ದೂರವಾಣಿ ಬಾಡಿಗೆ ತುಟ್ಟಿ, ಸ್ಥಳೀಯ ಕರೆಗಳ ವ್ಯಾಪ್ತಿ 200 ಕಿ.ಮೀಗೆ ವಿಸ್ತರಣೆ
ನವದೆಹಲಿ : ಭಾರತ್ ಸಂಚಾರ್ ನಿಗಮ ಶುಕ್ರವಾರ ತೆಗೆದುಕೊಂಡಿರುವ ಮಹತ್ವದ ನಿರ್ಧಾರದಲ್ಲಿ ಸ್ಥಳೀಯ ದೂರವಾಣಿ ಕರೆಗಳ ವ್ಯಾಪ್ತಿಯನ್ನು 200 ಕಿ.ಮೀಟರ್ವರೆಗೆ ವಿಸ್ತರಿಸಿದೆ. ಗ್ರಾಮೀಣ ಪ್ರದೇಶದ ಗ್ರಾಹಕರ ದೂರವಾಣಿ ಮಾಸಿಕ ಬಾಡಿಗೆಯನ್ನು 10 ರು.ನಿಂದ 30ರು. ವರೆಗೆ ಹಾಗೂ ಕಡಿಮೆ ದೂರವಾಣಿ ಬಳಸುವ ನಗರ ಪ್ರದೇಶದ ಗ್ರಾಹಕರ ದೂರವಾಣಿ ಬಾಡಿಗೆಯನ್ನು 20ರು. ನಿಂದ 70ರು. ವರೆಗೂ ಹೆಚ್ಚಿಸಲಾಗಿದೆ. ಇದನ್ನು ಎಕ್ಸ್ಚೇಂಜ್ ವ್ಯವಸ್ಥೆ ಹಾಗೂ ಸಾಮರ್ಥ್ಯವನ್ನು ಆಧರಿಸಿ ನಿರ್ಧರಿಸಲಾಗುತ್ತದೆ.
ಈ ವಿಷಯವನ್ನು ಕೇಂದ್ರ ಸಂಪರ್ಕ ಖಾತೆ ಸಚಿವ ರಾಮ್ ವಿಲಾಸ್ ಪಾಸ್ವಾನ್ ಶುಕ್ರವಾರ ಸುದ್ದಿಗಾರರಿಗೆ ತಿಳಿಸಿದರು. ಸ್ಥಳೀಯ ದೂರವಾಣಿ ಕರೆಗಳ ವ್ಯಾಪ್ತಿಯನ್ನು ವಿಸ್ತರಿಸಿರುವುದರಿಂದ ಎಸ್ಟಿಡಿ ಸೌಲಭ್ಯ ಹೊಂದಿಲ್ಲದ ಗ್ರಾಹಕರಿಗೆ ಹೆಚ್ಚಿನ ಅನುಕೂಲ ಆಗಲಿದೆ ಎಂದೂ ಅವರು ಹೇಳಿದರು.
ಇದರ ಜೊತೆಗೆ 50ರಿಂದ 100 ಕಿ.ಮೀಟರ್ ನಡುವಿನ ದೂರವಾಣಿ ಕರೆಗಳ ಪಲ್ಸ್ ಅವಧಿಯನ್ನು 15 ಸೆಕೆಂಡ್ಗಳಿಂದ 30 ಸೆಕೆಂಡ್ಗಳಿಗೂ ಏರಿಸಲಾಗಿದೆ. ಹೀಗಾಗಿ ಇನ್ನು ಮುಂದೆ ಗ್ರಾಹಕರು ಈಗ ನೀಡುತ್ತಿರುವ ದರದ ಅರ್ಧದಷ್ಟು ದರ ನೀಡಿದರೆ ಸಾಕು ಎಂದು ಅವರು ವಿವರಿಸಿದರು.