ್ಟ ನಿರ್ಧಾರಕ್ಕೆ ಬೆಂಬಲ ಸೂಚಿಸುತ್ತಿದ್ದಾರೆ. ಒಟ್ಟಾರೆಯಾಗಿ, 'ಚಿನ್ನವಿಲ್ಲದ ಮದುವೆ' ಎಂಬುದು ಕೇವಲ ಒಂದು ತಾತ್ಕಾಲಿಕ ಟ್ರೆಂಡ್ ಆಗದೆ, ಭಾರತೀಯ ವಿವಾಹ ಸಂಪ್ರದಾಯದ ಆರ್ಥಿಕ ಹಾಗೂ ಬೌದ್ಧಿಕ ಬದಲಾವಣೆಯ ದಿಕ್ಸೂಚಿಯಾಗಿ ಹೊರಹೊಮ್ಮುತ್ತಿದೆ. ಆಡಂಬರಕ್ಕಿಂತ ಅರ್ಥಪೂರ್ಣ ಬದುಕಿಗೆ ಇಂದಿನ ಪೀಳಿಗೆ ಒತ್ತು ನೀಡುತ್ತಿರುವುದು ನಿಜಕ್ಕೂ ಸ್ವಾಗತಾರ್ಹ ಬದಲಾವಣೆಯಾಗಿದೆ.
Click it and Unblock the Notifications
Sign in with Google