ಸುಪ್ರಿಂಕೋರ್ಟ್‌ ತೀರ್ಪು ಅನ್ವಯ 26 ಮುನ್ಸೀಫರು ಮನೆಗೆ

ಬೆಂಗಳೂರು : ಸುಪ್ರಿಂಕೋರ್ಟ್‌ ತೀರ್ಪಿನ ಅನ್ವಯ, ಗ್ರಾಮೀಣ ಕೃಪಾಂಕದ ಆಧಾರದ ಮೇಲೆ ನೇಮಕಗೊಂಡಿದ್ದ 26 ಮುನ್ಸೀಫ್‌(ನ್ಯಾಯಾಧೀಶರು) ರನ್ನು ಸೇವೆಯಿಂದ ರಾಜ್ಯ ಹೈಕೋರ್ಟ್‌ ಬಿಡುಗಡೆ ಮಾಡಿದೆ ಎಂದು ಕಾನೂನು ಸಚಿವ ಡಿ.ಬಿ.ಚಂದ್ರೇಗೌಡ ತಿಳಿಸಿದ್ದಾರೆ.

13 ಸಾವಿರ ಸರ್ಕಾರಿ ನೌಕರರ ಉದ್ಯೋಗಕ್ಕೆ ಮಾರಕವಾಗಿರುವ ಗ್ರಾಮೀಣ ಕೃಪಾಂಕವನ್ನು ರದ್ದು ಗೊಳಿಸಿರುವ ತೀರ್ಪನ್ನು ಮಾನವೀಯತೆ ಹಿನ್ನೆಲೆಯಲ್ಲಿ ಸಡಿಲಗೊಳಿಸುವಂತೆ ಸುಪ್ರಿಂಕೋರ್ಟ್‌ಗೆ ರಾಜ್ಯ ಸರ್ಕಾರ ಮನವಿ ಮಾಡಿಕೊಳ್ಳಲಿದೆ ಎಂದು ಬುಧವಾರ ಸುದ್ದಿಗಾರರೊಂದಿಗೆ ಮಾತನಾಡಿದ ಚಂದ್ರೇಗೌಡ ಹೇಳಿದರು.

ಸುಪ್ರಿಂಕೋರ್ಟ್‌ಗೆ ಸಲ್ಲಿಸಲಿರುವ ಮನವಿಯು ಸಿದ್ಧತಾ ಹಂತದಲ್ಲಿದ್ದು , ಆದಷ್ಟು ಶೀಘ್ರದಲ್ಲಿ ನ್ಯಾಯಾಲಯಕ್ಕೆ ಮನವಿಯನ್ನು ಸಲ್ಲಿಸಲಾಗುವುದು. ಸರ್ಕಾರಿ ನೌಕರರ ನೇಮಕಾತಿಯಲ್ಲಿ ಗ್ರಾಮೀಣ ಕೃಪಾಂಕವನ್ನು ನೀಡುವ ರಾಜ್ಯ ಸರ್ಕಾರದ ವಿರುದ್ಧ ಸುಪ್ರಿಂಕೋರ್ಟ್‌ ನೀಡಿರುವ ತೀರ್ಪಿಗೆ ಮಧ್ಯಂತರ ತಡೆಯಾಜ್ಞೆ ನೀಡುವಂತೆ, ರಾಜ್ಯ ಸರ್ಕಾರ ಶೀಘ್ರದಲ್ಲಿಯೇ ಪುನಃ ವಿಮರ್ಶೆ ಮನವಿಯನ್ನು ಸುಪ್ರಿಂಕೋರ್ಟ್‌ಗೆ ಸಲ್ಲಿಸಲಿದೆ.

ಗ್ರಾಮೀಣ ಹಾಗೂ ನಗರ ಪ್ರದೇಶದ ಉದ್ಯೋಗಾಕಾಂಕ್ಷಿಗಳ ನಡುವಿನ ಅಂತರವನ್ನು ತುಂಬಲು 1991 ರಿಂದಲೂ ರಾಜ್ಯ ಸರ್ಕಾರ ಗ್ರಾಮೀಣ ಕೃಪಾಂಕ ನೀಡುತ್ತಿದೆ. ಪ್ರಸ್ತುತ ಸುಪ್ರಿಂಕೋರ್ಟ್‌ ತೀರ್ಪು ಜಾರಿಗೆ ಬಂದಲ್ಲಿ 10 ಸಾವಿರ ಶಿಕ್ಷಕರು ಸೇರಿದಂತೆ 13 ಸಾವಿರ ಸರ್ಕಾರಿ ನೌಕರರು ಕೆಲಸ ಕಳೆದುಕೊಳ್ಳಲಿದ್ದಾರೆ ಎಂದು ಚಂದ್ರೇಗೌಡ ತಿಳಿಸಿದರು.

(ಪಿಟಿಐ)