ಕನಕಪುರದಲ್ಲಿ ಉಲ್ಬಣಗೊಳ್ಳುತ್ತಿರುವ ಕರುಳುಬೇನೆಗೆ 3 ಬಲಿ

ಕನಕಪುರ : ಕಳೆದ ಹದಿನೈದು ದಿನಗಳಿಂದ ಕಾಣಿಸಿಕೊಂಡಿರುವ ಕರುಳು ಬೇನೆಗೆ ಮೂರು ಮಂದಿ ಬಲಿಯಾಗಿದ್ದು, ಸುಮಾರು 600ಕ್ಕೂ ಹೆಚ್ಚು ಮಂದಿ ಅಸ್ವಸ್ಥರಾಗಿದ್ದಾರೆ.

ಮಳೆಗಾಳು ಗ್ರಾಮದ ನಿವಾಸಿ ಕೆಂಪಮ್ಮ (26), ಬರಡನಹಳ್ಳಿಯ ಚೆಲುವೇ ಗೌಡ (60) ಹಾಗೂ ಕೋಡಿ ಹಳ್ಳಿಯ ರಾಚಮ್ಮ (50) ಕರುಳಬೇನೆಗೆ ಬಲಿಯಾಗಿದ್ದಾರೆ. ಸ್ಥಳೀಯ ಸರಕಾರಿ ಆಸ್ಪತ್ರೆಯಲ್ಲಿ ಕರುಳು ಬೇನೆಯಿಂದ ಹಲವರು ನರಳುತ್ತಿದ್ದರೆ, ಇನ್ನು ಕೆಲವರು ಹಾರೋಹಳ್ಳಿ ಸಮುದಾಯ ಆರೋಗ್ಯ ಕೇಂದ್ರ ಸೇರಿದಂತೆ ಇತರ ಖಾಸಗಿ ಆಸ್ಪತ್ರೆಗಳಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಕರುಳುಬೇನೆಗೆ ತುತ್ತಾದವರಲ್ಲಿ ಮಹಿಳೆಯರು ಮತ್ತು ಮಕ್ಕಳ ಸಂಖ್ಯೆ ಹೆಚ್ಚಾಗಿರುವುದು ಕಂಡುಬಂದಿದೆ.

ಏಪ್ರಿಲ್‌ 15ರವೆರೆಗೆ ಸಾಮೂಹಿಕ ಸಮಾರಂಭಗಳಿಲ್ಲ

ಕರುಳುಬೇನೆಯ ಹಿನ್ನೆಲೆಯಲ್ಲಿ ತಾಲ್ಲೂಕಿನಲ್ಲಿ ನಡೆಯಬೇಕಿರುವ ಎಲ್ಲ ಸಂತೆ, ಜಾತ್ರೆ, ಊರ ಹಬ್ಬಗಳನ್ನು ಈ ತಿಂಗಳ 15ರವರೆಗೆ ಮುಂದೂಡಲಾಗಿದೆ. ಹೋಟೆಲ್‌, ಸರಾಯಿ ಅಂಗಡಿಗಳನ್ನು ಒಂದು ವಾರದವರೆಗೆ ಮುಚ್ಚುವಂತೆ ಜಿಲ್ಲಾಧಿಕಾರಿಗಳು ಆದೇಶ ಹೊರಡಿಸಿದ್ದಾರೆ.

ತಾಲ್ಲೂಕಿನ ವಿರುಪಸಂದ್ರದಲ್ಲಿ ಯುಗಾದಿಯ ಮರುದಿನ ಕಾಣಿಸಿಕೊಂಡ ಕರುಳಬೇನೆಗೆ ಕಲುಷಿತ ನೀರು ಮತ್ತು ಆಹಾರ ಸೇವನೆಯೇ ಕಾರಣ ಎಂದು ತಿಳಿದು ಬಂದಿದೆ. ಶನಿದೇವರ ಜಾತ್ರೆಯಲ್ಲಿ ಕಲಬೆರಕೆ ಆಹಾರ ಸೇವಿಸಿದವರನ್ನು ಮರುದಿನವೆ ಆಸ್ಪತ್ರೆಗೆ ಸೇರಿಸಲಾಗಿತ್ತು. ಇಲ್ಲಿ ಆರಂಭವಾದ ಕರುಳುಬೇನೆ ತಾಲೂಕಿನಾದ್ಯಂತ ಹರಡಿದೆ.

ಕರುಳುಬೇನೆ ನಿಯಂತ್ರಣಕ್ಕೆ ಬರುತ್ತಿರುವಂತೆಯೇ ಕುಡಿಯುವ ನೀರಿನ ತೊಂದರೆ ಕಾಣಿಸಿಕೊಂಡಿದ್ದು, ಗ್ರಾಮದ ಕಿರುನೀರು ಸರಬರಾಜು ಕೊಳವೆಗಳೂ ದುಸ್ಥಿತಿಯಲ್ಲಿವೆ. ಇದರಿಂದಾಗಿ ಗ್ರಾಮಸ್ಥರು ಇನ್ನಷ್ಟು ಆತಂಕಪಡುವಂತಾಗಿದೆ.

(ಇನ್ಫೋ ವಾರ್ತೆ)