ಲಕ್ಷದ್ವೀಪದಲ್ಲಿ ಸುಳಿಗಾಳಿ, ಕರುನಾಡಲ್ಲಿ ಮಳೆ

ಲಕ್ಷದ್ವೀಪ ಪ್ರದೇಶದಲ್ಲಿ ಗಾಳಿ ಸುತ್ತುತ್ತಿದೆಯಂತೆ. ಅಂದಮಾತ್ರಕ್ಕೆ ಅದೇನು ಚಂಡಮಾರುತವಲ್ಲ . ಆದರೆ, ಅದೇ ಮಾದರಿಯ ಮಥನ. ಅದರಿಂದಾಗಿ, ಅರಬ್ಬೀ ಸಮುದ್ರದಿಂದ ಹೊಂಟ ನೀರಾವಿ ಇಲ್ಲೆಲ್ಲಾ ತಂಪು ಚೆಲ್ಲುತ್ತಿವೆ. ಎರಡು ದಿನಗಳಿಂದ ಸುರಿಯುತ್ತಿರುವ ಮಳೆಯ ಮೂಲವನ್ನು ಹುಡುಕುತ್ತಾ ಹೊರಟಾಗ ಎಡವಿದ ಬಳ್ಳಿ ಹವಾಮಾನ ಇಲಾಖೆಯ ಮುಖ್ಯಸ್ಥ ಡಾ. ಕೊಪ್ಪಾರ್‌, ಗಾಳಿಯ ಮಥನದ ವಿಶ್ಲೇಷಣೆಯ ಮುಂದಿಡುತ್ತಾರೆ.

ಎಲ್ಲಿಯ ಲಕ್ಷದ್ವೀಪವೋ, ಅರಬ್ಬಿಯೋ, ರಾಜ್ಯದಲ್ಲಂತೂ ಮಳೆ ಬೀಳುತ್ತಿದೆ. ಈ ಮಳೆ ಕೇರಳದ ಕರಾವಳಿಯಲ್ಲೂ ಸುರಿಯುತ್ತಿದೆ. ರಾಜ್ಯದ ಕರಾವಳಿಯಲ್ಲಿ ಮಳೆಯ ತೀವ್ರತೆ ಅಧಿಕವಾಗಿದ್ದು , ಕುಂದಾಪುರದಲ್ಲಿ ವ್ಯಕ್ತಿಯಾಬ್ಬ ಸಿಡಿಲಿಗೆ ಬಲಿಯಾಗಿದ್ದಾನೆ. ಉಳಿದಂತೆ ಬೆಳ್ತಂಗಡಿಯ ಪುದುವೆಟ್ಟು ಸಮೀಪ ಮಿಂಚಿನ ಸುಳಿಗೆ ಸಿಕ್ಕು ಗಂಭೀರವಾಗಿ ಗಾಯಗೊಂಡಿರುವ ಮೂವರು ಆಸ್ಪತ್ರೆಯಲ್ಲಿ ದಾಖಲಾಗಿದ್ದಾರೆ.

ಬೆಂಗಳೂರಿನಲ್ಲೂ ಎರಡು ದಿನಗಳಿಂದ ಮಳೆ ಬಿಟ್ಟೂ ಬಿಡದೆ ಸುರಿಯುತ್ತಿದೆ. ನಗರದಲ್ಲಿ 34.4 ಮಿಮೀ ಮಳೆ ಸುರಿದಿದೆ ಎಂದು ಹವಾಮಾನ ಇಲಾಖೆಯ ವರದಿಗಳು ತಿಳಿಸಿವೆ. ಇದರಿಂದಾಗಿ, ನಗರದ ತಾಪಮಾನ ಗಮನಾರ್ಹ ಪ್ರಮಾಣದಲ್ಲಿ ಕುಸಿದಿದೆ. ಎರಡು ದಿನಗಳ ಹಿಂದಷ್ಟೇ 35 ಡಿಗ್ರಿ ಸೆಲ್ಷಿಯಸ್‌ ಆಸುಪಾಸಿನಲ್ಲಿ ಸುಳಿದಾಡುತ್ತಿದ್ದ ಗರಿಷ್ಠ ಉಷ್ಣಾಂಶ 27.6 ಡಿಗ್ರಿ ಸೆಲ್ಷಿಯಸ್‌ ಆದರೆ, ಕನಿಷ್ಠ ಉಷ್ಣಾಂಶ 20 ಡಿಗ್ರಿಗೆ ಕುಸಿದಿದೆ.

ಭಾನುವಾರದವರೆಗೂ ಇದೇ ರೀತಿಯ ತಂಪುಗಾಳಿ, ಮಳೆ ಮುಂದುವರಿಯುತ್ತದೆ ಎಂದು ಹವಾಮಾನ ಇಲಾಖೆ ಮೂಲಗಳು ತಿಳಿಸಿವೆ. ಅಲ್ಲಿಗೆ, ಈ ವಾರದ ಕೊನೆಯಲ್ಲಿ ಬಂದಿರುವ ಸಾಲು ರಜೆಗಳು ಮನೆಯಲ್ಲೇ ಮುಗಿಯುತ್ತವೆ ಎಂದಾಯಿತು.