ಇಬ್ಬರು ಆಫ್ಘನ್ನರಿಗಾಗಿ ಬೆಂಗಳೂರಿನಲ್ಲಿ ತೀವ್ರ ಶೋಧ

ಬೆಂಗಳೂರು : ವಿದ್ಯಾರ್ಥಿಗಳೆಂದು ಹೇಳಿಕೊಂಡು ಬೆಂಗಳೂರಿಗೆ ಬಂದು ಪೊಲೀಸ್‌ ಇಲಾಖೆಯಲ್ಲಿ ನೋಂದಾಯಿಸಿಕೊಳ್ಳದ ಇಬ್ಬರು ಆಫ್ಘನ್ನರಿಗಾಗಿ ಪೊಲೀಸರು ತೀವ್ರ ಶೋಧ ನಡೆಸುತ್ತಿದ್ದಾರೆ. ವಿದ್ಯಾರ್ಥಿಗಳೆಂದು ಹೇಳಿಕೊಂಡು ಬಂದಿರುವ ಇವರು ಯಾವುದಾದರೂ ಕಾಲೇಜು ಸೇರಿದ್ದಾರೆಯೇ ಇಲ್ಲವೇ ಎಂಬ ಬಗ್ಗೆ ತನಿಖೆ ನಡೆಯುತ್ತಿದೆ.

ಇವರು ಕಾಲೇಜು ಸೇರಿರುವರೇ ಇಲ್ಲ ಉದ್ಯೋಗಕ್ಕೆ ಸೇರಿರುವರೆ ಅಥವಾ ಇನ್ನಾವುದೇ ವಹಿವಾಟಿನಲ್ಲಿ ತೊಡಗಿದ್ದಾರೆಯೇ ಎಂಬ ಬಗ್ಗೆ ಪೊಲೀಸರಿಗೆ ಮಾಹಿತಿ ದೊರೆತಿಲ್ಲ. ಆದರೆ, ಈ ವ್ಯಕ್ತಿಗಳ ಬಗ್ಗೆ ಮಾಹಿತಿ ಸಂಗ್ರಹಿಸುವಂತೆ ಕೇಂದ್ರ ಗುಪ್ತಚಾರ ಇಲಾಖೆ ರಾಜ್ಯ ಪೊಲೀಸರಿಗೆ ಕೇಳಿದೆ ಎಂದು ಪ್ರಸಿದ್ಧ ಕನ್ನಡ ದಿನಪತ್ರಿಕೆಯಾಂದು ವರದಿ ಮಾಡಿದೆ.

ಯಾವುದೇ ವಿದೇಶೀ ಪ್ರಜೆ ದೇಶಕ್ಕೆ ಕಾಲಿಟ್ಟ 7 ದಿನಗಳ ಒಳಗೆ ಆಯಾ ಪ್ರದೇಶದ ವ್ಯಾಪ್ತಿಯ ಪೊಲೀಸರಲ್ಲಿ ತನ್ನ ಬಗ್ಗೆ ಸಂಪೂರ್ಣ ವಿವರಗಳನ್ನು ನೋಂದಾಯಿಸಿಕೊಳ್ಳಬೇಕು. ಆತ ಪಾಕಿಸ್ತಾನಿ ರಾಷ್ಟ್ರೀಯನಾಗಿದ್ದಲ್ಲಿ 24 ಗಂಟೆಗಳ ಒಳಗಾಗಿ ನೋಂದಾಯಿಸಿಕೊಳ್ಳಬೇಕು.

ಆದರೆ, ನಗರ ಪೊಲೀಸರು ಹುಡುಕುತ್ತಿರುವ ವ್ಯಕ್ತಿಗಳು ತಮ್ಮ ವಿವರಗಳನ್ನು ಬೆಂಗಳೂರು ನಗರ ಪೊಲೀಸರಲ್ಲಿ ದಾಖಲಿಸಿಕೊಂಡಿಲ್ಲ. ನಗರದ ಪೊಲೀಸ್‌ ಕಾರ್ಯಾಲಯದ ವಿದೇಶೀ ರಾಷ್ಟ್ರೀಯ ವಿಭಾಗದಲ್ಲಿ ಕೇವಲ ಇಬ್ಬರು ಆಫ್ಘನ್ನರ ವಿವರ ಮಾತ್ರ ಇದೆ. ಆದರೆ, ಈಗ ಪೊಲೀಸರು ಹುಡುಕುತ್ತಿರುವ ವ್ಯಕ್ತಿಗಳಿಬ್ಬರ ವಿವರ ಇಲ್ಲಿಲ್ಲ.

ಆದಾಗ್ಯೂ ಈ ಇಬ್ಬರು ವ್ಯಕ್ತಿಗಳ ಬಗ್ಗೆ ಯಾವುದಾದರೂ ಮಾಹಿತಿ ಸಿಕ್ಕೀತೆ ಎಂದು ತೀವ್ರ ಶೋಧ ನಡೆಸಲಾಗುತ್ತಿದೆ. ವಿದ್ಯಾರ್ಥಿಗಳೆಂದು ಹೇಳಿಕೊಂಡು ಬಂದಿರುವ ಈ ಇಬ್ಬರು ಆಫ್ಘನ್ನರು ಯಾರು? ಎಂಬುದು ಸದ್ಯಕ್ಕೆ ಪ್ರಶ್ನೆಯಾಗಿ ಉಳಿದಿದೆ.